Revareva ta Filipi Taudia Dekenai 4:1-23
4 Vadaeni egu tadikaka e, umui lau lalokau henia bona lau ura bada umui lau itaia, umui be egu moale bona egu korona,+ egu lalokau taudia e, unai dala ai Lohiabada lalonai do umui gini goada noho.+
2 Euodia bona Sunutuke lau noia, Lohiabada ena gaukara ai do idia lalotamona.+
3 Lauegu gaukara hebou tauna e, oi danu lau noia unai hahine oi durudia noho. Oibe, idia bona Klemento bona ma haida be lau ida sivarai namona totona idia gaukara goadagoada. Idia ibounai edia ladana be mauri bukana lalonai idia noho.+
4 Nega ibounai Lohiabada dainai umui moale. Ma lau gwau lou, umui moale!+
5 Namona be taunimanima ibounai ese emui laloa maoromaoro karana+ idia itaia. Lohiabada be kahirakahira ia noho.
6 Namo lasi gau ta umui lalohekwarahilaia,+ to gau ibounai lalonai do umui guriguri bona noinoi goadagoada mai tanikiu ida, emui noinoi herevadia be Dirava dekenai do umui gwauraia hedinarai.+
7 Bona Dirava ena maino,+ laloparara ibounai ia hereaia gauna be Keriso Iesu amo do ia henia, bona unai ese emui kudouna bona lalona* do ia gimaia.+
8 Egu hereva orena be inai, tadikaka e, mani inai gaudia do umui laloa noho:* Momokani gaudia, mai anina bada gaudia, kara maoromaoro gaudia, kara goeva gaudia, lalokau gaudia, ladana namo gaudia, namo gaudia ibounai, bona taunimanima ese idia hanamoa gaudia.*+
9 Namona be lau amo umui dibaia, umui abia dae, umui kamonai, bona umui itaia gaudia do umui badinaia noho,+ bona maino Diravana be umui ida do ia noho.
10 Lohiabada dainai lau moale bada, badina hari lau umui laloa lou.+ Umui be lau umui laloaboio lasi, to dala ta be lasi, lau umui durua totona.
11 Lau dabu dainai unai lau hereva lasi, to lau dibaia gauna be inai, herevana egu noho dalana be edena bamona, lau dekenai idia noho gaudia be hegeregere.+
12 Lau dekenai gau momo idia noho eiava gau ta ia noho lasi, to unai bamona mauri lau manadalaia.+ Gau ibounai lalonai bona noho daladia ibounai lalonai lau dibaia gauna be inai, herevana lau bogakunu eiava lau hitolo, eiava lau dekenai gau momo idia noho eiava lau dabu, to egu lalona be ia hegeregere.
13 Badina lau dekenai siahu ia henia tauna amo goada lau abia gau ibounai lau karaia totona.+
14 To egu hisihisi lalonai kara namo umui hahedinaraia bona lau umui durua.
15 Momokani, umui Filipi tadikaka umui diba danu, sivarai namona umui dibaia murinai, bona lau be Makedonia lau rakatania neganai, kongrigeisen ma ta ese lau ia durua lasi eiava egu heduru ia abia dae lasi, to umui sibona.+
16 Badina Tesalonika ai lau noho neganai, lau dekenai nega tamona lasi to nega rua gau ta umui siaia, lau umui durua totona.
17 Lau be harihari gauna ta lau tahua lasi, to lau ura kara namodia amo do umui taga.*
18 To egu dabu gaudia ibounai lau abia vadaeni bona lau dekenai gau momo idia noho. Epafrodito+ amo umui siaia gaudia lau abia dainai lau hegeregere, unai be bonana namo muramura,+ boubou gauna namona bamona, bona Dirava ese ia moalelaia.
19 Bona egu Dirava, taga bada Diravana, ese Keriso Iesu amo emui dabu gaudia ibounai do ia henia.+
20 Vadaeni iseda Dirava bona Tamana dekenai hairai ia noho ela bona hanaihanai. Amen.
21 Keriso Iesu ida idia hakapua helaga taudia ibounai dekenai egu hanamoa hereva umui henia. Lau ida idia noho tadikaka ese umui dekenai edia hanamoa hereva idia siaia.
22 Helaga taudia ibounai, bona Kaisara ena ruma ai idia noho helaga taudia danu+ ese umui dekenai edia hanamoa hereva idia siaia.
23 Umui hahedinaraia lalohadai namona dainai, Lohiabada Iesu Keriso ena hebogahisi hereadaena umui abia.
Futnout
^ Eiava “emui lalohadai.”
^ Eiava “laloa dobu.”
^ Eiava “Dirava ese ia moalelaia gaudia.”
^ Dirava ese edia gaukara ia laloa dalana ia herevalaia.
