Revareva ta Galatia Taudia Dekenai 5:1-26
5 Unai ura kwalimu dainai, Keriso ese ita ia ruhaia. Unai dainai umui gini goada+ bona namo lasi igui hesiai tauna ai umui lao lou.+
2 Lau Paulo ese umui lau hamaoroa, bema emui kopina umui utua, Keriso ia karaia karana umui dainai be anina lasi.+
3 Kopina idia utua taudia ibounai lau hamaoroa lou, idia be mai edia maduna Taravatu* ibounai idia badinaia totona.+
4 Umui ura taravatu badinaia karana amo Dirava ese umui ia gwauraia maoromaoro,+ to umui be Keriso amo umui parara vadaeni, iena hebogahisi hereadaena umui rakatania.
5 To ai be Dirava ena vairanai kara maoromaoro taudia ai do ai lao negana ai naria noho, unai be lauma helaga bona abidadama karana sibona amo ia vara.
6 Keriso Iesu ida idia hakapua taudia dekenai kopina utua karana eiava kopina utua lasi karana be anina lasi, to abidadama be mai anina bada,+ bona lalokau dainai abidadama ese anina ia havaraia.
7 Guna umui be hereva momokani ena dala umui badinaia namonamo.+ Daika ese umui ia koua hereva momokani umui badinaia lasi totona?
8 Inai bamona lalohadai be umui ia boiria Diravana amo ia mai lasi.
9 Isti sisina ese paraoa ibounai ia hatubua.+
10 Lau diba momokani, Lohiabada ida umui hakapua taudia+ be lalohadai idauna do umui abia lasi. To umui ia hahekwakwanaia tauna+ be hahemaoro do ia abia, herevana ia be daika.
11 Tadikaka e, bema lau be kopina utua karana lau do harorolaia, vadaeni dahaka dainai lau idia dagedage henia noho? Bema lau be kopina utua karana lau harorolaia, vadaeni hisihisi auna* herevalaia karana+ ese taunimanima do ia habadua lasi.
12 Lau laloa, umui idia ura hamorua taudia ese sibodia edia tauanina idia utua oho* be namo.
13 Tadikaka e, Dirava ese umui ia boiria ura kwalimu taudia ai umui lao totona. To namo lasi unai umui gaukaralaia tauanina ena ura dikadia karaia totona,+ to lalokau ai ta ta ena hesiai gaukara umui karaia.+
14 Taravatu ena hereva ibounai be inai hereva tamona lalonai: “Namona be emu dekena tauna oi lalokau henia, oi sibona oi lalokau henia hegeregerena.”+
15 To bema umui heatu heheni noho,+ vadaeni umui naria namonamo, dika umui ta ta umui hadikaia ore.+
16 To lau gwau, lauma helaga ena dala hegeregerena umui raka noho,+ vadaeni tauanina ena ura karana ta do umui karaia lasi.+
17 Tauanina ena ura dikadia be lauma helaga ena ura ida ia hegeregere lasi. Idia ruaosi idia inai heheni, unai amo umui ura karaia karadia be umui karaia lasi.+
18 Danu, bema lauma helaga ese umui ia hakaua, vadaeni umui be taravatu henunai umui noho lasi.
19 Tauanina ena kara dikadia be idia hedinarai goevagoeva, idia be matabodaga karadia,*+ kara mirodia, gwau-edeede hemarai karadia,*+
20 kaivakuku tomadiho henia karana, meamea,+ inai heheni karadia, heai, mama, badu momo, heiriheiri, hapararaia karana, taunimanima badinaia karana,
21 laloa dikadia, kekero,+ regerege bada pati karadia, bona unai bamona karadia.+ Umui lau hadibaia unai gaudia dainai do umui naria namonamo, guna umui lau hadibaia hegeregerena, unai gaudia idia karaia taudia be Dirava ena Basileia do idia abia lasi.+
22 To lauma helaga ena huahua be lalokau, moale, maino, haheauka,* hebogahisi, kara namo,+ abidadama,
23 manau, bona sibona biagua karana.+ Unai karadia dekenai taravatu be lasi.
24 Danu, Keriso Iesu idia badinaia taudia ese tauanina ena ura dikadia be idia hamasea* vadaeni.+
25 Bema lauma helaga ena hakaua dalana hegeregerena ita noho, vadaeni namona be lauma helaga ena hakaua hegeregerena ita raka namonamo noho.+
26 Ita hekokoroku lasi,+ haida ida ita kara helulu lasi,+ bona ita mama lasi.
Futnout
^ Unai be, Mose Ena Taravatu.
^ Gr., “sibona edia abona idia utua oho.”
^ Eiava “boga-auka.”
^ Gr., “au dekenai idia tauadae.”
