Hahemaoro Taudia 11:1-40
11 Gileada tauna Iepeta+ be tuari tauna goadana. Ia be ariara hahine ena natuna bona ena tamana be Gileada.
2 To Gileada ena adavana danu be ia totona natudia memero ia havaraia. Unai natudia idia bada neganai, idia ese Iepeta idia lulua bona ia dekenai idia gwau: “Oi ese iseda tamana ena tano eiava kohu ta do oi abia lasi, badina oi be hahine ma ta ena natuna.”
3 Unai dainai Iepeta be ena tadikaka amo ia heau siri bona Tobo tanona dekenai ia noho. Bona idia noho kava tatau be Iepeta idia bamoa, bona ia ida idia lao edia inai taudia idia tuari henia totona.
4 Nega sisina ia hanaia murinai, Amono taudia be Israela taudia idia tuari henia.+
5 Bona Amono taudia ese Israela taudia idia tuari henia neganai, Gileada ena tau badadia be maoromaoro Tobo tano dekenai idia lao, Iepeta idia hakaua lou totona.
6 Iepeta dekenai idia gwau: “Oi mai bona emai tuari biaguna ai oi lao, unai amo Amono taudia ita tuari henia diba.”
7 To Iepeta be Gileada ena tau badadia dekenai ia gwau: “Umui ese lau umui inai henia momokani dainai, egu tamana ena ruma amo lau umui lulua, ani?+ Dahaka dainai metau umui davaria neganai, lau dekenai umui mai?”
8 Unai neganai Gileada ena tau badadia be Iepeta dekenai idia gwau: “Unai be momokani, to hari oi dekenai ai giroa mai. Bema ai ida oi lao bona Amono taudia oi tuari henia, Gileada taudia ibounai amo oi be emai gunalaia tauna ai do oi lao.”+
9 Vadaeni Iepeta be Gileada ena tau badadia dekenai ia gwau: “Bema umui ese lau be Amono taudia tuari henia totona umui hakaua giroa bona Iehova ese lau totona idia ia halusia, vadaeni lau be emui gunalaia tauna ai do lau lao!”
10 Gileada ena tau badadia be Iepeta dekenai idia gwau: “Bema ai ese emu hereva hegeregerena ai karaia lasi, ai bona oi huanai Iehova be iseda hereva hamomokania tauna.”*
11 Vadaeni Iepeta be Gileada ena tau badadia ida ia lao, bona taunimanima ese ia be edia gunalaia tauna bona tuari biaguna ai idia halaoa. Bona Misipa ai, Iepeta ese ena hereva ibounai be Iehova vairanai ia gwauraia lou.+
12 Bena Iepeta ese Amono ena king dekenai gwaukau taudia ia siaia,+ ia gwau: “Dahaka dainai lau oi badu henia bona egu tano dekenai oi mai lau oi tuari henia totona?”
13 Vadaeni Amono taudia edia king be Iepeta ena gwaukau taudia dekenai ia gwau: “Badina Israela taudia be Aigupito amo idia daekau mai neganai,+ idia ese egu tano idia abia, unai be Aranona+ amo ela bona Iaboka bona ela bona Ioridane.+ Vadaeni namona be mai maino ida unai tano umui henia lou.”
14 To Iepeta ese Amono taudia edia king dekenai gwaukau taudia ia siaia lou,
15 bona ia dekenai idia gwau:
“Iepeta ena hereva be inai, ‘Israela taudia ese Moaba taudia+ bona Amono taudia+ edia tano idia abia lasi,
16 badina Aigupito amo idia raka-lasi neganai, Israela taudia be taunimanima lasi gabuna amo idia raka hanai ela bona Davara Kakakaka dekenai+ bona Kadesi ai idia ginidae.+
17 Bena Israela taudia ese Edoma ena king dekenai gwaukau taudia idia siaia,+ idia gwau: “Mani emu tano amo ai hanaia lao,” to Edoma ena king be ia kamonai lasi. Moaba ena king dekenai hereva idia siaia danu,+ to edia hereva ia abia dae lasi. Unai dainai Israela taudia be Kadesi idia rakatania lasi.+
18 Idia be taunimanima lasi gabuna amo idia raka hanai neganai, Edoma tano+ bona Moaba tano idia hanaia. Idia be Moaba tano ena ist kahana amo idia hanai lao+ bona Aranona ai idia kamepa. Idia be Moaba ena tano hetoana idia hanaia lasi,+ badina Aranona be Moaba ena hetoana.
19 “‘Unai murinai Israela taudia ese Amoro taudia edia king Sihona, Hesebona ai ia lohia tauna unai, dekenai gwaukau taudia idia siaia bona Israela taudia be ia dekenai idia gwau: “Mani emu tano amo emai gabu dekenai ai hanaia lao.”+
20 To Sihona ese Israela taudia ia abidadama henia lasi, iena tano amo idia hanaia totona. Unai dainai Sihona ese ena taunimanima ibounai ia haboua bona Iahasa ai idia kamepa bona Israela taudia idia tuari henia.+
21 Unai neganai Iehova, Israela ena Dirava, ese Sihona bona ena taunimanima ibounai be Israela taudia edia imana dekenai ia atoa, bena Israela taudia ese Amoro taudia, unai tano ai idia noho taudia, edia tano ibounai idia abia.+
22 Idia ese Amoro taudia edia tano ibounai idia abia, unai be Aranona amo ela bona Iaboka, bona tano kaukau amo ela bona Ioridane.+
23 “‘Iehova, Israela ena Dirava ese Amoro taudia be ena taunimanima, Israela taudia, edia vairana amo ia lulua lao,+ bona hari oi hegeregere Israela taudia oi lulua totona, a?
24 Emu dirava Kemoso+ ese ia henia tanona oi noholaia, ani? Unai dainai Iehova emai Dirava ese emai vairana amo ia lulua raka-lasi taudia ibounai be do ai lulua lao.+
25 Vadaeni oi laloa oi ese Siporo ena natuna Balaki,+ Moaba ena king oi hereaia, a? Ia be Israela taudia ida ia hepapahuahu eiava idia ia tuari henia, a?
26 Israela taudia be lagani 300 lalonai, Hesebona bona ena badina taonidia+ bona Aroere bona ena badina taonidia bona Aranona sinavai badinai idia noho siti ibounai lalonai idia noho neganai, dahaka dainai oi ura lasi unai nega ai idia oi abia lou?+
27 Lau be oi dekenai kara dika ta lau karaia lasi, to oi be oi kerere, badina oi ura lau oi tuari henia. Namona be Hahemaoro Tauna Iehova+ ese hari dina Israela taudia bona Amono taudia huanai hahemaoro do ia karaia.’”
28 To Amono taudia edia king ese Iepeta ia siaia hereva ia abia dae lasi.
29 Iehova ena lauma be Iepeta latanai ia diho,+ bona ia be Gileada bona Manase tanodia amo ia hanai lao Gileada ena Misipe dekenai,+ bena unuseni amo Amono taudia dekenai ia lao.
30 Bena Iepeta be Iehova dekenai gwauhamata ta ia karaia+ bona ia gwau: “Bema Amono taudia be egu imana dekenai oi atoa bona idia lau halusia,
31 bona lau giroa lou neganai, egu ruma ena iduara amo do ia raka-lasi tauna ginigunana be Iehova ena,+ lau ese ia be gabua boubou bamona do lau henia.”+
32 Vadaeni Iepeta be Amono taudia tuari henia totona ia lao, bona Iehova ese idia be iena imana dekenai ia atoa.
33 Ia ese idia momo herea ia alaia mase, Aroere amo ela bona Miniti, siti iboudiai 20, bona ela bona Abele-keramima. Vadaeni ia ese Israela taudia vairanai Amono taudia ia halusia.
34 Bena Iepeta be ena hanua Misipa dekenai ia giroa lou neganai,+ ena natuna kekeni be ia raka-lasi ena tamana ia hedavari henia totona, tambarin ia gadaralaia bona ia mavaru! Ia be ena natuna tamona sibona. Ia murinai be natuna kekeni eiava natuna mero ta be lasi.
35 Iepeta ese ena natuna kekeni ia itaia neganai, ena dabua ia darea bona ia gwau: “O egu natuna e! Oi ese egu kudouna oi makohia, badina oi do lau siaia lao. Lau be Iehova dekenai lau gwauhamata vadaeni bona egu gwauhamata lau makohia diba lasi.”+
36 To kekeni ia gwau: “Tamagu e, bema Iehova dekenai oi gwauhamata vadaeni, namona be emu gwauhamata hegeregerena oi karaia,+ badina Iehova ese oi totona emu inai taudia, Amono taudia unai, edia davana ia henia vadaeni.”
37 Bena ena tamana dekenai ma ia gwau: “Namona be lau totona inai oi karaia: “Hua rua lalonai mani ororo gabudia dekenai lau lao, bona egu turana kekenidia ida do lau taitai, badina lau be do lau headava lasi.”
38 Unai neganai ia gwau: “Oi lao!” Vadaeni ia siaia lao, hua rua lalonai ena turana kekenidia ida ororo dekenai idia noho bona idia taitai, badina ia be do ia headava lasi.
39 Hua rua idia ore murinai, ena tamana dekenai ia giroa lou, bona Iepeta be ena natuna kekeni totona ia karaia gwauhamatana hegeregerena ia karaia.+ Ena natuna kekeni be tau ta ida ia mahuta hebou lasi. Bona Israela dekenai inai kastom* ia matamaia:
40 Lagani ta ta ai, Israela kekeni matamatadia be Gileada tauna Iepeta ena natuna kekeni dekenai idia lao, hanamoa hereva idia gwauraia totona, lagani ta lalonai dina 4 unai bamona idia karaia.
