Hahemaoro Taudia 13:1-25
13 Israela taudia be Iehova ena vairanai kara dika idia karaia lou,+ bona Iehova ese idia ia rakatania lagani 40 lalonai Filistia taudia edia siahu henunai idia noho totona.+
2 Unai nega lalonai tau ta be Sora ai ia noho,+ iena ladana be Manoa+ bona ia be Dano bese amo.+ Iena adavana be gabani bona natuna lasi.+
3 Gabeai, Iehova ena aneru be hahine dekenai ia hedinarai bona ia gwau: “Oi be gabani bona natuna lasi. To do oi rogorogo bona natuna mero ta do oi havaraia.+
4 Unai dainai do oi naria namonamo, wain eiava alkahol gauna ta do oi inua lasi,+ bona ia goeva lasi gauna ta do oi ania lasi.+
5 Oi be do oi rogorogo bona natuna mero ta do oi havaraia, bona ena huina oi utua lasi,+ badina ia vara negana amo ia be Dirava ena Nasiri tauna,* bona ia ese Filistia taudia amo Israela taudia do ia hamauria.”+
6 Bena unai hahine ia lao bona ena adavana ia hamaoroa, ia gwau: “Dirava momokani ena hesiai tauna be lau dekenai ia mai, iena toana be Dirava momokani ena aneru ena toana bamona, bona lau gari matamaia. To ia lau nanadaia lasi ia be edeseni amo ia mai, eiava lau dekenai iena ladana ia gwauraia lasi.+
7 To ia be lau dekenai ia gwau: ‘Oi be do oi rogorogo bona natuna mero ta do oi havaraia. Unai dainai, wain eiava alkahol gauna ta oi inua lasi, bona goeva lasi gauna ta oi ania lasi, badina unai natuna be Dirava ena Nasiri tauna, ia vara dinana amo ela bona ia mase dinana.’”
8 Manoa be Iehova dekenai ia noinoi, ia gwau: “Iehova e, mani hari oi siaia hesiai tauna oi siaia lou, unai amo ai do ia hadibaia, do ia vara natuna dekenai dahaka do ai karaia.”
9 Vadaeni Dirava momokani ese Manoa ia kamonai henia, bona ena adavana be siti murimurinai ia helai noho lalonai, Dirava momokani ena aneru be ia dekenai ia mai lou, to ena adavana Manoa be ia ida ia noho lasi.
10 Unai hahine be ena adavana dekenai ia heau lao haraga bona ia gwau: “Vanegai lau dekenai ia hedinarai tauna be lau dekenai ia mai lou.”+
11 Bena Manoa ia toreisi bona ena adavana ida ia lao. Ia be unai tauna dekenai ia lao bona ia gwau: “Vanegai oi ese egu adavana oi hereva henia, ani?” Ia gwau: “Tauna be lau inai.”
12 Manoa be ma ia gwau: “Namona be emu hereva ia momokani! Ia be edena bamona natuna ai do ia lao? Bona dahaka gaukara do ia karaia?”+
13 Vadaeni Iehova ena aneru be Manoa dekenai ia gwau: “Lau gwauraia gaudia ibounai be emu adavana ese ia badinaia be namo.+
14 Ia ese greips amo idia karaia gaudia do ia ania lasi, eiava wain eiava alkahol gauna ta do ia inua lasi,+ bona goeva lasi gauna ta do ia ania lasi.+ Namona be ia dekenai lau gwauraia gaudia ibounai ia badinaia.”
15 Manoa be Iehova ena aneru dekenai ia gwau: “Mani oi noho, bona oi totona nanigosi natuna ta do ai hegaegaelaia.”+
16 To Iehova ena aneru be Manoa dekenai ia gwau: “Bema lau noho, emu aniani do lau ania lasi. To bema oi ura Iehova dekenai gabua boubou oi henia, oi henia diba.” Manoa ia diba lasi unai be Iehova ena aneru.
17 Bena Manoa be Iehova ena aneru dekenai ia gwau: “Oiemu ladana be daika,+ unai amo emu hereva ia momokani neganai oi do ai hanamoa?”
18 To, Iehova ena aneru be ia dekenai ia gwau: “Dahaka dainai egu ladana totona oi henanadai, egu ladana be lada hereadaena?”
19 Bena Manoa ese nanigosi natuna bona aniani boubou ia abia bona nadi latanai Iehova dekenai ia henia. Bona Dirava be hoa gauna ta ia karaia noho lalonai, Manoa bona ena adavana be idia itaia noho.
20 Bena lahi ena hururu be boubou patana amo guba dekenai ia daekau lao neganai, Iehova ena aneru be boubou patana amo unai lahi lalonai ia daekau lao, bona Manoa bona ena adavana be unai idia itaia. Maoromaoro edia vairana be tano dekenai idia atoa diho.
21 Iehova ena aneru be Manoa bona ena adavana dekenai ia hedinarai lou lasi. Bena Manoa ia laloparara unai be Iehova ena aneru.+
22 Manoa be ena adavana dekenai ia gwau: “Ita be momokani do ita mase, badina ita ese Dirava ita itaia.”+
23 To ena adavana be ia dekenai ia gwau: “Bema Iehova ia ura ita ia hamasea, ia ese iseda imana amo gabua boubou+ bona aniani boubou do ia abia dae lasi, bona ita dekenai inai gaudia ibounai do ia hahedinaraia lasi, bona ita dekenai inai gaudia ta be do ia gwauraia lasi danu.”
24 Gabeai unai hahine be natuna mero ta ia havaraia bona ena ladana ia hatoa, Samson.+ Bona unai mero ia tubu daekau lalonai, Iehova ese ia hanamoa noho.
25 Nega ia hanaia lalonai, Iehova ena lauma be Samson latanai ia gaukara matamaia,+ unai be Mahane-dano ai,+ unai gabu be Sora bona Esetaoli edia huanai ia noho.+
Futnout
^ Anina be “Idia Makaia Tauna; Gwauhamatalaia Tauna; Hapararaia Tauna.”
