Hahemaoro Taudia 14:1-20
14 Bena Samson be Timunaha dekenai ia diho lao, bona Timunaha ai ia ese Filistia kekeni ta ia itaia.
2 Vadaeni ia lao bona ena tamana bona sinana ia hamaoroa, ia gwau: “Timunaha ai, lau ese Filistia kekeni ta lau itaia, bona lau ura ia umui abia lau adavaia totona.”
3 To ena tamana bona sinana be ia dekenai idia gwau: “Emu varavara bona iseda taunimanima ibounai huanai kekeni ta oi davaria diba lasi, a?+ Unai dainai do oi lao bona kopina utua lasi Filistia taudia huanai adavana ta do oi abia, a?” To Samson be ena tamana dekenai ia gwau: “Lau totona unai kekeni oi abia, badina ia be kekeni maorona lau totona.”
4 Iena tamana bona sinana be idia diba lasi unai be Iehova amo, badina Dirava ia ura unai amo Filistia taudia do ia tuari henia, badina unai nega ai Filistia taudia be Israela taudia idia lohiaia.+
5 Vadaeni Samson be ena tamana bona sinana ida Timunaha dekenai ia diho lao. Timunaha ena vain uma gabu dekenai ia ginidae neganai, laiona goadana ta be mai boiboi ida ia dekenai ia mai.
6 Bena Iehova ena lauma ese ia hasiahua,+ bona unai laiona be kahana rua dekenai ia darea, ta ese ena imana amo nanigosi natuna ta ia darea hegeregerena. To ia karaia karana be ena tamana bona sinana dekenai ia gwauraia lasi.
7 Bena Samson ia lao bona kekeni ia hereva henia, bona ena matanai ia be kekeni maorona.+
8 Gabeai Samson ese kekeni be ena ruma+ dekenai ia abia lao totona Timunaha dekenai ia giroa lou neganai, ia hamasea laiona ia itaia. Unai mase laiona ena tauanina lalonai nanigo momo herea bona hani ia itaia.
9 Vadaeni hani ia kakasia bona ena imana amo ia abia bona ia raka noho lalonai ia ania. Bona ena tamana bona sinana ida ia hedavari neganai, idia dekenai haida ia henia idia ania totona. To idia ia hamaoroa lasi unai hani be laiona ena mase tauanina amo ia abia.
10 Samson ena tamana be kekeni dekenai ia lao, bona unuseniai Samson ese aria ta ia karaia, unai be vaia do idia headava tatau matamata ese idia karaia karana.
11 Ia idia itaia neganai, ia do idia bamoa tatau 30 idia hakaua mai.
12 Bena Samson be idia dekenai ia gwau: “Mani umui dekenai hunia hereva ta lau gwauraia. Bema aria ena dina 7 lalonai haere umui davaria bona lau dekenai umui gwauraia, lau ese umui dekenai linen* dabua 30 bona dabua 30 ma haida do lau henia.
13 To bema lau dekenai ena anina umui gwauraia diba lasi, namona be lau dekenai linen dabua 30 bona dabua 30 ma haida umui henia.” Idia gwau: “Mani ai dekenai emu hunia hereva oi gwauraia, ai ura ai kamonai.”
14 Vadaeni idia dekenai ia gwau:
“Ia aniani gauna ta amo aniani gauna ia mai,Bona goada gauna ta amo digara gauna ia mai.”+
Idia hegeregere lasi dina toi lalonai unai hunia hereva ena anina idia gwauraia.
15 Dina namba 4 ai, idia be Samson ena adavana dekenai idia gwau: “Emu adavana oi koia,+ unai amo ai dekenai unai hunia hereva ena anina do ia gwauraia. Dika ai ese oi bona emu tamana ena ruma be lahi amo ai gabua. Ai umui boiria iniseni emai kohu umui abia totona, a?”
16 Vadaeni Samson ena adavana be ia dekenai ia taitai, ia gwau: “Oi be lau oi inai henia, bona lau oi lalokau henia lasi.+ Oi ese egu taunimanima dekenai hunia hereva ta oi gwauraia, to lau dekenai ena anina oi gwauraia lasi.” Unai nega ai Samson be ia dekenai ia gwau: “Lau ese unai hunia herevana be egu tamana bona sinana dekenai lau gwauraia lasi danu! Dahaka dainai oi dekenai do lau gwauraia?”
17 To unai aria ena dina 7 ibounai lalonai ia be Samson dekenai ia taitai noho. Bena dina namba 7 ai, Samson ese ia dekenai ena anina ia gwauraia, badina hahine ese ia doria. Bena hahine ese ena taunimanima dekenai unai hunia hereva ena anina ia gwauraia.+
18 Vadaeni dina namba 7 ai, dina ia do diho lasi* neganai, unai siti ena tatau be Samson dekenai idia gwau:
“Dahaka ese hani ena digara ia hereaia,Bona dahaka ese laiona ena goada ia hereaia?”+
Idia dekenai ia gwau:
“Bema umui be egu boromakau natuna ida tano umui geia lasi,*+Umui ese egu hunia hereva ena anina do umui lalopararalaia lasi.”
19 Bena Iehova ena lauma ese Samson ia hasiahua,+ bona ia be Asakelona dekenai ia diho lao+ bona unai hanua tatau 30 ia alaia mase, bona edia dabua ia abia bona hunia hereva ena anina idia gwauraia tatau dekenai ia henia.+ Ia be mai badu ida ena tamana ena ruma dekenai ia giroa lou.
20 Samson ena adavana+ be Samson ena headava lalonai ia bamoa tauna ta dekenai idia henia.+
Futnout
^ Linen be tubutubu gauna ta amo idia karaia varo eiava dabua.
^ Eiava reana, “ia be lalona daiutu dekenai ia do vareai lasi.”
^ Unai be, ena adavana ena lalona idia veria.
