Hahemaoro Taudia 16:1-31
16 Nega ta Samson be Gasa dekenai ia lao bona ariara hahine ta ia itaia, bona unai hahine ena ruma dekenai ia lao.
2 Haida ese Gasa taudia idia hamaoroa, idia gwau: “Samson be iniseni ia mai.” Vadaeni idia ese unai gabu idia hagegea bona hanuaboi ibounai lalonai siti ena geiti lalonai idia hunia. Bona unai hanuaboi lalonai mai regerege lasi ida idia noho, bona idia sibona dekenai idia gwau: “Daba ia rere neganai, ia do ita alaia.”
3 To, Samson be unuseni ia hekure noho ela bona hanuaboi momokani. Bena ia toreisi bona siti ena geiti bona ena kahana kahana ai idia noho du ruaosi bona edia loka danu ia kokia. Unai du be ena pagana ai ia atoa bona Heberona ia vaira henia ororo dekenai ia abidia daekau.
4 Unai murinai, Soreke Koura ai ia noho kekeni ladana, Delila, ia ura henia matamaia.+
5 Vadaeni Filistia taudia edia lohia taudia be Delila dekenai idia lao bona idia gwau: “Samson oi koia+ bona oi tahua dahaka ese ia dekenai goada bada ia henia, bona edena bamona ia do ai kwatua bona biagua diba. Unai totona ai ta ta ese oi dekenai siliva moni 1,100 do ai henia.”
6 Gabeai Delila be Samson dekenai ia gwau: “Mani lau oi hamaoroa, emu goada badana be edeseni amo oi abia, bona dahaka idia gaukaralaia diba oi idia kwatua bona biagua totona.”
7 Samson be ia dekenai ia gwau: “Bema peva ena varo* matamata 7, idia hakaukaua lasi gaudia amo lau idia kwatua, do lau manoka momokani, taunimanima ibounai bamona.”
8 Bena Filistia ena lohia taudia ese unai bamona varo 7, idia hakaukaua lasi gaudia be Delila dekenai idia mailaia, bona ia ese unai varo amo Samson ia kwatua.
9 Vadaeni ia ese daiutu ma ta lalonai tatau haida ia hunia, bona Samson dekenai ia boiboi: “Samson e, Filistia taudia be oi dogoatao totona idia mai!” Unai neganai ia ese varo ia makohia, lahi ena siahu ese fleks* varodia ia abia neganai idia makohi hegeregerena.+ To idia diba lasi ena goada be edeseni ia abia.
10 Bena Delila be Samson dekenai ia gwau: “Kamonai! Oi ese lau oi koia bona lau dekenai koikoi herevadia oi gwauraia. Mani lau oi hamaoroa, dahaka idia gaukaralaia diba oi idia kwatua totona.”
11 Bena Samson be ia dekenai ia gwau: “Bema idia do gaukaralaia lasi kwanau matamatadia amo lau idia kwatua, do lau manoka momokani, taunimanima ibounai bamona.”
12 Vadaeni Delila ese kwanau matamatadia ia abia bona Samson ia kwatua bena ia boiboi: “Samson e, Filistia taudia be oi dogoatao totona idia mai!” (Unai nega lalonai tatau haida be daiutu ma ta lalonai idia hunia noho.) Bena ia ese ena imana amo kwanau ia hamakohia, kotini varo ia hamakohia bamona.+
13 Unai murinai Delila be Samson dekenai ia gwau: “Ema bona hari oi ese lau oi koia bona koikoi herevadia oi gwauraia.+ Lau oi hamaoroa, dahaka idia gaukaralaia diba oi idia kwatua totona.” Bena Samson be ia dekenai ia gwau: “Bema egu huina, kahana 7 dekenai idia pania gauna unai, be masini ena kotini varo ida umui turia hebou, egu goada do ia ore.”
14 Bena ia ese Samson ena huina be pini amo ia ha-aukaia bona ia boiboi: “Samson e, Filistia taudia be oi dogoatao totona idia mai!” Vadaeni Samson be mahuta amo ia noga bona pini bona masini ena kotini varo ia kokia.
15 Delila be Samson dekenai ia gwau: “Dahaka dainai oi gwau lau oi lalokau henia,+ to emu kudouna be lau ida ia noho lasi? Inai nega toi lau oi koia bona emu goada bada oi abia gabuna be lau oi hamaoroa lasi.”+
16 Dina ta ta ai ia ese Samson ia nanadaia loulou bona ia doria dainai, Samson ia hesiku momokani.+
17 Bena ia ese hahine dekenai gau ibounai ia gwauraia, ia gwau: “Nega ta egu huina idia utua lasi, badina lau vara negana amo lau be Dirava ena Nasiri tauna.*+ Bema egu huina idia utua, egu goada do ia ore bona do lau manoka bona taunimanima ibounai bamona do lau lao.”
18 Delila ia itaia Samson be ia dekenai gau ibounai ia herevalaia neganai, maoromaoro Filistia lohia taudia ia hamaoroa,+ ia gwau: “Hari umui daekau mai, badina gau ibounai be lau dekenai ia herevalaia vadaeni.” Unai dainai Filistia lohia taudia be ia dekenai idia mai, moni idia mailaia danu.
19 Delila ese Samson ena kwarana be iena mamuna latanai ia atoa, bona ia hamahutaia, bena tau ta ia boiria bona Samson ena huina, kahana 7 dekenai idia pania gauna unai, ia utua. Unai murinai Delila ese Samson ia biagua matamaia, badina iena goada be ia ore ia lao.
20 Vadaeni ia boiboi: “Samson e, Filistia taudia be oi dekenai idia mai inai!” Ena mahuta amo ia noga bona ia gwau: “Do lau raka-lasi bona heau boio, nega ibounai lau karaia bamona.”+ To ia diba lasi Iehova ese ia rakatania vadaeni.
21 Bena Filistia taudia ese ia idia dogoatao bona ena matana rua idia kokia. Bena Gasa dekenai idia abia lao bona kopa seini rua amo idia kwatua, bona dibura ruma ai witi moia tauna ai ia lao.
22 To ena huina idia utua murinai, ia tubu matamaia lou.+
23 Filistia lohia taudia idia haboua, Dagona dirava+ dekenai boubou gaudia idia henia bona idia moale hebou totona, badina idia gwau: “Iseda dirava ese iseda inai tauna Samson be iseda imana dekenai ia atoa!”
24 Taunimanima ese ia idia itaia neganai, edia dirava idia hanamoa bona idia gwau: “Iseda dirava ese eda inai tauna be eda imana dekenai ia atoa vadaeni, ia ese iseda tano ia hadikaia+ bona ita momo ia alaia mase.”+
25 Idia moale bada dainai, idia gwau: “Samson umui boiria mai bona ai do ia hamoalea.” Vadaeni dibura ruma amo Samson idia boiria, idia ia hamoalea totona. Idia ese ia be du rua huanai idia haginia.
26 Bena Samson be iena imana ia dogoatao merona dekenai ia gwau: “Mani ruma ena du lau dogoatao, unai amo lau tabekau diba.”
27 (Unai ruma lalonai tatau bona hahine momo idia noho. Bona Filistia lohia taudia ibounai danu be unuseniai, bona guhi ataiai be tatau bona hahine 3,000 bamona idia noho, bona idia ibounai be Samson dekenai idia kiri noho.)
28 Bena Samson+ be Iehova dekenai ia boiboi: “Siahu Ibounai Lohiabadana Iehova e, plis lau oi laloatao, bona Dirava e, plis inai nega tamona lau dekenai goada oi henia,+ Filistia taudia ese egu matana ta idia kokia dainai edia davana do lau henia.”+
29 Bena Samson ese ruma ena huanai idia noho du ruaosi ia dogoatao, ena imana idibana be du ta dekenai bona ena imana laurina be du ma ta dekenai.
30 Samson ia boiboi: “Filistia taudia ida lau mase hebou be namo!” Bena mai ena goada ibounai ida du ia doria, bona ruma be lohia taudia bona taunimanima ibounai edia latanai ia moru.+ Vadaeni ia mase negana ai ia hamasea taudia be momo herea, ia mauri lalonai ia hamasea taudia edia namba ia hanaia.+
31 Gabeai iena tadikakadia bona ena tamana ena bese taudia ibounai idia lao bona ena tauanina idia abia. Bona idia abia daekau lao bona Sora+ bona Esetaoli edia huanai idia guria, iena tamana Manoa+ idia guria gabuna ai. Samson be Israela ai lagani 20 lalonai hahemaoro gaukara ia karaia.+
Futnout
^ Eiava “animal ena varovaro.”
^ Inai tubutubu gauna be Aigupito ai ia tubu, ia amo linen dabua idia karaia.
^ Anina be “Idia Makaia Tauna; Gwauhamatalaia Tauna; Hapararaia Tauna.”
