Hahemaoro Taudia 18:1-31
18 Unai nega lalonai Israela ai king ta ia noho lasi.+ Danu, unai nega ai, Dano iduhu+ be tano ta ia tahua ia noholaia totona, badina Israela taudia edia iduhu huanai ia be ahuna ta ia do abia lasi.+
2 Dano taudia ese edia iduhu amo tatau 5 idia siaia tano idia itaia bona sekea totona, unai tatau goadadia be Sora bona Esetaoli amo.+ Dano taudia be idia dekenai idia gwau: “Umui lao, bona tano umui sekea.” Vadaeni Eparaima ena ororo gabudiai idia ginidae neganai, idia be Mika ena ruma dekenai idia lao,+ bona unai hanuaboi ai unuseni idia mahuta.
3 Idia be Mika ena ruma kahirakahira idia lao neganai, Levi tau matamata ta ena gado regena idia kamonai, bena ia dekenai idia lao bona idia nanadaia: “Daika ese iniseniai oi ia mailaia? Inai gabu dekenai dahaka oi karaia? Dahaka dainai iniseni oi noho?”
4 Idia dekenai ia haere, ia gwau: “Mika ese lau totona inai gaudia ia karaia, bona lau ia hoia hahelaga gaukara lau karaia totona.”+
5 Bena ia dekenai idia gwau: “Mani Dirava oi noia, bema emai laolao ena anina do ia vara eiava lasi?”
6 Hahelaga tauna be idia dekenai ia gwau: “Mai maino ida umui lao. Emui laolao lalonai Iehova be umui ida do ia noho.”
7 Bena unai tatau 5 idia lao bona Laisi dekenai idia ginidae.+ Idia itaia, unai tano taudia be edia badinai idia noho bese taudia amo heduru idia tahua lasi, Sidono taudia bamona, idia danu ese ma haida amo heduru idia tahua lasi. Idia be maino ai idia noho bona gau ta dekenai idia gari lasi,+ bona tano ta amo dagedage lohia ta ia mai lasi idia ia hadikaia totona. Idia be Sidono taudia amo idia noho daudau, bona bese ma haida idia tura henia lasi.
8 Idia be Sora bona Esetaoli ai edia tadikaka dekenai idia giroa lou neganai,+ edia tadikaka be idia dekenai idia gwau: “Emui laolao be edena bamona?”
9 Idia gwau: “Ita daekau lao idia ita tuari henia totona, badina ai itaia tano be namo herea. Dahaka dainai umui daradara? Namona be ita lao haraga bona tano ita abia.
10 Umui ginidae neganai, do umui itaia unai taudia be gau ta idia laloa lasi,+ bona tano be bada herea. Dirava ese unai tano be emui imana ai ia atoa, bona unai tano dekenai gau ibounai idia noho.”+
11 Bena Dano bese amo tuari totona idia hegaegae tatau 600 be Sora bona Esetaoli idia rakatania.+
12 Idia daekau lao bona Kiriata-iearimi kahirakahira idia kamepa,+ unai be Iuda ai. Unai dainai unai gabu idia gwauraia Mahane-dano*+ ema bona hari, ia be Kiriata-iearimi ena west kahanai ia noho.
13 Unuseni amo Eparaima ena ororo gabudia dekenai idia lao bona Mika ena ruma dekenai idia ginidae.+
14 Bena Laisi tanona spai totona idia lao tatau 5 be edia tadikakadia+ dekenai idia gwau: “Umui diba lasi, a? Inai ruma lalodiai epodi,* edia ruma bese ena dirava idauidau,* idia koroa laulau ta, bona auri kaivakuku idia noho.”+ Do umui karaia gauna mani umui laloa.
15 Vadaeni unuseni idia ginidae bona Mika ena ruma ai ia noho Levi tau matamata dekenai idia mai,+ bena ia idia nanadaia bema ia be ia namo.
16 To unai nega lalonai, Dano ena tatau 600+ be siti ena geiti dekenai idia gini, idia be mai edia tuari gaudia.
17 Tano spai totona idia lao vadaeni tatau 5+ be idia vareai, koroa laulau, epodi,+ ruma bese ena dirava idauidau,+ bona auri kaivakuku+ idia abidia totona. (Hahelaga tauna+ be siti ena geiti dekenai tatau 600 ida ia gini, idia be mai edia tuari gaudia.)
18 Idia be Mika ena ruma lalonai idia vareai bona unai laulau, epodi, ruma bese ena dirava idauidau, bona auri kaivakuku idia abia. Hahelaga tauna be idia dekenai ia gwau: “Dahaka umui karaia noho?”
19 To ia dekenai idia gwau: “Hadokoa! Hereva ta oi gwauraia lasi,* bona ai ida oi mai bona emai sisiba henia tauna* bona hahelaga tauna ai do oi lao. Edena be namo, tau tamona ena bese ena hahelaga tauna ai oi lao,+ eiava Israela ena iduhu ta bona ena bese taudia edia hahelaga tauna ai oi lao?”+
20 Vadaeni hahelaga tauna ia moale, bona epodi, ruma bese ena dirava idauidau, bona unai laulau+ ia abia bona taunimanima ida ia lao.
21 Bena idia giroa bona idia lao, edia natudia, animal, bona dava bada kohudia be edia vairanai.
22 Mika ena ruma amo idia daudau sisina neganai, Mika ena ruma kahirakahira idia noho tatau idia haboua bona Dano taudia edia murinai idia lao.
23 Dano taudia dekenai idia boiboi, bena Dano taudia idia giroa bona Mika dekenai idia gwau: “Kerere ta ia vara, a? Dahaka dainai taunimanima momo ida oi mai?”
24 Vadaeni ia gwau: “Umui ese egu dirava, lau karaia gaudia unai, umui abia bona egu hahelaga tauna danu umui abia bona umui lao. Lau dekenai gau ta ia noho lasi. Dahaka dainai lau umui nanadaia, ‘Kerere ta ia vara, a?’”
25 Dano taudia idia gwau: “Ai dekenai oi hereva auka lasi, dika badu taudia ese oi idia tuari henia, bona oi bona emu ruma bese taudia do idia alaia mase.”
26 Vadaeni Dano taudia idia lao, bona Mika ia itaia edia goada ese iena goada ia hereaia neganai, ia giroa bona ena ruma dekenai ia lao.
27 Dano taudia be Mika ese ia karaia gaudia idia abia bona ena hahelaga tauna danu idia abia murinai, Laisi dekenai idia lao,+ unai tano taudia be maino ai idia noho bona gau ta dekenai idia laloa momo lasi.+ Bena tuari kaia amo unai taudia idia alaia mase bona lahi amo siti idia gabua.
28 Ta ia noho lasi unai siti ia gimaia totona, badina ia be Sidono amo ia daudau, bona idia be bese ma ta ida idia turana lasi. Unai siti be Bete-rehoba ena koura dekenai ia noho.+ Bena Dano taudia ese unai siti idia haginia lou bona unuseniai idia noho.
29 Bena unai siti ena ladana idia hatoa Dano,+ unai be edia tamana Dano ena ladana, ia be Israela ena natuna ta.+ To unai siti ena ladana gunana be Laisi.+
30 Unai murinai Dano taudia be sibona totona koroa laulau idia haginia,+ bona Ionatana,+ Mose ena natuna Geresome+ ena bese tauna unai, bona ena bese taudia be Dano taudia edia hahelaga taudia bamona idia gaukara, ela bona idau bese taudia ese idia guidia bona idia abia lao dinana.
31 Bona idia be Mika ese ia koroa laulau idia haginia, bona Dirava momokani ena ruma be Silo ai ia noho negana ibounai lalonai, unai laulau be unuseni ia noho.+
Futnout
^ Anina be “Dano Ena Kamepa.”
^ Heb., “Emu imana be emu uduna dekenai oi atoa.”
^ Heb., “tamana.”
