Hahemaoro Taudia 19:1-30
-
Gibea ai Beniamina taudia be matabodaga karadia idia karaia (1-30)
19 Israela ai king be lasi negadia lalonai,+ Eparaima ororo ena daudau gabuna ai Levi tauna ta ia noho,+ ia ese Iuda ena siti Betelehema ai hahine ta* ia abia+ bona ia adavaia.
2 To unai hahine ia heudahanai, bona ena tau ia rakatania bona ena tamana ena ruma Betelehema dekenai ia lao, unai be Iuda ai. Bona unuseniai hua 4 ia noho.
3 Bena unai Levi tauna be ia murinai ia lao, ia ura hahine ia hereva henia ia giroa lou totona. Ia ese ena hesiai tauna bona doniki rua ia abia lao. Vadaeni hahine ese ia be ena tamana ena ruma lalonai ia hakaua vareai. Bona ena tamana ese ia itaia neganai, mai moale ida ia hedavari henia.
4 Bena tau ena ravana tauna, hahine matamata ena tamana unai, ese unai tauna ia noia ia ida dina toi do ia noho. Bona do idia aniani bona inuinu, bona hanuaboi ai unuseni do ia mahuta.
5 Dina namba 4 ai, daba momokani idia toreisi bona idia lao gwauraia neganai, hahine ena tamana be ena ravana tauna dekenai ia gwau: “Goada abia totona mani oi aniani, bena oi lao diba.”
6 Vadaeni idia helai bona idia aniani bona inuinu hebou. Unai murinai, hahine ena tamana be unai tauna dekenai ia gwau: “Mani emu kara, hari hanuaboi oi noho bona oi moale.”
7 Unai tauna ia toreisi bona ia lao gwauraia neganai, ena ravana ese ia noia loulou, unai dainai hanuaboi ai unuseni ia mahuta lou.
8 Dina namba 5 ai, daba momokani ai ia toreisi bona ia lao gwauraia neganai, hahine ena tamana ia gwau: “Mani oi aniani, goada oi abia totona.” Bona idia noho ela bona adorahi, bona idia aniani noho.
9 Vadaeni unai tauna ia toreisi bona ena hahine bona hesiai tauna ida ia lao gwauraia neganai, ena ravana tauna, hahine ena tamana unai, be ia dekenai ia gwau: “Inai be adorahi momokani, mani hanuaboi iniseni oi mahuta. Inai dina be kahirakahira do ia ore. Inai hanuaboi oi noho bona oi moale. Kerukeru emu laolao totona daba momokani oi toreisi, bona emu ruma* dekenai oi lao diba.”
10 To unai tau ia ura lasi hanuaboi ma ta ia noho, unai dainai ia toreisi bona ia lao ela bona Iebusu, Ierusalema unai.+ Ia ese doniki rua, iena hahine, bona iena hesiai tauna ia hakaua lao.
11 Iebusu kahirakahira idia lao neganai, gabu ia dibura matamaia. Unai dainai hesiai tauna be ena biaguna dekenai ia gwau: “Ia namo Iebusu taudia edia siti dekenai ita lao bona hanuaboi ai unuseni ita mahuta?”
12 To ena biaguna be ia dekenai ia gwau: “Namo lasi idau bese taudia edia siti dekenai ita lao, idia be Israela taudia lasi. To do ita lao noho ela bona Gibea dekenai.”+
13 Bena ena hesiai tauna dekenai ia gwau: “Oi mai bona ita lao, Gibea eiava Rama ai do ita ginidae haraga be namo, bena hanuaboi ai unuseni ita mahuta diba.”+
14 Vadaeni idia lao bona dina ia diho matamaia neganai, idia be Gibea kahirakahira idia ginidae, Gibea be Beniamina taudia edia siti.
15 Vadaeni Gibea dekenai idia ginidae bona siti lalonai idia vareai, unuseni idia noho totona. Bena siti ena ariara ai idia helai, to ta ese idia ia abia dae lasi edia ruma dekenai idia mahuta totona.+
16 Adorahi momokani ai, tau buruka ta be uma gaukara amo ia giroa mai. Ia be Eparaima ena ororo gabudia amo,+ bona nega sisina daudau Gibea ai ia noho. To unai siti ai idia noho taudia be Beniamina taudia.+
17 Tau buruka ese unai tauna be siti ena ariara ai ia itaia neganai, ia gwau: “Oi be edeseni oi lao noho, bona edeseni amo oi mai?”
18 Ia haere: “Ai be Iuda ena siti Betelehema amo ai mai bona Eparaima ororo ena daudau gabuna dekenai ai lao noho, lau be unai gabu tauna. Lau be Iuda ena siti Betelehema amo lau giroa mai noho,+ bona Iehova ena ruma dekenai lau lao noho,* to ta ese lau be ena ruma dekenai ia abia dae lasi.
19 Ai dekenai rei kaukau bona aniani be idia hegeregere emai doniki totona,+ bona paraoa+ bona wain idia noho, lau, egu hahine, bona egu hesiai tauna totona. Ai be gau ta dekenai ai dabu lasi.”
20 Vadaeni tau buruka ia gwau: “Egu ruma dekenai umui mai! Lau ese umui do lau naria. To namo lasi ariara dekenai umui mahuta.”
21 Bena tau buruka ese ena ruma dekenai idia ia hakaua vareai bona edia doniki ia ubudia danu. Bena idia be edia aena idia huria bona idia aniani bona inuinu.
22 Idia moale hebou noho lalonai, unai siti ena tatau dikadia haida be ruma idia hagegea bona iduara idia botaia matamaia, bona unai ruma ia biagua tau buruka dekenai idia hereva noho, idia gwau: “Emu ruma dekenai ia vareai tauna oi hakaua raka-lasi, unai amo ia do ai sihari henia.”+
23 Unai neganai ruma biaguna ia raka-lasi bona idia dekenai ia gwau: “Egu tadikaka e, mani emui kara, inai kara dikana umui karaia lasi. Inai tauna be vadivadi tauna egu ruma dekenai. Namo lasi inai hemarai karana umui karaia.
24 Itaia, egu rami-hebou natuna kekeni bona inai tau ena hahine idia noho. Idia lau abia mai bona idia umui hadikaia diba bema unai be emui ura gauna.+ To inai tauna dekenai inai hemarai karana umui karaia lasi.”
25 To unai tatau idia kamonai lasi, unai dainai unai Levi tauna ese ena hahine ia dogoatao+ bona murimuri dekenai ia doria lao. Bena idia ese ia idia reipia bona hanuaboi ibounai lalonai ia idia hahisia ela bona daba kahanai. Bena daba ia rere neganai, ia idia siaia lao.
26 Daba momokani ai, unai hahine ia mai bona tau buruka ena ruma ena iduara badinai ia moru diho, ena biaguna ia noho gabuna unai, bona unuseni ia hekure ela bona gabu ia diari.
27 Vadaeni unai hahine ena biaguna be daba ai ia toreisi bona ruma ena iduara ia kehodia, ia ura ia raka-lasi bona ena laolao ia matamaia neganai, ena hahine ia itaia, ruma ena iduara kahirakahira ia hekure bona ena imana be iduara badinai ia noho.
28 Vadaeni hahine dekenai ia gwau: “Oi toreisi bona ita lao.” To hahine ia haere lasi. Bena unai tau ese ia be ena doniki latanai ia atoa bona ena ruma dekenai ia lao.
29 Ia be ruma dekenai ia ginidae neganai, kaia* ia abia bona ena hahine ena imana bona aena be kahana 12 dekenai ia utua, bona kahana ta ta be Israela ena gabu ta ta dekenai ia siaia lao.
30 Unai idia itaia taudia ibounai idia gwau: “Guna unai bamona kara ta ia vara lasi eiava Israela taudia be Aigupito tanona amo idia raka-lasi negana amo ema bona hari, unai bamona kara ta ita itaia lasi. Inai kara umui laloa namonamo bona umui herevalaia,+ unai amo do ai diba dahaka do ai karaia.”
Futnout
^ Heb., “hahine iharuana.”
^ Heb., “palai ruma.”
^ Eiava reana, “bona lau be Iehova ena ruma ai hesiai gaukara lau karaia.”
^ Animal ivaia kaia.
