Hahemaoro Taudia 20:1-48
-
Beniamina taudia tuari henia (1-48)
20 Vadaeni Israela taudia ibounai, Dano+ amo ia lao Bere-sieba bona ela bona Gileada tano amo,+ idia raka-lasi bona idia ibounai be Iehova vairanai mai lalotamona ida idia haboua, unai be Misipa ai.+
2 Bena Israela taudia bona edia iduhu gunalaia taudia ibounai be Dirava ena orea taudia huanai idia gini. Bona aena amo idia raka tuari taudia mai edia tuari kaia, ibounai be 400,000.+
3 Beniamina taudia idia kamonai Israela tatau be Misipa dekenai idia daekau lao.
Bena Israela tatau idia gwau: “Ai oi hamaoroa, inai kara dikana be edena bamona ia vara?”+
4 Vadaeni Levi tauna,+ ia mase hahine ena adavana unai, ia gwau: “Lau be egu hahine ida Gibea dekenai ai ginidae,+ unai be Beniamina taudia edia tano, hanuaboi unai gabu dekenai ai mahuta totona.
5 Bona Gibea ai idia noho taudia* be lau dekenai lalohadai kererena idia abia, vadaeni idia toreisi bona hanuaboi ai lau noho rumana idia hagegea. Idia ura lau idia alaia, to egu hahine idia reipia bona ia mase.+
6 Vadaeni egu hahine ena mase tauanina lau abia, lau utua, bona unai kahadia be Israela taudia edia tano ibounai dekenai lau siaia,+ badina idia ese Israela ai hemarai karana idia karaia.
7 Umui Israela taudia ibounai e, mani emui lalohadai umui gwauraia,+ inai kara dainai dahaka do ita karaia.”
8 Bena taunimanima ibounai idia lalotamona bona idia gwau: “Ai ta be emai palai ruma eiava ruma dekenai do ai giroa lou lasi.
9 Gibea taudia dekenai inai do ita karaia: Namona be gadara ta* amo tatau haida ita abia hidi bona Gibea taudia tuari henia totona ita daekau lao.+
10 Israela ena iduhu ibounai amo ita ese tatau 100 amo 10 do ita abia, bona tatau 1,000 amo 100 do ita abia, bona tatau 10,000 amo 1,000 do ita abia. Idia ese tuari taudia totona aniani do idia gogoa, unai amo tuari taudia ese Beniamina ena siti Gibea ai idia noho taudia do idia tuari henia, badina idia be Israela ai hemarai karana idia karaia.”
11 Unai dainai Israela tatau ibounai be orea tamona bamona* idia haboua, unai siti idia tuari henia totona.
12 Bena Israela iduhu ibounai ese tatau haida be Beniamina iduhu tatau dekenai idia siaia, idia gwau: “Dahaka dainai inai kara dikana be umui huanai ia vara?
13 Ai dekenai Gibea tatau dikadia umui henia,+ unai amo idia do ai hamasea bona Israela amo inai kara dikana ai kokia diba.”+ To Beniamina taudia be idia ura lasi edia Israela varavara idia kamonai henia.
14 Bena Beniamina taudia be edia siti ta ta amo idia mai bona Gibea dekenai idia haboua, Israela tatau idia tuari henia totona.
15 Unai dina ai Beniamina taudia ese edia siti ta ta amo tatau mai edia tuari kaia idia boiria, idia ibounai be 26,000. Bona idia abia hidi Gibea tatau 700 danu.
16 Unai tuari oreana ai idia abia hidi tatau 700 be imana lauri taudia. Inai tatau ibounai be edia vilipopo amo nadi idia pidia maoromaoro* diba bona idia reaia lasi.
17 Israela tatau ese idia boiria tatau mai edia tuari kaia ibounai be 400,000, idia be tuari diba momo taudia.+ To Beniamina tatau be idia boiria lasi.
18 Israela taudia idia toreisi bona Betele dekenai idia daekau lao, Dirava idia noia totona.+ Bona idia gwau: “Daika ese ai do ia gunalaia Beniamina taudia tuari henia totona?” Iehova ia haere: “Iuda ese umui do ia gunalaia.”
19 Unai murinai Israela taudia be daba ai idia toreisi bena idia lao bona Gibea kahirakahira idia kamepa.
20 Vadaeni Israela tatau idia lao Beniamina taudia idia tuari henia totona. Bona Gibea dekenai tuari totona idia gini hegaegae.
21 Bena Beniamina taudia be Gibea amo idia raka-lasi bona unai dina ai Israela tatau 22,000 idia alaia mase.
22 To, Israela taudia edia tuari oreana be idia lalogoada bona tuari totona idia gini hegaegae gabuna ai idia gini lou, dina ginigunana ai idia karaia bamona.
23 Bena Israela taudia be Betele dekenai idia daekau lao bona Iehova vairanai idia taitai ela bona adorahi momokani, bona Iehova ena heduru totona idia noinoi: “Ai ese emai tadikaka, Beniamina taudia tuari henia totona do ai giroa lou, a?”+ Unai neganai Iehova ia gwau: “Umui lao, idia umui tuari henia.”
24 Vadaeni dina iharuana ai, Israela taudia be Beniamina taudia kahirakahira idia lao.
25 Beniamina taudia danu be unai dina iharuana ai Gibea amo idia raka-lasi Israela taudia idia tuari henia totona, bona idia alaia mase Israela taudia mai edia tuari kaia ibounai be 18,000.+
26 Bena Israela tatau be Betele dekenai idia daekau lao. Idia taitai bona Iehova vairanai idia helai,+ bona unai dina ai idia aniani lasi*+ ela bona adorahi momokani bona gabua bouboudia+ bona maino karaia bouboudia+ be Iehova vairanai idia henia.
27 Unai murinai Israela tatau be Iehova idia noinoi henia,+ badina unai nega ai, Dirava momokani ena Taravatu Maua be Betele dekenai ia noho.
28 Unai nega ai, Eleasara ena natuna Pineha,+ Arona ena tubuna unai, be Taravatu Maua vairanai hesiai gaukara ia karaia. Idia henanadai: “Ai ese emai tadikaka, Beniamina taudia tuari henia totona do ai giroa lou eiava lasi?”+ Iehova ia haere: “Umui daekau lao, badina kerukeru lau ese idia be emui imana dekenai do lau atoa.”
29 Bena Israela taudia ese tatau haida idia siaia,+ Gibea idia hagegea bena idia hunia bona naria.
30 Dina ihatoina ai, Israela taudia be Beniamina taudia tuari henia totona idia daekau lao, bona Gibea dekenai tuari totona idia gini hegaegae, guna idia karaia bamona.+
31 Beniamina taudia idia raka-lasi, Israela taudia idia tuari henia totona, unai neganai Israela taudia ese idia be siti amo idia hakaua siri.+ Bona guna idia karaia bamona, tatau haida idia heai henia matamaia bona dala badadia dekenai idia alaia mase, unai dala badana ta be Betele dekenai ia daekau lao bona ma ta be Gibea dekenai ia lao, bona unuseniai Israela tatau 30 bamona be idia alaia mase bona idia rakatanidia.+
32 Bena Beniamina taudia idia gwau: “Ita ese idia ita halusia noho, guna bamona.”+ To Israela taudia idia gwau: “Ita be do ita heau bona idia be iseda murinai do idia mai bona siti amo do idia siri, bona dala badadia dekenai do idia lao.”
33 Vadaeni Israela tatau ibounai be edia gabu ta ta amo idia toreisi bona Bala-tamara dekenai tuari totona idia gini hegaegae, to Gibea ai idia hunia bona naria Israela taudia be edia hunia gabudia amo idia toreisi bona idia raka-lasi.
34 Israela taudia ibounai amo idia abia hidi tatau 10,000 be Gibea siti ena vairanai idia lao, bona tuari be ia bada momokani. To Beniamina taudia be idia diba lasi idia be kahirakahira dika bada do idia davaria.
35 Vadaeni Israela taudia edia vairanai Iehova ese Beniamina taudia ia halusia,+ bona unai dina ai Israela taudia ese idia alaia mase Beniamina tatau ibounai mai edia tuari kaia be 25,100.+
36 To, Israela taudia be Beniamina taudia amo idia heau neganai, Beniamina taudia idia laloa Israela taudia do idia lusi,+ to idia heau badina idia ese Gibea amo idia hunia taudia idia abidadama henia.+
37 Idia hunia taudia be karaharaga Gibea dekenai idia heau lao. Bena idia be unai siti ena kahana ibounai dekenai idia lao bona siti taudia ibounai be tuari kaia amo idia alaia mase.
38 Vadaeni Israela tatau ese palani idia karaia, siti idia abia tatau ese lahi ena kwalahu amo toa ta do idia hahedinaraia.
39 Idia tuari noho Israela taudia idia heau neganai, Beniamina taudia ese idia tuari henia matamaia bona Israela tatau 30 bamona idia alaia mase,+ bona idia gwau: “Idia be ita vairanai do idia lusi lou, tuari ginigunadia hegeregerena.”+
40 To siti amo kwalahu bada ia daekau matamaia. Beniamina taudia idia giroa neganai, idia itaia siti ibounai amo kwalahu bada ia daekau noho.
41 Bena Israela tatau idia giroa bona Beniamina taudia idia vaira henia, bona Beniamina taudia idia gari bada, badina idia itaia idia be dika bada idia davaria.
42 Vadaeni idia be Israela tatau amo idia heau bona taunimanima lasi gabuna dekenai idia lao, to Israela tatau ese idia lulua lao, bona siti amo idia raka-lasi tatau ese idia bamoa bona Beniamina taudia idia alaia mase.
43 Idia ese Beniamina taudia be kahana ibounai amo idia koua bona idia lulua lao noho, idia laga-ani lasi. Bona Gibea ena vairanai idia hamasea, unai be ist kahana ai.
44 Dokonai Beniamina tatau 18,000 idia alaia mase, idia ibounai be tuari taudia goadadia.+
45 Beniamina tatau oredia idia giroa bona taunimanima lasi gabuna idia heau lao, Rimono ai ia noho nadi badana dekenai,+ bona Israela taudia ese idia 5,000 be dala badadia dekenai idia alaia mase, bona idia lulua noho ela bona Gidomo, bona unuseniai tatau ma 2,000 idia alaia mase.
46 Unai dina ai idia mase Beniamina tatau ibounai mai edia tuari kaia be 25,000,+ idia be tuari tatau goadadia.
47 To tatau 600 be taunimanima lasi gabuna dekenai idia heau lao, Rimono ena nadi badana dekenai, bona hua 4 unuseni idia noho.
48 Bona Israela tatau idia giroa bona Beniamina taudia idia tuari henia bona siti ai idia noho taudia bona animal ibounai be tuari kaia amo idia alaia mase. Bona idia hanaia siti ibounai danu be lahi amo idia gabua.
Futnout
^ Eiava reana, “tano biagudia.”
^ Heb., “tau tamona bamona.”
^ Heb., “Idia ese vilipopo amo nadi idia negea neganai, huina tamona idia botaia diba.”
