Hahemaoro Taudia 21:1-25
-
Beniamina iduhu idia hamauria (1-25)
21 Israela taudia be Misipa dekenai inai gwauhamata metauna idia karaia:+ “Ai ta ese emai natudia kekeni ta be Beniamina tauna ta dekenai do ai henia lasi, ia adavaia totona.”+
2 Unai dainai, Israela taudia be Betele dekenai idia mai+ bona Dirava momokani vairanai idia helai ela bona adorahi momokani, idia taitai bada noho.
3 Bona idia hereva noho, idia gwau: “Iehova, Israela ena Dirava e, dahaka dainai inai be Israela dekenai ia vara? Dahaka dainai hari Israela dekenai iduhu ta ia boio?”
4 Bona murina dinana ai, Israela taudia be daba momokani idia toreisi bona boubou patana ta idia haginia, gabua bouboudia bona maino karaia bouboudia idia henia totona.+
5 Bena Israela taudia idia gwau: “Iduhu ibounai amo edena iduhu ia daekau lasi Iehova vairanai ia hebou totona?” Badina idia be gwauhamata metauna idia karaia vadaeni, Misipa ai Iehova dekenai ia daekau lao lasi tauna do idia hamasea.
6 Vadaeni Israela taudia be edia varavara Beniamina taudia dekenai ia vara karana dainai idia lalohisihisi. Idia gwau: “Hari dina Israela dekenai iduhu ta ia boio.
7 Dahaka do ita karaia idia do noho tatau dekenai hahine ita henia totona? Badina ita be Iehova vairanai ita gwauhamata vadaeni,+ iseda natudia kekeni be idia dekenai do ita henia lasi idia adavaia totona.”+
8 Idia henanadai: “Edena iduhu be Misipa ai Iehova dekenai ia daekau lao lasi?”+ Vadaeni idia itaia, Iabese-gileada tauna ta be edia kamepa dekenai ia daekau mai lasi, unai hebou totona.
9 Taunimanima idia duahia neganai, idia itaia Iabese-gileada tauna ta be unuseni ia noho lasi.
10 Vadaeni Israela taudia ese tatau goadadia 12,000 be unuseniai idia siaia. Idia oda henidia: “Umui lao bona emui tuari kaia amo Iabese-gileada ai idia noho taudia umui aladia mase, hahine bona natudia danu.+
11 Namona be inai umui karaia: Tatau ibounai, bona tau ida idia mahuta hebou vadaeni hahine ibounai umui hadikaia ore.
12 Iabese-gileada ai idia noho taudia huana amo, rami-hebou kekeni 400 idia davaria, idia be tatau ida idia do mahuta hebou lasi. Vadaeni Silo ai ia noho kamepa dekenai idia hakaudia mai,+ unai be Kanana tano ai.
13 Bena Israela taudia ibounai ese Beniamina taudia dekenai hereva idia siaia, unai be Rimono ena nadi badana dekenai,+ bona idia hamaorodia do idia tuari lou lasi.
14 Vadaeni Beniamina taudia be unai nega ai edia tano dekenai idia giroa lou. Bona idia dekenai Iabese-gileada amo idia hamauria hahine idia henidia,+ to unai hahine be momo lasi idia ibounai totona.
15 Bona Israela taudia be Beniamina taudia dekenai ia vara karana dainai idia lalohisihisi,+ badina Iehova ese idia be Israela iduhu ma haida amo ia hapararaia.
16 Israela taudia edia tau badadia idia gwau: “Dahaka do ita karaia idia do noho tatau dekenai hahine ita henia totona? Badina Beniamina hahine ibounai idia mase vadaeni.”
17 Idia haere: “Beniamina iduhu amo idia roho mauri tatau totona ahuna ia noho be namo, unai amo iduhu ta be Israela amo do ia boio lasi.
18 To ita be maoro lasi idia dekenai iseda natudia kekeni ita henia, idia adavaia totona, badina Israela taudia be inai gwauhamata idia karaia vadaeni: ‘Beniamina tauna dekenai hahine ta ia henia tauna be dika do ia davaria.’”+
19 Bena idia gwau: “Silo dekenai lagani ta ta ai Iehova totona aria idia karaia.+ Unai siti be Betele ena not kahanai ia noho, bona ia be Betele amo ia daekau lao dala badana ena ist kahanai, unai dala badana be Sekema bona Lebona ena saut kahana dekenai ia lao.”
20 Vadaeni Beniamina tatau idia oda henia, idia gwau: “Umui lao bona vain umadia dekenai umui hunia bona naria.
21 Bona bema umui itaia Silo siti kekeni matamatadia be mavaru* totona idia raka-lasi, namona be umui ta ta be vain umadia amo umui raka-lasi bona unai Silo kekeni matamatadia umui rosia bona emui hahine bamona umui abidia, bona Beniamina tano dekenai umui giroa lou.
22 Bona edia tamadia eiava tadikakadia idia mai bona ai dekenai idia maumau neganai, idia do ai hamaoroa, ‘Namona be idia dainai ai umui hebogahisi henia, badina tuari amo idia ta ta totona ai abia hahine be hegeregere lasi,+ bona umui ese idia dekenai hahine ta umui henia lasi, badina umui laloa ita ibounai ese ita karaia gwauhamata do umui makohia bona do umui kerere.’”+
23 Vadaeni Beniamina tatau be unai bamona idia karaia, bona idia ese idia mavaru hahine huana amo hahine ta ta idia huaia oho. Unai murinai edia tano dekenai idia giroa bona edia siti idia haginidia lou+ bona unuseniai idia noho.
24 Unai nega ai Israela taudia be unai gabu idia rakatania bona idia ta ta be edia iduhu bona ruma bese dekenai idia giroa lou, oibe, unai gabu idia rakatania bona edia tano dekenai idia giroa lou.
25 Unai nega lalodiai, Israela dekenai king ta be lasi.+ Idia ta ta be sibodia edia ura idia badinaia.*
Futnout
^ Heb., “sekol dekenai idia mavaru.”
^ Eiava “ia laloa hegeregerena dahaka be maoro ia karaia sibona.”
