Hahemaoro Taudia 4:1-24
4 To Ehuda ia mase murinai, Israela taudia be Iehova ena vairanai kara dika idia karaia lou.+
2 Unai dainai Iehova ese idia be Kanana ena king, Iabina dekenai ia hoihoilaia,+ ia be Hasoro dekenai ia lohia. Iena tuari orea edia biaguna be Sisera, ia be Haroseta-goimi dekenai ia noho.+
3 Israela taudia be Iehova dekenai idia noinoi,+ badina Iabina ena tuari kariota 900 edia wili be mai edia tuari kaia,*+ bona lagani 20 lalonai ia ese Israela taudia ia hahisia bada.+
4 Vadaeni peroveta hahine, Debora,+ Lapidoto ena adavana unai, be unai nega ai Israela ai hahemaoro gaukara ia karaia.
5 Ia be Debora ena pama au henunai ia helai, unai be Rama+ bona Betele+ huanai ia noho, Eparaima ena ororo gabudiai. Israela taudia be ia dekenai idia daekau lao, Dirava ena hahemaoro herevadia idia kamonai totona.
6 Ia ese Baraki totona hereva ia siaia,+ ia be Kedesi-napatali tauna Abinaomi ena natuna,+ bona ia dekenai ia gwau: “Iehova, Israela ena Dirava ese oi dekenai inai oda ia henia: ‘Napatali iduhu bona Sebuluno iduhu amo tatau 10,000 oi abia bona Taboro Ororo dekenai umui lao.
7 Lau ese Sisera, Iabina ena tuari orea ena biaguna unai, bona iena tuari kariota bona iena tuari taudia danu be oi dekenai do lau abia mai, Kisona ororo amo ia aru diho sinavai dekenai,+ bona ia be emu imana dekenai do lau atoa.’”+
8 Unai neganai Baraki be Debora dekenai ia gwau: “Bema oi be lau ida oi lao, do lau lao, to bema oi be lau ida oi lao lasi, do lau lao lasi.”
9 Bena Debora ia gwau: “Lau be oi ida do lau lao. To, inai laolao lalonai oi ese hanamoa do oi abia lasi, badina Iehova ese hahine ta ena imana ai Sisera do ia atoa.”+ Vadaeni Debora be Baraki ida Kedesi dekenai idia lao.+
10 Baraki ese Sebuluno iduhu bona Napatali iduhu taudia+ be Kedesi dekenai ia boiria, bona tatau 10,000 be iena murinai idia lao. Debora danu be ia ida ia lao.
11 Unai nega ai, Kene tauna Hebere be Kene taudia ia rakatania,+ bona ena palai ruma be Sananima ena au badana kahirakahira ia haginia, unai be Kedesi ai. Kene taudia be Mose ena ravana, Hobaba, ena bese taudia.+
12 Haida ese Sisera idia hamaoroa, Abinaomi ena natuna Baraki be Taboro Ororo dekenai ia daekau lao.+
13 Vadaeni maoromaoro Sisera ese ena tuari kariota 900, edia wili be mai edia tuari kaia,* bona ia ida idia noho tuari taudia ibounai ia haboua, bona Haroseta-goimi amo Kisona ororo amo ia aru diho sinavai dekenai idia lao.+
14 Vadaeni Debora be Baraki dekenai ia gwau: “Oi toreisi, badina hari dina Iehova ese Sisera be emu imana dekenai do ia atoa. Iehova be emu vairanai do ia lao.” Bona Baraki be Taboro Ororo amo ia diho, bona tatau 10,000 be iena murinai idia lao.
15 Bena Iehova ese Sisera bona ena tuari kariota bona ena tuari taudia dekenai daradara ia havaraia+ bena Baraki ena tuari kaia amo idia ia hamasea ore. Dokonai, Sisera be ena kariota amo ia diho bona ia heau.
16 Baraki ese tuari kariota bona tuari taudia ia lulua lao ela bona Haroseta-goimi dekenai. Vadaeni Sisera ena tuari taudia ibounai be tuari kaia amo idia mase, idia ta ia mauri lasi.+
17 To Sisera be Kene tauna Hebere+ ena adavana, Iaele,+ ena palai ruma dekenai ia heau lao, badina Hasoro ena king Iabina+ bona Hebere ena bese taudia huanai maino ia noho.
18 Bena Iaele ia raka-lasi Sisera ia hedavari henia bona ia dekenai ia gwau: “Oi vareai egu lohia, oi vareai. Oi gari lasi.” Vadaeni Sisera be palai ruma lalonai ia vareai, bona Iaela ese blanketi amo ia koua.
19 Bena Iaele dekenai ia gwau: “Mani lau dekenai ranu sisina oi henia lau inua totona, badina lau ranu mase.” Vadaeni Iaele ese milika puse ia kehoa bona ia dekenai ia henia bona ia inua,+ unai murinai blanketi amo ia koua lou.
20 Iaele dekenai ia gwau: “Palai ruma ena vareai gabunai oi gini, bona bema ta ia mai bona oi ia nanadaia, ‘Tau ta be iniseni ia noho, a?’ Do oi gwau, ‘Lasi!’”
21 To Hebere ena adavana, Iaele, ese palai ena ikoko bona hama ia abia. Bena Sisera ia hesiku bona ia mahuta mase lalonai, Iaele be metairametaira ia lao bona Sisera ena kwarana dekenai ikoko ia kokoa vareai ela bona tano lalonai ia vareai, bona ia mase.+
22 Baraki be unuseni ia lao Sisera ia tahua totona, bona Iaele be palai ruma amo ia raka-lasi bona ia hedavari henia, bona ia gwau: “Oi mai bona oi tahua tauna be oi dekenai do lau hahedinaraia.” Ia be Iaele ida ia raka-vareai bona ia itaia Sisera ia hekure noho, ia mase vadaeni, ikoko be ena kwarana dekenai ia noho.
23 Vadaeni unai dina ai, Dirava ese Kanana taudia edia king, Iabina, be Israela taudia edia vairanai ia halusia.+
24 Israela taudia edia goada ia bada ia lao bona idia ese Kanana ena king, Iabina+ idia hadikaia ore.+
