Hahemaoro Taudia 6:1-40
6 To Israela taudia be Iehova ena vairanai idia kara dika lou,+ unai dainai lagani 7 lalonai Iehova ese Midiana taudia edia siahu henunai ia atodia.+
2 Midiana taudia ese Israela taudia idia hahisia matamaia.+ Midiana taudia dainai, Israela taudia be ororo dekenai, kohua lalodiai, bona ta ia lao diba lasi gabudia ai hunia gabudia* idia karaia.+
3 Bema Israela taudia ese uhe idia hadoa, Midiana, Amaleka+ bona Ist taudia+ ese idia tuari henidia.
4 Idia be Israela taudia edia tano ai idia kamepa, bena idia tuari henidia bona edia uma ena anina idia hadikaia ela bona Gasa dekenai, bona gau ta idia rakatania lasi Israela taudia ese idia ania totona. Mamoe eiava boromakau eiava doniki danu idia rakatania lasi.+
5 Badina unai bese taudia be edia animal bona palai rumadia idia abia lao danu, idia be momo herea kwadi bamona,+ bona idia bona edia kamelo be momo herea,+ bona tano hadikaia totona idia lao.
6 Vadaeni Midiana taudia dainai Israela taudia idia ogogami bada. Bona heduru totona Iehova dekenai idia boiboi.+
7 Israela taudia be Iehova idia noia Midiana taudia amo do ia hamauridia neganai,+
8 Iehova ese peroveta tauna ta ia siaia bona idia dekenai ia gwau: “Iehova, Israela ena Dirava, ia gwau, ‘Lau ese umui be Aigupito, umui ia guia tano* amo lau hakaua raka-lasi.+
9 Vadaeni lau ese Aigupito taudia edia imana amo umui lau hamauria, bona umui idia dagedage henia besedia amo danu, bona emui vairana amo idia lau lulua bona edia tano be umui dekenai lau henia.+
10 Bona umui dekenai lau gwau: “Lau be Iehova emui Dirava.+ Namo lasi Amoro taudia edia dirava umui gari henidia, hari umui noholaia tano taudia unai.”+ To lau umui badinaia lasi.’”*+
11 Gabeai Iehova ena aneru ia mai+ bona Opera ai ia noho au badana ta henunai ia helai, unai au badana be Abiesere tauna Ioasa ena.+ Iena natuna Gideona+ be wain karaia gabuna ai witi ia kwadia noho, Midiana taudia amo ia hunia totona.
12 Iehova ena aneru be ia dekenai ia hedinarai bona ia gwau: “Tuari tauna goadana e, Iehova be oi ida.”+
13 Unai neganai Gideona be ia dekenai ia gwau: “Lauegu lohia e, to bema Iehova be ai ida, dahaka dainai inai gaudia ibounai be ai dekenai idia vara?+ Iena hoa karadia ibounai be edeseni? Emai sene taudia ese ai dekenai idia herevalaia karadia unai.+ Idia gwau, ‘Iehova ese Aigupito amo ai ia hakaua raka-lasi.’+ Hari Iehova ese Midiana taudia edia imana dekenai ai ia atoa bona ai ia rakatania vadaeni.”+
14 Iehova be Gideona ia vaira henia bona ia gwau: “Mai goada ida oi lao bona Midiana taudia edia imana amo Israela taudia oi hamauria,+ badina lau ese oi lau siaia.”
15 Gideona ia haere, ia gwau: “Iehova e, Israela taudia be edena bamona do lau hamauria? Itaia, Manase iduhu lalonai egu bese be ladana maragi besena, bona egu tamana ena bese lalonai lau be ladana maragi tauna.”
16 To Iehova be ia dekenai ia gwau; “Lau be oi ida dainai,+ oi ese Midiana taudia do oi halusia, tau tamona oi halusia bamona.”
17 Bena Gideona be ia dekenai ia gwau: “Bema hari lau oi lalonamo henia, vadaeni lau dekenai toa ta oi hahedinaraia, unai amo do lau diba oi be lau oi hereva henia noho.
18 Mani emu kara, inai gabu oi rakatania lasi ela bona egu harihari gauna lau mailaia bona emu vairanai lau atoa.”+ Bena aneru ia gwau: “Lau be iniseni do lau noho ela bona oi giroa mai.”
19 Bona Gideona ia vareai bona nanigosi natuna ta ia hegaegaelaia bona paraoa ifa ta* amo isti lasi paraoa ia karaia.+ Ia ese bosea lalonai vamu ia atoa bona supu be uro lalonai ia bubua. Bena ia dekenai ia abia lao bona au badana henunai ia atoa.
20 Dirava momokani ena aneru be ia dekenai ia gwau: “Vamu bona isti lasi paraoa oi abia bona unai nadi badana latanai oi atoa, bona supu oi bubua.” Bena unai hegeregerena ia karaia.
21 Vadaeni Iehova ena aneru ese itotohi ena dorina amo vamu bona isti lasi paraoa ia dogoatao, bona nadi amo lahi ia daekau bona vamu bona isti lasi paraoa ia gabua ore.+ Bena Iehova ena aneru be Gideona ena vairana amo ia boio.
22 Unai neganai Gideona ia laloparara unai be Iehova ena aneru.+
Vadaeni maoromaoro Gideona ia gwau: “Siahu Ibounai Lohiabadana Iehova e, lau ese Iehova ena aneru be egu matana amo lau itaia!”*+
23 To Iehova be ia dekenai ia gwau: “Maino oi abia. Oi gari lasi,+ oi be do oi mase lasi.”
24 Bena Gideona ese unuseniai Iehova totona boubou patana ta ia haginia, bona ena ladana idia gwauraia Iehova-saloma*+ ema bona hari. Unai boubou patana be Abiesere taudia edia siti, Opera, ai ia do noho.
25 Unai hanuaboi ai Iehova be ia dekenai ia gwau: “Emu tamana ena boromakau natuna iharuana, mauri lagani 7 gauna oi abia, bona emu tamana ena Bala boubou patana oi makohia, bona ia badinai ia gini au helagana* oi utua diho.+
26 Iehova emu Dirava totona, inai nadi badana latanai nadi oi atoa namonamo boubou patana oi karaia totona, unai murinai boromakau natuna iharuana oi abia bona oi utua au helagana* ena au latanai oi atoa, bona gabua boubou totona oi henia.”
27 Vadaeni Gideona ese ena hesiai taudia 10 ia abia bona Iehova ese ia hamaoroa hegeregerena ia karaia. To ia be ena tamana ena bese bona siti taudia dekenai ia gari bada dainai, dina ai unai ia karaia lasi, to hanuaboi ai ia karaia.
28 Siti taudia be daba momokani idia toreisi neganai, idia itaia Bala ena boubou patana be ta ese ia hadikaia, bona ena badinai ia gini au helagana* be ta ese ia utua, bona boubou pata matamata latanai boromakau natuna iharuana idia bouboulaia vadaeni.
29 Idia ta ta idia nanadaia: “Daika ese inai ia karaia?” Unai idia tahua murinai, idia gwau: “Ioasa ena natuna Gideona ese unai ia karaia.”
30 Vadaeni siti taudia be Ioasa dekenai idia gwau: “Emu natuna mero oi abia mai, ia mase be namo, badina ia ese Bala ena boubou patana ia hadikaia bona ena badinai ia noho au helagana* ia utua.”
31 Bena Ioasa+ be idia dekenai ia gwau: “Umui ura Bala umui durua, a? Ia do umui hamauria, a? Bala ia durua tauna be hari daba ai idia hamasea be namo.+ Bema Bala be dirava ta, ia sibona ia durua be namo,+ badina ta ese ena boubou patana ia hadikaia.”
32 Bona unai dina ai Gideona ena ladana ia hatoa Ierububala,* ia gwau: “Bala be sibona ia durua be namo, badina ta ese ena boubou patana ia makohia.”
33 Midiana,+ Amaleka,+ bona Ist taudia edia tuari taudia idia haboua,+ bona Ieserele Koura dekenai idia hanaia lao* bona unuseniai idia kamepa.
34 Bena Iehova ena lauma be Gideona latanai ia diho,+ bona ia ese kibi ia hiriria,+ bona Abiesere taudia+ idia haboua ia idia durua totona.
35 Ia ese Manase taudia ibounai boiria totona gwaukau taudia ia siaia, bena idia danu idia haboua ia idia durua totona. Danu ia ese Asere taudia, Sebuluno taudia, bona Napatali taudia dekenai gwaukau taudia ia siaia lao, bena idia daekau mai ia idia hedavari henia totona.
36 Bena Gideona be Dirava momokani dekenai ia gwau: “Bema oi ese lau amo Israela taudia oi hamauria, oi gwauhamata hegeregerena,+
37 vadaeni lau dekenai toa ta oi hahedinaraia, ‘Lau ese wulu be witi kwadia gabuna ai do lau atoa. Bema daba paripari ese wulu ia haparia, to ena badina tano be ia kaukau, vadaeni do lau diba oi ese lau amo Israela taudia do oi hamauria, oi gwauhamata hegeregerena.”
38 Bona unai hegeregerena ia vara. Murina dinana ai daba momokani ia toreisi bona wulu ia gigia neganai, ranu bada ia diho bona hodu badana ta ia honu.
39 To, Gideona be Dirava momokani dekenai ia gwau: “Mani lau dekenai oi badu lasi, to oi dekenai noinoi herevana ma ta lau gwauraia. Mani, inai wulu lau gaukaralaia lou, unai amo do lau diba oi be lau ida. Mani wulu sibona ia kaukau, to ena badina tano ibounai do ia paripari.”
40 Vadaeni unai hanuaboi ai Dirava be unai bamona ia karaia. Wulu sibona ia kaukau, to tano ibounai be ia paripari.
Futnout
^ Eiava reana, “tano henunai kohu haboua gabudia.”
^ Heb., “igui hesiai gaukara karaia rumana.”
^ Heb., “egu gadona umui kamonai lasi.”
^ Heb., “Iehova ena aneru ena vairana lau itaia!”
^ Anina be “Iehova be Maino.”
^ Anina be “Kota ai Bala be Sibona Gimaia Totona Ia Hereva (Hepapahuahu).”
^ Eiava “sinavai idia hanaia.”
