Hahemaoro Taudia 7:1-25
7 Bena Ierububala, unai be Gideona,+ bona ia ida idia lao tuari taudia ibounai be daba momokani idia toreisi, bona Haroda Ena Ranu Lohilohi badinai idia kamepa, to Midiana taudia edia kamepa be ena not kahanai ia noho, unai be More ena ororo maragina ena koura ai.
2 Vadaeni Iehova be Gideona dekenai ia gwau: “Oi ida idia noho tuari taudia be momo herea dainai, edia imana dekenai Midiana taudia do lau atoa lasi.+ Dika Israela ia hekokoroku bona lau dekenai ia gwau, ‘Lau sibona egu imana amo lau kwalimu.’+
3 Mani tuari taudia ibounai dekenai inai hadibaia hereva oi gwauraia: ‘Bema ta ia gari bona ia heudeheude, ena ruma dekenai ia giroa lou be namo.’”+ Vadaeni Gideona ese idia ia tohoa. Unai neganai, tuari taudia 22,000 be edia ruma dekenai idia giroa lou, bona 10,000 idia noho.
4 Iehova be Gideona dekenai ma ia gwau: “Tuari taudia be do momo herea. Idia oi hamaoroa sinavai maragina dekenai do idia diho lao, bona unuseniai oi totona idia do lau tohoa. Bema oi dekenai lau gwau, ‘Inai tauna be oi ida do ia lao,’ ia be oi ida do ia lao, to bema lau gwau, ‘Inai tauna be oi ida do ia lao lasi,’ ia be oi ida do ia lao lasi.”
5 Vadaeni ia ese sinavai maragina dekenai tuari taudia ia hakaua lao.
Bena Iehova be Gideona dekenai ia gwau: “Imana amo ranu idia abia isi bona idia inua haragaharaga, sisia be ranu ia inua haragaharaga bamona, unai taudia bona idia tui diho bona ranu idia inua taudia do oi hapararaia.”
6 Imana amo ranu idia abia isi bona idia inua haragaharaga tatau ibounai be 300. To tuari taudia oredia be idia tui diho ranu idia inua totona.
7 Bena Iehova be Gideona dekenai ia gwau: “Lau ese oi bona tatau 300, edia imana amo ranu idia inua haragaharaga tatau unai, do lau hamauria bona Midiana taudia be emu imana dekenai do lau atoa.+ To tuari taudia ma haida oi siaia giroa be namo.”
8 Vadaeni idia ese unai tuari taudia amo aniani bona kibi idia abia murinai, Gideona ese Israela tatau oredia ibounai ia siaia giroa, bona tatau 300 sibona idia noho. Gideona ena kamepa be ataiai ia noho, bona Midiana taudia edia kamepa be henunai, unai be koura ai.+
9 Unai hanuaboi ai, Iehova be ia dekenai ia gwau: “Oi toreisi, kamepa dekenai oi lao bona idia oi tuari henia, badina idia be emu imana dekenai lau atoa vadaeni.+
10 To bema idia tuari henia totona oi gari, emu hesiai tauna Pura ida edia kamepa dekenai umui lao.
11 Bona idia herevalaia gaudia oi kamonai, unai murinai goada do oi abia* idia oi tuari henia totona.” Vadaeni ia bona ena hesiai tauna Pura be edia inai taudia edia tuari kamepa kahirakahira dekenai idia lao.
12 Vadaeni Midiana, Amaleka, bona Ist taudia ibounai+ ese koura ena kahana ibounai idia koua, kwadi oreana bamona, bona edia kamelo be momo herea,+ kone ena miri bamona.
13 Vadaeni Gideona ia ginidae, bona tau ta be ena turana dekenai nihi ta ia gwauraia, ia gwau: “Lau nihi gauna be inai: Bali amo idia karaia paraoa kuboruna ta be ia diho lao ela bona Midiana taudia edia kamepa lalonai ia vareai, bena palai ruma ta ia botaia auka bona unai palai ruma ia moru.+ Oibe, unai palai ruma ia hagiroa, bona tano dekenai ia moru.”
14 Vadaeni ena turana ia gwau: “Inai be Israela tauna Ioasa ena natuna, Gideona, ena tuari kaia.+ Dirava ese Midiana bona ena tuari taudia ibounai be iena imana dekenai ia atoa.”+
15 Gideona ese unai nihi bona ena anina ia kamonai murinai,+ ia tui diho bona Dirava ia tomadiho henia. Unai murinai Israela taudia edia kamepa dekenai ia giroa lou bona ia gwau: “Umui toreisi, badina Iehova ese Midiana ena kamepa be emui imana dekenai ia atoa vadaeni.”
16 Bena ia ese unai tatau 300 be orea toi dekenai ia haria, bona idia ibounai dekenai kibi+ bona hodu badadia ia henia, unai hodu ta ta lalonai diari gaudia idia noho.
17 Bena idia dekenai ia gwau: “Lau do umui itaia bona lau karaia hegeregerena do umui karaia. Kamepa kahirakahira lau lao neganai, lau karaia hegeregerena umui karaia be namo.
18 Lau bona lau ida idia noho taudia ese kibi ai hiriria neganai, umui danu ese kamepa ena hetoa gabu ibounai dekenai kibi do umui hiriria bona umui boiboi, ‘Iehova ena tuari kaia bona Gideona ena.’”
19 Hanuaboi momokani ai,* Gideona bona ia ida idia noho tatau 100 be kamepa kahirakahira idia lao, unai nega ai gima taudia matamatadia ese gunadia edia gabu idia abia. Bena idia ese kibi idia hiriria+ bona edia imana ai idia noho ranu hodu badadia idia makohia.+
20 Vadaeni orea toi ese kibi idia hiriria bona hodu badadia idia makohia. Edia imana laurina ai diari gaudia idia dogoatao bona edia imana idibana ai kibi idia hiriria bona idia boiboi: “Iehova ena tuari kaia bona Gideona ena!”
21 Kamepa idia gini hagegea tatau ta ta be edia gabu ai idia gini noho, bona Midiana tuari taudia ibounai be idia heau boio, mai boiboi danu.+
22 Unai tatau 300 be kibi idia hiriria noho, bona Iehova ese Midiana taudia ta ta edia tuari kaia ia hagiroa bona sibodia idia tuari henia matamaia,+ kamepa ena gabu ibounai lalonai. Bona tuari taudia idia heau lao ela bona Bete-sita, bena idia lao Serere, ela bona Abele-mehola+ ena boda, unai be Tabata kahirakahira.
23 Bona Napatali, Asere, bona Manase ibounai amo Israela tatau idia haboua,+ bona idia ese Midiana taudia idia lulua lao.
24 Gideona ese Eparaima ena ororo gabudia ibounai dekenai gwaukau taudia ia siaia lao, ia gwau: “Midiana taudia tuari henia totona umui diho lao, Bete-bara bona Ioridane Sinavai dekenai do umui lao guna, bona tatau haida be unuseniai do idia noho, unai amo Midiana taudia be sinavai do idia hanaia lasi.” Vadaeni Eparaima ena tatau ibounai idia haboua, bena idia lao bona ranu gabudia idia koua, unai be Bete-bara amo ela bona Ioridane ai.
25 Danu, idia ese Midiana ena lohia taudia rua, Oreba bona Sebe, idia abia mauri. Bena Oreba be Oreba ena nadi badana dekenai idia hamasea,+ bona Sebe be Sebe ena vain huahua moia gabuna ai idia hamasea. Idia ese Midiana taudia idia lulua noho,+ bona Oreba bona Sebe edia kwarana be Gideona dekenai idia abia lao, unai be Ioridane kahirakahira ai.
