Hahemaoro Taudia 9:1-57
9 Ierububala ena natuna, Abimeleka,+ be ena sinana ena tadikakadia dekenai ia lao, unai be Sekema ai, bona idia bona ena tubuna tauna ena bese taudia* ibounai dekenai ia gwau:
2 “Mani Sekema ena gunalaia taudia* ibounai umui nanadaia, ‘Edena be namo umui totona, Ierububala ena natudia memero ibounai 70+ ese umui do idia lohiaia eiava tau tamona ese umui do ia lohiaia? Bona laloatao, lau be emui rara tamona tauna.’”
3 Bena ena sinana ena tadikakadia be ia totona Sekema ena gunalaia taudia ibounai dekenai unai hereva idia gwauraia, bona edia kudouna ese idia ia veria Abimeleka idia badinaia, badina idia gwau: “Ia be iseda tadikaka korikorina.”
4 Bena Bala-beriti ena dubu amo Abimeleka dekenai siliva moni 70 idia henia,+ bona ia ese unai moni ia gaukaralaia, idia noho kava bona kwara auka tatau ia hoia, ia idia bamoa totona.
5 Unai murinai ia be ena tamana ena ruma dekenai ia lao, unai be Opera ai,+ bona ena tadikakadia, Ierububala ena natudia memero 70 unai, be nadi tamona latanai ia aladia mase.+ To Ierububala ena natuna ginigabena Iotama sibona ia mauri, badina ia komu.
6 Bena Sekema bona Bete-milo ena gunalaia taudia ibounai be au badana kahirakahira idia haboua bona Abimeleka be king ai idia halaoa,+ unai be Sekema ai ia noho nadi du badinai.
7 Iotama dekenai unai sivarai idia gwauraia neganai, ia be maoromaoro ia lao bona Gerisima Ororo ena ataiai ia gini+ bona idia dekenai ia boiboi badabada, ia gwau: “Sekema ena gunalaia taudia e, lau umui kamonai henia, bena Dirava ese umui do ia kamonai henia.
8 “Nega ta au haida idia lao bona king ta idia horoa idia ia lohiaia totona. Vadaeni olive au dekenai idia gwau, ‘Ai oi lohiaia.’+
9 To olive auna be idia dekenai ia gwau, ‘Lau ese egu dehoro, Dirava bona taunimanima hanamoa totona idia gaukaralaia gauna unai, do lau havaraia lasi, to au ma haida do lau lohiaia, a?
10 Bena unai au haida be fig auna dekenai idia gwau, ‘Oi mai bona ai oi lohiaia.’
11 To fig auna be idia dekenai ia gwau, ‘Lau ese egu huahua mai digarana bona namona do lau havaraia lasi, to au ma haida do lau lohiaia, a?’
12 Gabeai unai au haida be vain auna dekenai idia gwau, ‘Oi mai bona ai oi lohiaia.’
13 Vain auna be idia dekenai ia gwau, ‘Lau ese egu wain matamata, Dirava bona taunimanima ia hamoalea gauna unai, do lau havaraia lasi, to au ma haida do lau lohiaia, a?’
14 Dokonai, unai au haida be au ginigini dekenai idia gwau, ‘Oi mai bona ai oi lohiaia.’+
15 Unai neganai au ginigini be unai au haida dekenai ia gwau, ‘Bema umui be momokani lau umui abia hidi emui king ai lau lao totona, vadaeni umui mai bona egu ikerukeruna ai umui hunia. To bema lasi, au ginigini amo lahi do ia raka-lasi bona Lebanona ena sida audia do ia araia ore.’
16 “Umui be mai momokani ida umui kara bona kara maorona umui karaia Abimeleka be king ai umui halaoa totona, a?+ Bona Ierububala bona ena ruma bese dekenai kara namo umui hahedinaraia, bona mai hemataurai ida ia umui kara henia, a?
17 Egu tamana be umui totona ia tuari neganai,+ kahirakahira ena mauri ia haboioa, Midiana taudia amo umui ia hamauria totona.+
18 To hari, umui toreisi bona egu tamana ena ruma bese umui tuari henia bona ena natudia memero 70 be nadi tamona latanai umui alaia mase.+ Bena umui ese Abimeleka, egu tamana ena igui hesiai kekeni ena natuna unai,+ be Sekema ena gunalaia taudia edia king ai umui halaoa, badina ia be emui tadikaka.
19 Oibe, bema hari dina umui be mai momokani bona mai kara maoromaoro ida Ierububala bona ena ruma bese taudia umui kara henia, namona be Abimeleka totona umui moale bona ia danu be umui totona do ia moale.
20 To bema lasi, Abimeleka amo lahi do ia raka-lasi bona Sekema bona Bete-milo ena gunalaia taudia do ia araia ore,+ bona Sekema bona Bete-milo ena gunalaia taudia amo lahi do ia raka-lasi bona Abimeleka do ia araia ore.”+
21 Bena Iotama+ be Bere dekenai ia heau lao bona unuseniai ia noho, badina ia be ena tadikaka Abimeleka dekenai ia gari.
22 Abimeleka be lagani toi lalonai Israela taudia ia lohiaia.*
23 Bena Dirava ese Abimeleka bona Sekema ena gunalaia taudia huanai ia vara badu karana ia koua lasi, bona idia be mai koikoi ida Abimeleka idia kara henia.
24 Unai amo Dirava ese Ierububala ena natudia memero 70 edia mase ena davana ia haloua diba, bona unai amo edia rara ena metau be edia tadikaka Abimeleka latanai ia noho+ bona Sekema ena gunalaia taudia edia latanai danu, badina idia ese ia idia durua iena tadikaka idia alaia.
25 Vadaeni Sekema ena gunalaia taudia ese tatau haida idia siaia, ororo ataiai idia hunia bona idia naria Abimeleka hamasea totona, bona dala amo idia raka hanaia taudia ibounai edia kohu idia henaoa. Gabeai haida ese unai sivarai be Abimeleka dekenai idia gwauraia.
26 Bena Ebedi ena natuna Gala bona ena tadikaka be Sekema dekenai idia lao,+ bona Sekema ena gunalaia taudia be ia idia abidadama henia matamaia.
27 Idia be edia vain uma dekenai idia lao bona greips idia haboudia, idia moidia, bona aria ta idia karaia, unai murinai edia dirava ena dubu lalonai idia vareai+ bona idia aniani bona idia inuinu bona Abimeleka idia gwauraia dika.
28 Bena Ebedi ena natuna Gala ia gwau: “Abimeleka be daika, bona Sekema be daika, bona idia do ita hesiai henia? Ia be Ierububala ena natuna+ bona ena tuari biaguna be Sebulu, ani? Hamoro ena natudia ita hesiai henia, Sekema ena tamana unai! To dahaka dainai Abimeleka ita hesiai henia?
29 Bema inai taunimanima be egu murinai idia raka, lau ese Abimeleka be ena dagi amo do lau kokia.” Bena Abimeleka ia hevasehalaia ia gwau: “Emu tuari oreana oi habadaia bona oi mai.”
30 Siti ena lohia tauna Sebulu ese Ebedi ena natuna Gala ena hereva ia kamonai neganai, ia badu dikadika.
31 Bena ia ese hehuni* dalana ai gwaukau taudia be Abimeleka dekenai ia siaia, ia gwau: “Itaia, Ebedi ena natuna Gala bona ena tadikaka be Sekema dekenai, bona siti taudia edia lalona idia veria oi idia tuari henia totona.
32 Hanuaboi ai do umui daekau mai, oi bona emu tuari tatau, bona siti murimurina ai do umui hunia bona naria.
33 Bena daba ai dina ia daekau neganai, namona be umui toreisi bona siti taudia umui tuari henia. Bona Gala bona ena tuari taudia be umui tuari henia totona idia mai neganai, namona be gau ibounai umui karaia ia umui halusia totona.”
34 Vadaeni Abimeleka bona ia idia bamoa taudia ibounai be hanuaboi ai idia toreisi, bona tuari orea 4 dekenai Sekema ena murimuri ai idia hunia.
35 Murina dinana ai Ebedi ena natuna Gala ia lao bona siti ena geiti ena vareai gabuna ai ia gini neganai, Abimeleka bona ia idia bamoa taudia be edia hunia gabuna amo idia toreisi.
36 Gala ese taunimanima ia itaia neganai, Sebulu dekenai ia gwau: “Itaia, taunimanima be ororo ataiai amo idia diho mai noho.” To Sebulu be ia dekenai ia gwau: “Oi be ororo edia laulau oi itaia, toana be taunimanima bamona.”
37 Gala ia gwau: “Itaia, taunimanima be inai gabu ena ororo badana amo idia diho mai noho, bona tuari orea ta be Meoneni ena au badana ena dala amo ia mai noho.”
38 Sebulu be ia dekenai ia gwau: “Emu hekokoroku herevana oi laloaboio, a? Oi gwau, ‘Abimeleka be daika bona ia do ita hesiai henia?’+ Inai be oi dadaraia taudia, ani? Vadaeni, oi lao bona idia oi tuari henia.”
39 Bena Gala be Sekema ena gunalaia taudia ia hakaua lao bona Abimeleka idia tuari henia.
40 Abimeleka ese Gala ia lulua, bona Gala be ia amo ia heau, bona momo idia hamasea ela bona siti ena geiti ena vareai gabuna ai.
41 Bona Abimeleka be Aruma dekenai ia giroa lou bona unuseniai ia noho, bona Sebulu+ ese Gala bona ena tadikakadia be Sekema amo ia luludia lao.
42 Murina dinana ai taunimanima be siti murimuri dekenai idia lao, bona haida ese unai sivarai be Abimeleka dekenai idia gwauraia.
43 Bena ia ese taunimanima be tuari orea toi dekenai ia haria bona siti murimuri ai idia hunia bona naria. Bona ia itaia taunimanima be siti murimuri ai idia raka-lasi neganai, idia ia tuari henia bona ia hamasea.
44 Abimeleka bona ena tuari oreadia idia lao bona siti ena geiti ena vareai gabuna ai idia gini, to tuari oreadia rua be siti murimuri ai idia lao taudia idia tuari henia noho bona idia hamasedia.
45 Unai dina ibounai lalonai Abimeleka be siti taudia ia tuari henia bona siti ia abia. Ia ese siti ai idia noho taudia ia alaia mase, bona siti ia hadikaia+ bona ia latanai damena ia bubua.
46 Sekema ena kohoro gunalaia taudia ibounai ese unai idia kamonai neganai, maoromaoro El-beriti ena dubu dekenai idia lao bona ena daiutu lalonai idia vareai idia hunia totona.+
47 Abimeleka ia kamonai Sekema ena kohoro ena gunalaia taudia ibounai be gabu tamona dekenai idia haboua neganai,
48 ia bona ia ida idia noho tatau ibounai be Salamoni Ororo dekenai idia daekau lao. Bona Abimeleka ese ira ia abia bona au ta ena rigi ia utua oho bena ia abia isi bona ena pagana dekenai ia atoa, bona ia ida idia noho taudia ia hamaoroa: “Lau karaia karana umui itaia vadaeni, umui haraga bona unai bamona umui karaia!”
49 Bena taunimanima ibounai ese rigi idia utua danu bona Abimeleka ena murinai idia raka. Bona unai rigi be idia hunia daiutu ena badinai idia atodia bona unai daiutu be lahi dekenai idia gabua. Vadaeni Sekema ena kohoro lalonai idia noho taudia ibounai idia mase danu, tatau bona hahine 1,000 bamona.
50 Bena Abimeleka be Tebese dekenai ia lao. Ia ese Tebese ia tuari henia bona ia abia.
51 Siti ena huanai be kohoro goadana ta ia gini, bona tatau bona hahine bona siti ena gunalaia taudia ibounai be unuseniai idia heau lao. Bona unai kohoro lalonai idia vareai bona idia koua bena ena ataiai guhi dekenai idia daekau lao.
52 Abimeleka be unai kohoro kahirakahira ia lao bona taunimanima ia tuari henia matamaia. Ia ese kohoro ena vareai gabuna dekenai ia lao bona lahi amo ia gabua.
53 Bena hahine ta ese Abimeleka ena kwarana latanai nadi badana ta ia negea diho bona ena kwara koukou ia hamakohia.+
54 Ia ese karaharaga ena hesiai tauna, iena tuari kohudia ia huaia tauna, ia boiria bona ia dekenai ia gwau: “Emu tuari kaia oi abia bona lau oi hamasea, unai amo lau dainai do idia gwau lasi, ‘Hahine ta ese ia alaia mase.’” Vadaeni ena hesiai tauna ese kaia amo ia gwadaia, bona ia mase.
55 Israela taudia idia itaia Abimeleka ia mase neganai, idia ibounai be edia noho gabuna dekenai idia giroa lou.
56 Abimeleka be ena tamana dekenai kara dikana ia karaia, badina ia ese ena tadikaka 70 ia alaia mase, unai dainai Dirava ese ena kara davana ia henia.+
57 Danu, Sekema taudia edia kara dika dainai Dirava ese edia kara davana ia henia. Unai amo Ierububala ena natuna,+ Iotama, ese ia gwauraia hadikaia herevana+ be idia dekenai ia guguru.
Futnout
^ Heb., “iena sinana ena tamana ena bese taudia.”
^ Eiava reana, “tano biagudia.”
^ Eiava “lohia tauna bamona ia noho.”
^ Eiava “koikoi.”
