Revareva ta Heberu Taudia Dekenai 12:1-29
12 Vadaeni, witnes orea badana* be ita idia hagegea dainai, namona be ita idia hametaua gaudia ibounai bona ita idia guia noho kara dika ita negea,+ bona namona be iseda vairanai ia noho heau helulu lalonai ita heau mai haheauka ida,+
2 bona iseda abidadama ia Gunalaia Tauna Badana bona ia Hagugurua Tauna, Iesu, ita itaia noho.+ Ia be iena vairanai ia noho moalena dainai, hisihisi auna* ia haheaukalaia, bona do ia abia hemaraina ia laloa lasi. Bona ia be Dirava ena terona ena idiba kahanai ia helai vadaeni.+
3 Momokani, ia ese kara dika taudia edia hadikaia herevadia ia haheaukalaia, to idia gwauraia hereva amo idia be sibona idia hadikaia.+ Namona be ia umui laloa namonamo, unai amo do umui hesiku lasi bona do umui lalomanoka lasi.+
4 Umui ese kara dika umui tuari henia noho, to ema bona hari emui rara ia do bubua lasi.
5 Bona inai sisiba herevana lalonai, umui be natudia bamona ia gwauraia, to umui ese unai sisiba umui laloaboio, ia gwau: “Egu natuna e, Iehova* amo ia mai matahakani do oi laloa maragi lasi, bona oi ia hamaoromaoroa neganai, oi lalomanoka lasi.
6 Badina be Iehova* ese ia lalokau henia tauna ia matahakani henia, momokani, ia ese iena natuna ai ia halaoa taudia ibounai ia panisia.”+
7 Namona be umui haheauka badina unai be emui matahakani* ena kahana ta. Dirava ese umui be ena natudia bamona ia kara henia.+ Edena mero be ena tamana ese ia matahakani henia lasi?+
8 To bema Dirava ese umui ia matahakani henia lasi, ma haida ia matahakani henia bamona, vadaeni umui be haida edia natudia, to iena natudia korikori lasi.
9 Danu, iseda tanobada tamadia ese ita idia matahakani henia, bona idia ita matauraia. Vadaeni ita mauri totona, namona be lauma helaga amo ita ia abia hidi Tamana ena henunai ita noho.+
10 Tanobada tamadia ese nega sisina lalonai edia ura hegeregerena ita idia matahakani henia, to Dirava ese iseda namo totona ita ia matahakani henia, unai amo ita be ia hegeregerena do ita helaga.+
11 Momokani, ta ese matahakani ia abia neganai, unai ia moalelaia lasi, to ia lalohisihisilaia. To gabeai, unai matahakani amo diba idia abia taudia dekenai maino bona kara maoromaoro ia havaraia.
12 Unai dainai, idia manoka imadia bona idia goada lasi tuidia do umui hagoadaia,+
13 bona emui aena edia raka daladia do umui hamaoromaoroa noho,+ unai amo ia dika aena be do ia dika momokani lasi, to do ia namo lou.
14 Do umui gaukara goada taunimanima ibounai ida maino ai umui noho totona,+ bona umui helaga noho,+ badina ia helaga lasi tauna ese Lohiabada do ia itaia lasi.
15 Umui naria namonamo, dika umui ta ese Dirava ena hebogahisi hereadaena ia abia lasi, bona ia lalonai poisini ramuna ia tubu bena hekwakwanai ia havaraia bona momo ia hamiroa.+
16 Bona namo lasi umui huanai matabodaga tauna* ta eiava helaga gaudia ia laloa bada lasi tauna ta ia noho, Esau bamona, ia ese aniani tamona totona iena vara guna ahuna ia henia.+
17 Badina umui diba, gabeai ia ura hahenamo ia abia neganai, ena tamana ese ia dadaraia. Ena be mai mata ranu ida ia ura ena tamana ena lalona ia haidaua,+ to ia haidaua lasi.
18 Umui be ororo kahirakahira umui lao lasi, unai be idia dogoatao diba gauna.+ Unai ororo be lahi ese ia araia,+ bona ia be ori koremana bona dibura badana bona lai gubana ese ia koua,+
19 bona taunimanima ese kibi regena+ bona gado ta+ idia kamonai, unai neganai idia ese Mose idia noia, idia ura lasi unai gadona ena hereva ma haida idia kamonai lou.+
20 Badina idia be inai oda dainai idia gari, ia gwau: “Bema animal ta be inai ororo dekenai ia daekau, nadi amo umui hodoa mase be namo.”+
21 Idia vara gaudia ese taunimanima ia hagaria momokani, bona Mose danu ia gwau: “Lau gari dikadika bona lau heudeheude.”+
22 To umui be guba ena Siona Ororo kahirakahira umui lao+ bona ia be mauri Diravana ena siti, guba Ierusalema,+ bona aneru tausen momo*
23 be unuseniai idia hebou.+ Bona vara guna natudia edia kongrigeisen, edia ladana be guba ai idia torea vadaeni, bona Dirava be taunimanima ibounai edia Hahemaoro Tauna,+ bona Dirava ese kara maoromaoro taudia edia mauri be ena lauma helaga amo ia abia hidi+ bona idia be goevadae taudia ai idia lao.+
24 Bona Iesu be gwaubou matamata+ ena medieita*+ bona ita dekenai rara ia negea lao mai, unai rara be dala namona ai ia hereva bona Abela ena rara ia hereaia.+
25 Namona be ia hereva noho tauna umui kamonai henia. Badina guna tanobada taudia ese Dirava amo hadibaia hereva idia abia, to idia kamonai lasi, unai dainai panisi idia abia. Vadaeni bema guba amo ita ia hereva henia tauna ena hereva ita kamonai lasi, ita do ia panisia danu!+
26 Unai nega ai Dirava ena gadona ese tanobada ia hamarerea,+ to hari ia gwauhamata, ia gwau: “Lau ese tanobada sibona do lau hamarerea lasi, to guba danu do lau hamarerea lou.”+
27 Inai hereva “lou” ese ia hahedinaraia, Dirava ese ia hamarerea vadaeni gaudia do ia kokia, unai gaudia be Dirava ese ia havaraia lasi. Vadaeni ia hamarerea lasi gaudia be do idia noho.
28 Ita be idia hamarerea diba lasi Basileia do ita abia dainai, namona be hebogahisi hereadaena do ita abia noho, unai amo mai gari bona hemataurai ida Dirava ese ia moalelaia dalanai hesiai gaukara helagana ita karaia diba.
29 Badina iseda Dirava be gau ibounai ia gabua ore lahina bamona.+
Futnout
^ Gr., “ori badana bamona witnes taudia.”
^ Eiava “treinini.”
^ Eiava “ten tausen momo.”
^ Anina be, “orea rua huanai gau ta ia hamaoromaoroa tauna.”
