Revareva ta Heberu Taudia Dekenai 4:1-16
4 Dirava ena laga-ani lalonai do ita vareai gwauhamatana be ia do noho dainai, namona be ita naria namonamo, dika umui ta be ia hegeregere lasi unai laga-ani lalonai ia vareai totona.+
2 Ita ese unai sivarai namona ita kamonai,+ iseda sene taudia ese idia kamonai bamona, to idia kamonai herevana ese idia ia durua lasi, badina edia abidadama be idia kamonai taudia edia abidadama hegeregerena lasi.
3 Badina abidadama ita hahedinaraia taudia be unai laga-ani lalonai ita vareai, ia hereva hegeregerena, ia gwau: “Unai dainai lau badu bona lau gwau, ‘Idia be egu laga-ani lalonai do idia vareai lasi,’”+ ena be taunimanima be tanobada ai idia vara negana amo iena gaukara ia haorea vadaeni.+
4 Badina Toretore Helagadia ena kahana ta ai, ia ese dina namba 7 be inai bamona ia gwauraia: “Bona dina namba 7 ai Dirava be ena gaukara ibounai amo ia laga-ani,”+
5 bona ma ia gwau: “Idia be egu laga-ani lalonai do idia vareai lasi.”+
6 Unai dainai, sivarai namona idia kamonai guna taudia be unai laga-ani lalonai idia vareai lasi, badina idia gwau-edeede. To dala ia do kehoa noho, haida idia vareai totona.+
7 Unai dainai nega daudau murinai ia ese Davida ena ane ai, dina ta ia makaia lou, ia gwau “Hari dina.” Inai revareva ese ia gwauraia vadaeni bamona: “Hari, bema umui ese iena gadona umui kamonai, namo lasi emui kudouna umui ha-aukaia.”+
8 Badina bema Iosua+ ese laga-ani gabuna lalonai idia ia hakaua vareai vadaeni, unai murinai Dirava ese dina ma ta do ia gwauraia lasi.
9 Unai dainai Dirava ena taunimanima totona sabati ena laga-ani ia do noho.+
10 Badina Dirava ena laga-ani lalonai ia vareai tauna be ena gaukara amo ia laga-ani danu, Dirava be sibona ena gaukara amo ia laga-ani hegeregerena.+
11 Unai dainai namona be ita gaukara goada unai laga-ani lalonai ita vareai, unai amo edia gwau-edeede karana do ita tohotohoa lasi.+
12 Badina Dirava ena hereva be ia mauri noho, bona ia be mai ena siahu+ bona ia be matana rua tuari kaia ia hereaia momokani,+ bona tau ta ia gwadaia neganai, iena lalona bona kara toana ia hapararaia, bona unai tau ena joini bona turia ena lalona momokani dekenai ia vareai bona ena kudouna ai idia noho lalohadai bona ura ibounai ia tahua diba.
13 Dirava ese ia havaraia gaudia ibounai amo gau ta be ia hehuni lasi,+ to gau ibounai be idia hedinarai bona ia itaia diba. Bona ia dekenai iseda kara ena anina do ita gwauraia hedinarai.+
14 Vadaeni, ita be mai iseda hahelaga tauna badana, ia be guba dekenai ia vareai, unai tauna be Iesu, Dirava ena Natuna.+ Unai dainai namona be iseda abidadama ia dekenai ita gwauraia hedinarai noho.+
15 Badina iseda hahelaga tauna badana be iseda manoka ia mamia momokani,+ ita davaria hahetoho idauidau ia davaria danu, to ia kara dika lasi.+
16 Unai dainai namona be hebogahisi hereadaena ena terona kahirakahira ita lao, bona mai gari lasi ida Dirava ita guriguri henia,+ unai amo hebogahisi do ita davaria bona iena hebogahisi hereadaena amo, heduru be nega maorona ai do ita abia.
