Revareva ta Heberu Taudia Dekenai 6:1-20
6 Unai dainai, hari ita ese Keriso ena hahediba hereva ginigunadia ita rakatania vadaeni,+ namona be ita hekwarahi noho lo taudia ai ita lao totona.+ Namo lasi badina ita haginia lou, bona inai gaudia ita dibaia matamaia lou, hegeregere mase karadia amo helalo-kerehai karana, Dirava abidadama henia karana,
2 bona inai hadibaia herevadia hegeregere, bapatiso idauidau, kwarana latanai imana atoa karana,+ mase taudia idia toreisi lou,+ bona noho hanaihanai hahemaoro herevana.
3 Bona ita be lo taudia ai do ita lao, bema Dirava ese gwaumaoro ia henia.
4 Guna diari idia abia taudia idia helalo-kerehai lou totona,+ idia ita durua dalana be lasi, idia ese guba ena davana lasi harihari gauna bona lauma helaga idia abia,
5 Dirava ena hereva namona idia mamia, bona do ia mai nega oromana* ena siahu gaudia idia mamia,
6 to idia be idia moru,+ badina idia ese Dirava ena Natuna be au dekenai idia kokoa kau lou bona taunimanima vairanai idia hahemaraia.+
7 Nega momo medu ia diho bona tano ese ranu ia abia neganai, Dirava ese tano ia hanamoa bona tubutubu gaudia ia havaraia bona biru taudia ese idia ania.
8 To bema tano ese ava dikadia bona ginigini ia havaraia, ia be anina lasi bona daudau lasi murinai biru tauna ese do ia gwauraia dika, bona dokonai lahi ese do ia gabua ore.
9 Lalokau taudia e, ena be unai bamona ai hereva, to ai diba emui noho ese abidadama idia rakatania taudia edia noho ia hereaia dainai, Dirava ese umui do ia hamauria.
10 Dirava ena kara be ia gageva lasi, ia ese emui gaukara bona iena ladana totona umui hahedinaraia lalokauna do ia laloaboio lasi.+ Inai lalokau dainai umui ese helaga taudia umui hesiai henia, bona unai bamona do umui hesiai henia noho.
11 To ai ura umui ta ta be matamanai umui karaia bamona umui gaukara goadagoada noho, unai amo emui helaro do umui dogoatao noho+ ela bona dokona,+
12 vadaeni do umui hesiku lasi.+ To abidadama bona haheauka karana amo Dirava ese ia gwauhamatalaia gaudia idia abia taudia do umui tohotohoa.
13 Dirava ese Aberahamo dekenai iena gwauhamata ia karaia neganai, ia be sibona ena ladana ai ia gwauhamata, badina ta ese ia ia hereaia lasi,+
14 ia gwau: “Lau hereva momokani, lau ese oi do lau hanamoa momokani bona emu bese do lau habadaia momokani.”+
15 Aberahamo ia haheauka dainai, unai gwauhamata gauna ia abia.
16 Taunimanima be idia ia hereaia tauna ena ladanai idia gwauhamata, bona edia gwauhamata ese hepapahuahu ibounai ia hadokoa, badina unai gwauhamata ese edia hereva ia hamomokania.+
17 Unai hegeregerena, Dirava ese iena gwauhamata ahuna do idia abia taudia dekenai iena ura, ia haidaua diba lasi gauna, ia hahedinaraia goevagoeva.+ Ia ese gwauhamata metauna amo unai ura ia hamomokania.
18 Vadaeni unai gaudia rua be idia idau diba lasi bona idia hahedinaraia Dirava be ia koikoi diba lasi.+ Unai dainai heau mauri gabuna dekenai ita heau taudia be goada bada ita abia diba, unai amo iseda vairanai ia noho helarona ita dogoatao auka.
19 Ita abia helaro+ be iseda mauri ena dogo bamona, ia be ia momokani bona ia goada, bona inai helaro be keten ia hanaia lao,+
20 unuseniai iseda gunalaia tauna Iesu be ita dainai ia vareai,+ ia be hahelaga tauna badana, Melekisedeka bamona, ela bona hanaihanai.+
