Iona 1:1-17
1 Iehova be Amitai ena natuna Iona*+ dekenai ia gwau:
2 “Oi toreisi bona Nineva siti badana dekenai oi lao,+ bona ia do lau hadikaia herevana oi harorolaia, badina edia kara dika lau itaia vadaeni.”
3 To Iona be Iehova amo ia heau boio bona Tarasisi dekenai ia ura lao totona, Iopa dekenai ia lao bona bouti ta ia davaria. Bouti davana ia henia bona bouti dekenai ia guia bona idia ida Tarasisi dekenai ia lao. Iehova amo ia heau boio.
4 Bena Iehova ese lai badana be davara dekenai ia siaia, bona medu bada herea ia diho bona bouti be kahirakahira ia makohia.
5 Bouti dekenai idia gaukara taudia be idia gari dikadika dainai, idia ta ta be edia dirava dekenai heduru totona idia boiboi. Bona bouti ia mutu lasi totona, idia ese kohu haida be davara dekenai idia negea matamaia.+ To Iona be bouti ena lalona kahana dekenai ia diho lao vadaeni, ia hekure bona ia mahuta mase.
6 Kapten be Iona dekenai ia lao bona ia gwau: “Dahaka dainai oi mahuta noho? Oi toreisi, emu dirava dekenai oi boiboi! Reana Dirava momokanina be ita do ia laloa bona do ita mase lasi.”+
7 Bena ta ta dekenai idia gwau: “Umui mai, gadara ta* ita karaia+ bona ita tahua daika ena kerere dainai inai dika ia vara noho.” Vadaeni unai gadara amo idia davaria kerere be Iona ena.+
8 Ia dekenai idia gwau: “Mani ai oi hamaoroa, daika ena kerere dainai inai dika be ai dekenai ia vara? Oiemu gaukara be dahaka bona edeseni amo oi mai? Oi be edena tano tauna bona oi be edena bese tauna?”
9 Ia haere ia gwau: “Lau be Heberu tauna bona guba ai ia noho Diravana, Iehova lau tomadiho henia. Ia be davara bona tano ia karaia Diravana.”
10 Unai tatau idia gari dikadika badina idia ia hamaoroa vadaeni, ia be Iehova amo ia heau boio. Vadaeni ia idia nanadaia: “Dahaka dainai unai bamona oi karaia?”
11 Vadaeni ia dekenai idia gwau: “Oi dekenai dahaka do ai karaia unai amo davara do ia namo?” Badina hurehure be idia bada idia lao noho.
12 Ia haere ia gwau: “Lau umui abia isi bona davara dekenai umui negea, unai amo umui totona davara be do ia namo, badina lau diba lauegu kerere dainai, umui dekenai inai lai bona medu badana ia vara.”
13 To, unai tatau idia bara goadagoada tano kaukau dekenai bouti idia abia lao totona. To idia hegeregere lasi, badina davara ena hurehure be idia bada herea momokani.
14 Bena Iehova dekenai idia boiboi idia gwau: “Iehova e, mani emu kara ai ura lasi inai tauna dainai do ai mase! Iehova e, bema inai kerere lasi tauna ai negea davara dekenai, mani ai oi kota henia lasi badina unai be oiemu ura.”
15 Vadaeni Iona idia abia isi bona davara dekenai idia negea, bena hurehure badadia idia doko.
16 Vadaeni unai tatau be Iehova dekenai idia gari dikadika,+ bona Iehova dekenai boubou gauna idia henia bona gwauhamata idia karaia.
17 Vadaeni, Iehova ese gwarume badana ta ia siaia lao Iona ia hadonoa totona, bona Iona be gwarume ena bogana lalonai dina toi bona hanuaboi toi ia noho.+
