Iona 4:1-11
4 To Iona be unai gauna dekenai ia moale lasi bona ia badu dikadika.
2 Unai dainai Iehova dekenai ia guriguri, ia gwau: “Iehova e, egu tano ai lau noho neganai, lau diba unai do ia vara. Unai dainai, matamanai lau ura Tarasisi dekenai lau heau lao,+ badina lau diba oi be hebogahisi Diravana, oi badu haraga lasi, emu lalokau* be bada herea,+ oiemu lalona oi haidaua bona kerere davana oi henia lasi.
3 Iehova e, mani egu mauri do oi kokia, badina lau mase be namo, lau mauri be dika.”+
4 Iehova ese ia nanadaia: “Oi badu be maoro, a?”
5 Iona be Nineva siti amo ia raka lasi bona siti ena ist kahanai ia helai. Unuseniai ruma maragina ta ia karaia bona ena keruma henunai ia helai. Ia ura unai siti dekenai dahaka do ia vara ia itaia.+
6 Vadaeni, Iehova Dirava ese ia rau tubutubu gauna* ta ia hatubua, dina ena siahu ia koua bona Iona ena lalona ia hanamoa totona. Bona Iona be unai tubutubu gauna dekenai ia moale bada.
7 To murina dinana ai, daba ia rere neganai Dirava momokanina ese biluga ta ia siaia bona unai tubutubu gauna ia ania bena ia kakoro.
8 Dina ia siahu neganai, Dirava ese ist kahana amo lai siahuna ia siaia danu, bena dina ena siahu ese Iona ena kwarana ia gabua bona kahirakahira ia moru. Ia noinoi loulou do ia mase totona. Bona ia hereva loulou: “Lau mase be namo, lau ura lasi lau mauri noho.”+
9 Dirava ese Iona ia nanadaia: “Tubutubu gauna dainai oi badu be maoro, a?”+
Bena Iona ia haere: “Io, lau badu be maoro, lau badu dikadika dainai lau ura lau mase.”
10 To Iehova ia gwau: “Unai tubutubu gauna be hanuaboi tamona lalonai ia tubu bona hanuaboi tamona lalonai ia mase. Bona oi ese oi hatubua lasi bona gau ta oi karaia lasi. To unai tubutubu gauna totona oi hebogahisi.
11 Lau danu be Nineva siti badana totona do lau hebogahisi lasi, a?+ Unuseniai, maoro bona kerere edia idau idia diba lasi taunimanima 120,000 mai kahana idia noho, mai edia animal momo danu.”+
Futnout
^ Reana ia be raurau momo tubutubu gauna ta, mai ena huahua.
