Iosua 2:1-24
2 Bena Sitima amo Iosua ese tatau rua be hunia dalanai spai taudia bamona ia siaia lao.+ Idia ia hamaoroa: “Umui lao bona Ieriko tano umui sekea.” Vadaeni idia lao bona ariara hahine ta ladana Rahaba ena ruma dekenai idia ginidae+ bona unuseni idia noho.
2 Haida ese Ieriko ena king idia hamaoroa: “Israela tatau be hari hanuaboi iniseni idia mai, inai tano idia spai totona.”
3 Unai neganai Ieriko ena king ese Rahaba dekenai hereva ia siaia: “Idia mai bona emu ruma dekenai idia noho tatau oi hakaua mai, badina idia be inai tano ibounai spai totona idia mai.”
4 To hahine ese unai tatau rua ia hunia. Bena ia gwau: “Oibe, unai tatau be lau dekenai idia mai, to lau diba lasi idia be edeseni amo idia mai.
5 Bona gabu ia dibura bona siti ena geiti idia koua gwauraia neganai, unai tatau idia raka-lasi. Lau diba lasi idia be edeseni idia lao, to bema idia murinai umui heau lao haraga, idia do umui davaria.”
6 (To, ia ese idia be guhi ataiai ia hakaua lao, bona idia haboua fleks avadia* henunai idia ia hunia.)
7 Vadaeni king ese ia siaia tatau be Ioridane ia lao henia dalana amo unai tatau rua murinai idia heau lao, ela bona sinavai ia dobu lasi kahana dekenai.+ Bona king ena tatau idia lao murinai, siti ena geiti idia koua.
8 Unai tatau be guhi ataiai idia do mahuta lasi neganai, Rahaba be idia dekenai ia daekau lao.
9 Idia dekenai ia gwau: “Lau diba Iehova ese inai tano be umui dekenai do ia henia,+ badina ai be umui dekenai ai gari.+ Oibe, inai tano ai idia noho taudia ibounai be umui dainai edia lalona ia manoka,+
10 badina Aigupito umui rakatania neganai, Iehova ese Davara Kakakaka ena ranu ia hakaukaua sivaraina ai kamonai vadaeni,+ bona Ioridane ena kahana ma ta ai* Amoro taudia edia king rua, Sihona+ bona Oga+ umui hamasea sivaraina ai kamonai danu.
11 Ai ese unai ai kamonai neganai, emai kudouna dekenai ai gari dikadika* bona umui dainai emai lalona ia goada lasi, badina Iehova emui Dirava be guba bona tanobada edia Dirava.+
12 Lau be umui dekenai kara namona lau hahedinaraia dainai, mani Iehova ena ladana ai lau umui gwauhamata henia, umui ese egu tamana ena ruma bese dekenai kara namona do umui hahedinaraia danu. Bona emui hereva hamomokania totona, lau dekenai toa ta umui henia.
13 Namona be egu tamana bona sinana, egu tadikaka bona taihu, bona edia taunimanima ibounai edia mauri umui kokia lasi, namona be mase amo ai umui hamauria.”+
14 Unai neganai unai tatau be ia dekenai idia gwau: “Emai mauri be oi totona do ai henia! Bema emai palani oi gwauraia hedinarai lasi, vadaeni Iehova ese ai dekenai inai tano ia henia neganai, ai ese oi dekenai hebogahisi* do ai hahedinaraia.”
15 Unai murinai ia ese varo ta amo idia be windo amo ia hadihoa, badina iena ruma be siti ena magu ena kahana ta ai ia noho. Oibe, ia be magu ena ataiai ia noho.+
16 Bena idia dekenai ia gwau: “Ororo gabudia dekenai umui lao bona dina toi unuseni umui hunia, unai amo umui idia tahua taudia ese umui do idia davaria lasi. Vadaeni idia giroa mai neganai, umui lao diba.”
17 Unai tatau rua be ia dekenai idia gwau: “Oiemu ura dainai oi ida ai karaia gwauhamata amo ai be do ai kerere lasi,+
18 bema inai tano dekenai ai vareai bona ai itaia inai varo kakakaka, windo amo ai oi hadihoa varo unai, be windo dekenai oi kwatua. Emu tamana, emu sinana, emu tadikakadia, bona emu tamana ena ruma bese ibounai be emu ruma lalonai oi haboua.+
19 Vadaeni bema ta be emu ruma ena iduara ta amo murimuri dekenai ia raka-lasi, iena rara be ia sibona latanai, bona ai be iena rara dekenai do ai kerere lasi. To bema oi ida ruma lalonai idia noho taudia ta ese dika ia davaria, iena rara be ai latanai do ia noho.
20 To bema emai palani oi gwauraia hedinarai,+ ai be emu ura dainai ai karaia gwauhamata metauna dekenai do ai kerere lasi.”
21 Rahaba ia gwau: “Namona be emui hereva hegeregerena ia vara.”
Bena idia ia siaia lao. Unai murinai, ia ese varo kakakaka be windo dekenai ia kwatua.
22 Vadaeni idia ese unai gabu idia rakatania bona ororo gabudia dekenai idia lao bona dina toi unuseni idia noho, ela bona idia ruaosi idia lulua taudia idia giroa lou. Idia ese dala ibounai dekenai idia rua idia tahua, to idia davaria lasi.
23 Vadaeni idia ruaosi be ororo gabudia amo idia diho bona sinavai idia hanaia bena Nunu ena natuna Iosua dekenai idia lao. Idia dekenai idia vara gaudia ibounai be ia dekenai idia gwauraia.
24 Bena idia be Iosua dekenai idia gwau: “Iehova ese inai tano ibounai be ita dekenai ia henia vadaeni.+ Oibe, unai tano ai idia noho taudia ibounai be ita dainai idia gari dikadika.”+
Futnout
^ Inai tubutubu gauna be Aigupito ai ia tubu, ia amo linen dabua idia karaia.
^ Unai be, ist kahana ai.
^ Heb., “emai kudouna idia veve.”
