Iosua 24:1-33
-
Iosua be Israela dekenai idia vara gaudia ia herevalaia lou (1-13)
-
Idia hagoadaia Iehova idia hesiai henia totona (14-24)
-
“Lau bona egu ruma bese be Iehova do ai hesiai henia” (15)
-
-
Iosua ena gwaubou Israela taudia ida (25-28)
-
Iosua ia mase bona idia guria (29-31)
-
Iosepa ena turia be Sekema dekenai idia guria (32)
-
Eleasara ena mase bona idia guria (33)
24 Bena Iosua ese Israela ena iduhu ibounai be Sekema dekenai ia haboua, bona Israela ena tau badadia, ena gunalaia taudia, ena hahemaoro taudia, bona ena ofesa taudia ia boiria,+ bona idia be Dirava momokani vairanai idia gini.
2 Bona Iosua be taunimanima ibounai dekenai ia gwau: “Iehova, Israela ena Dirava be inai bamona ia gwau, ‘Idaunega momokani emui sene taudia,+ Aberahamo bona Nahoro edia tamana Tera danu, be Sinavai* ena kahana ai idia noho bona idia ese dirava ma haida idia hesiai henia.+
3 “‘Gabeai lau ese emui sene tauna Aberahamo+ be Sinavai* ena kahana ta amo lau abia bona Kanana tano ibounai dekenai ia lau hakaua bona ena bese lau habadaia.+ Lau ese ia dekenai Isako lau henia,+
4 bena Isako dekenai Iakobo bona Esau lau henia.+ Gabeai Esau dekenai Seiri Ororo lau henia, bona unai be iena tano ai ia lao.+ Bona Iakobo bona ena natudia be Aigupito dekenai idia diho lao.+
5 Gabeai lau ese Mose bona Arona lau siaia,+ bona Aigupito dekenai hisihisi lau havaraia,+ unai murinai umui lau hakaua raka-lasi.
6 Lau ese emui sene taudia be Aigupito amo lau hakaua raka-lasi+ bona idia be davara dekenai idia ginidae, bona Aigupito taudia be emui sene taudia edia murinai idia heau lao noho, mai edia tuari kariota bona hosi guia taudia ida ela bona Davara Kakakaka dekenai.+
7 Vadaeni Israela taudia be Iehova dekenai idia boiboi matamaia,+ bona lau ese idia bona Aigupito taudia huanai ori koremana lau atoa, bona davara ranudia be Aigupito taudia latanai lau mailaia bena ranu ese ia koudia bona idia mase ore.+ Bona Aigupito ai lau karaia karadia danu be umui sibona emui matana amo umui itaia vadaeni.+ Bena taunimanima lasi gabuna ai lagani momo umui noho.+
8 “‘Bona Amoro taudia edia tano dekenai umui lau hakaua mai, idia be Ioridane kahana* ai idia noho, bona idia ese umui idia tuari henia.+ To lau ese idia be emui imana dekenai lau atoa, unai amo edia tano umui abia diba, bona emui vairana amo idia lau hadikaia ore.+
9 Bena Siporo ena natuna Balaki, Moaba ena king, ia toreisi bona Israela taudia ia tuari henia. Vadaeni ia ese Beoro ena natuna Balama ia boiria, umui hadikaia hereva ia gwauraia totona.+
10 To lau ese Balama lau kamonai henia lasi.+ Vadaeni ia ese umui ia hanamoa loulou,+ bona umui be iena imana amo lau hamauria.+
11 “‘Bena umui be Ioridane umui hanaia+ bona Ieriko dekenai umui mai.+ Bona Ieriko taudia, Amoro taudia, Perisi taudia, Kanana taudia, Hiti taudia, Girigasa taudia, Hivi taudia, bona Iebusu taudia edia gunalaia taudia* ese umui idia tuari henia, to lau ese idia be emui imana dekenai lau atoa.+
12 Vadaeni lau ese idia huanai lalohisihisi bada* lau havaraia, bona emui vairana amo idia lau lulua,+ Amoro taudia edia king rua danu. Unai be sibona emui tuari kaia bona peva amo ia vara lasi.+
13 Bona umui hekwarahilaia lasi tano bona umui haginidia lasi siti be umui dekenai lau henia, umui noholaia totona.+ Bona umui hadoa lasi vain uma bona olive audia edia huahua umui ania.’+
14 “Unai dainai, Iehova umui gari henia bona mai kerere lasi bona mai momokani ida ia umui hesiai henia,+ bona emui sene taudia ese Sinavai* ena kahana ai bona Aigupito ai idia tomadiho henia diravadia umui kokia,+ bona Iehova umui hesiai henia.
15 Bema umui ura lasi Iehova umui hesiai henia, umui sibona ese hari dina umui abia hidi daika do umui hesiai henia,+ emui sene taudia ese Sinavai* ena kahana ai idia hesiai henia diravadia+ eiava Amoro taudia edia diravadia, hari umui noholaia tano taudia unai.+ To lau bona egu ruma bese be Iehova do ai hesiai henia.”
16 Vadaeni taunimanima idia gwau: “Lasi! Ai ese Iehova do ai rakatania lasi, dirava ma haida ai hesiai henia totona.
17 Iehova iseda Dirava sibona ese ita bona iseda sene taudia be ita ia guia tanona,* Aigupito,+ amo ia hakaua raka-lasi,+ bona iseda matana ai toa kara badadia ia karaia,+ bona iseda laolao ibounai lalonai bona ita hanaia taudia ibounai amo ita ia gimaia.+
18 Iehova ese taunimanima ibounai ia lulua lao, Amoro taudia danu, idia be guna inai tano ai idia noho. Unai dainai ai danu be Iehova do ai hesiai henia, badina ia be emai Dirava.”
19 Bena Iosua be taunimanima dekenai ia gwau: “Umui be hegeregere lasi Iehova umui hesiai henia totona, badina ia be helaga Diravana.+ Ia ura taunimanima be ia sibona do idia tomadiho henia.+ Ia ese emui kerere* bona emui kara dika do ia gwauatao lasi.+
20 Bema Iehova umui rakatania bona idau diravadia umui hesiai henia, ia ese umui do ia dadaraia danu bona umui do ia hadikaia ore, ena be guna umui ia kara namo henia vadaeni.”+
21 To taunimanima be Iosua dekenai idia gwau: “Ai ese Iehova do ai hesiai henia!”+
22 Vadaeni Iosua be taunimanima dekenai ia gwau: “Umui be sibona emui hereva hamomokania taudia, umui sibona ese abia hidi umui karaia vadaeni Iehova umui hesiai henia totona.”+ Bena idia gwau: “Ai be emai hereva hamomokania taudia.”
23 “Unai dainai, umui huanai idia noho idau diravadia umui kokia, bona mai emui kudouna ibounai ida Iehova, Israela ena Dirava, umui hesiai henia.”
24 Taunimanima be Iosua dekenai idia gwau: “Ai ese Iehova emai Dirava do ai hesiai henia bona iena hereva do ai badinaia!”
25 Vadaeni unai dina ai Iosua be taunimanima ida gwaubou ta ia karaia, bona Sekema ai ia ese idia totona taravatu ta ia haginia bona oda hereva ia henia.
26 Bena Iosua ese unai hereva be Dirava ena Taravatu bukana dekenai ia torea,+ bena nadi badana ta ia abia+ bona au badana henunai ia haginia, unai au be Iehova ese ia hahelagaia gabuna ai ia gini.
27 Iosua be taunimanima ibounai dekenai ma ia gwau: “Itaia! Inai nadi be hamomokania gauna ita dekenai,+ badina Iehova ese ita dekenai ia gwauraia hereva ibounai ia kamonai vadaeni, oibe, ia be hamomokania gauna umui dekenai, unai amo emui Dirava do umui koia lasi.”
28 Unai murinai Iosua ese taunimanima ia siaia, bona idia ta ta be edia tano dekenai idia lao.+
29 Unai murinai, Nunu ena natuna Iosua, Iehova ena hesiai tauna ia mase, ena mauri lagani be 110.+
30 Vadaeni ena tano Timinata-sera ai idia guria,+ unai be Eparaima ena ororo gabudia dekenai, Gaso Ororo ena not kahanai.
31 Iosua ena mauri dinadia ibounai lalonai bona ia mase murinai idia do mauri noho tau badadia edia nega lalonai, Israela taudia ese Iehova idia hesiai henia noho, unai tau badadia be Iehova ese Israela taudia totona ia karaia karadia ibounai idia diba.+
32 Iosepa ena turia,+ Israela taudia ese Aigupito amo idia abia raka-lasi gaudia unai, be Sekema dekenai idia guria, unai tano be Iakobo ese guna siliva moni 100 amo ia hoia,+ Sekema ena tamana Hamoro ena bese taudia amo,+ bona ia be Iosepa ena bese taudia edia tano ai ia lao.+
33 Danu, Arona ena natuna Eleasara ia mase.+ Vadaeni ia be ena natuna Pineha Ena Ororo ai idia guria,+ idia ese unai ororo be ia dekenai idia henia, Eparaima ena ororo gabudia ai.
Futnout
^ Unai be, Euperate.
^ Unai be, Euperate.
^ Unai be, ist kahana.
^ Eiava reana, “tano biagudia.”
^ Eiava reana, “gari bada.”
^ Unai be, Euperate.
^ Unai be, Euperate.
^ Heb., “igui hesiai gaukara karaia rumana.”
^ Eiava “gwau-edeede karana.”
