Iosua 3:1-17
-
Israela taudia ese Ioridane idia hanaia (1-17)
3 Iosua be daba momokani ia toreisi, bena ia bona Israela taudia* ibounai be Sitima idia rakatania+ bona Ioridane dekenai idia mai. To idia hanaia lasi, hanuaboi ai idia kamepa guna.
2 Dina toi murinai, gunalaia taudia+ be kamepa huana amo idia raka lao
3 bona taunimanima idia oda henia, idia gwau: “Bema umui itaia Iehova emui Dirava ena Taravatu Maua be Levi hahelaga taudia ese idia huaia,+ namona be emui gabu umui rakatania bona Maua murinai umui raka.
4 To Maua amo do umui daudau 2,000 kiubit* bamona, maua kahirakahira do umui lao lasi, unai amo do umui raka lao dalana do umui diba, badina guna inai dala ai umui raka lao lasi.”
5 Iosua be taunimanima dekenai ia gwau: “Umui hegaegae,+ badina kerukeru Iehova ese emui huanai hoa karadia do ia karaia.”+
6 Bena Iosua be hahelaga taudia dekenai ia gwau: “Taravatu Maua umui huaia+ bona taunimanima edia vairanai umui raka.” Vadaeni idia ese Taravatu Maua idia huaia bona taunimanima edia vairanai idia raka.
7 Bena Iehova be Iosua dekenai ia gwau: “Hari dina lau ese Israela taudia edia vairanai oi do lau hanamoa matamaia,+ unai amo do idia diba lau be oi ida lau noho,+ Mose ida lau noho hegeregerena.+
8 Namona be Taravatu Maua idia huaia hahelaga taudia dekenai inai oda oi henia: ‘Ioridane sinavai lalonai umui diho neganai, namona be Ioridane sinavai ena isena dekenai umui gini bona umui marere lasi.’”+
9 Bona Iosua be Israela taudia dekenai ia gwau: “Iniseni umui mai bona Iehova emui Dirava ena hereva umui kamonai.”
10 Bena Iosua ia gwau: “Unai amo do umui diba mauri Diravana be umui emui huanai ia noho,+ bona ia ese emui vairana amo Kanana taudia, Hiti taudia, Hivi taudia, Perisi taudia, Girigasa taudia, Amoro taudia, bona Iebusu taudia do ia lulua lao momokani.+
11 Itaia, tanobada ibounai ena Lohiabada ena Taravatu Maua be vaira kahanai ia lao guna Ioridane dekenai.
12 Israela taudia edia iduhu amo tatau 12 oi abia hidi, tau ta be iduhu ta totona.+
13 Bona tanobada ibounai ena Lohiabada Iehova ena Taravatu Maua idia huaia hahelaga taudia edia aena be Ioridane sinavai lalonai idia atoa neganai, Ioridane sinavai ena ataiai amo ia aru mai ranu ena heau do ia doko bona ranu be haba bamona do ia gini bona do ia marere lasi.”+
14 Vadaeni taunimanima be idia kamepa gabuna idia rakatania bona Ioridane idia do hanaia lasi neganai, Taravatu Maua idia huaia hahelaga taudia+ be vaira kahanai idia lao guna.
15 Bena Maua idia huaia hahelaga taudia be Ioridane dekenai idia ginidae bona edia aena be sinavai lalonai idia atoa neganai (unai be aniani gogoa negana bona Ioridane Sinavai be ia aru badabada),+
16 sinavai ena ataiai kahana amo ia aru mai ranu ia doko. Bona ranu be haba bamona daudau gabuna dekenai ia gini, unai be Adamu siti dekenai, ia be Saretana kahirakahira ia noho. To Arabaha Davara, Damena Davara* unai, dekenai ia aru lao ranu be davara lalonai ia diho. Ranu ena heau ia doko, bona taunimanima be Ieriko unai kahana dekenai idia hanaia lao.
17 Iehova ena Taravatu Maua idia huaia hahelaga taudia be Ioridane sinavai ena huanai ia kaukau gabuna ai idia gini noho,+ bona Israela taudia ibounai be tano kaukau dekenai idia raka hanai+ ela bona unai bese ibounai be Ioridane idia hanaia.
