Iosua 6:1-27
6 Vadaeni Israela taudia dainai Ieriko ena geiti idia koua auka, ta be murimuri ia lao lasi bona ta be ia vareai lasi.+
2 Iehova be Iosua dekenai ia gwau: “Kamonai, lau ese oi dekenai Ieriko bona ena king bona ena tuari taudia goadadia lau henia vadaeni.+
3 Namona be umui tuari tatau ibounai be nega tamona siti do umui raka hagegea. Dina 6 lalonai unai bamona umui karaia.
4 Hahelaga taudia 7 ese kibi* 7 idia huaia bona Maua vairanai do idia raka. To dina namba 7 ai, siti do umui raka hagegea nega 7 bona hahelaga taudia ese edia kibi do idia hiriria.+
5 Kibi idia hiriria ena regena umui kamonai neganai, taunimanima ibounai ese tuari totona do idia boiboi badabada. Bena siti ena magu do ia moru diho,+ bona taunimanima do idia lao, maoromaoro do idia raka vareai.”
6 Vadaeni Nunu ena natuna Iosua ese hahelaga taudia ia boiria bona idia ia hamaoroa: “Taravatu Maua umui abia isi, bona hahelaga taudia 7 ese kibi 7 do idia huaia bona Iehova ena Maua vairanai umui raka.”+
7 Bena ia ese taunimanima ia hamaoroa: “Umui lao bona siti umui raka hagegea, bona tuari oreadia+ be Iehova ena Maua vairanai do idia raka.”
8 Bona Iosua ese taunimanima ia hamaoroa hegeregerena, Iehova vairanai kibi 7 idia huaia hahelaga taudia 7 be idia lao guna bona kibi idia hiriria, bona edia murinai Iehova ena Taravatu Maua idia huaia bona idia raka.
9 Bona tuari oreadia be kibi idia hiriria hahelaga taudia vairanai idia raka, bona tuari taudia ma haida be Maua ena murinai idia raka, unai nega lalonai hahelaga taudia ese kibi idia hiriria noho.
10 Vadaeni Iosua ese taunimanima ia oda henia: “Namo lasi umui boiboi eiava emui gado regena idia kamonai. Hereva ta umui gwauraia lasi ela bona umui lau hamaoroa dinana ai, do umui boiboi.
11 Bena Iehova ena Maua idia huaia bona siti idia raka hagegea, nega tamona unai bamona idia karaia, unai murinai kamepa dekenai idia giroa lou bona unuseni idia mahuta.
12 Murina dinana ai Iosua be daba momokani ia toreisi, bona hahelaga taudia ese Iehova ena Maua idia huaia,+
13 bona hahelaga taudia 7 ese kibi 7 idia huaia bona Iehova ena Maua vairanai idia raka, bona kibi idia hiriria noho. Bona tuari oreadia be idia edia vairanai idia raka, bona tuari taudia ma haida be Iehova ena Maua murinai idia raka, unai nega lalonai hahelaga taudia ese kibi idia hiriria noho.
14 Idia be dina iharuana ai nega tamona siti idia raka hagegea, unai murinai kamepa dekenai idia giroa lou. Dina 6 lalonai, unai bamona idia karaia.+
15 Dina namba 7 ai, daba momokani, unai be dina ia hedinarai neganai, idia toreisi bena siti idia raka hagegea nega 7, vaia idia karaia bamona. Unai dina sibona ai idia be nega 7 siti idia raka hagegea.+
16 Bona nega namba 7 ai, hahelaga taudia ese kibi idia hiriria, bona Iosua be taunimanima dekenai ia gwau: “Umui boiboi,+ badina Iehova ese umui dekenai inai siti ia henia vadaeni!
17 Siti bona ia lalonai idia noho gaudia ibounai umui hadikaia ore,+ unai ibounai be Iehova ena. To ariara hahine Rahaba+ sibona do ia mauri noho, ia bona ena ruma lalonai idia noho taudia ibounai, badina ia ese ita siaia spai taudia ia hunia.+
18 To do idia hadikaia gaudia amo umui siri be namo,+ badina dika unai gaudia umui ura henia bona idia amo gau haida umui abia,+ bena Israela ena kamepa ese dika do ia davaria bona ia latanai dika umui mailaia.+
19 To siliva bona golo bona kopa bona auri gaudia ibounai be gau helagadia Iehova dekenai.+ Namona be Iehova ena ruma ena dava bada kohu haboua gabuna dekenai umui atoa.”+
20 Bena kibi idia hiriria neganai, taunimanima idia boiboi.+ Oibe, taunimanima ese kibi regena idia kamonai neganai, tuari totona idia boiboi badabada bena magu ia moru.+ Unai murinai taunimanima be siti dekenai idia lao, maoromaoro idia raka vareai, bona siti idia abia.
21 Idia ese siti lalonai idia noho gaudia ibounai be tuari kaia amo idia hadikaia, tau bona hahine, matamata bona buruka, boromakau, mamoe, bona doniki.+
22 Iosua ese unai tano idia spai taudia rua ia hamaoroa: “Ariara hahine ena ruma lalonai umui vareai bona unai hahine bona ia ida idia noho taudia ibounai umui abia raka-lasi, ia dekenai umui gwauhamata hegeregerena.”+
23 Bena spai taudia idia lao bona Rahaba, ena tamana, ena sinana, ena tadikakadia, bona ena taunimanima ibounai idia abia raka-lasi. Oibe, iena famili ibounai idia abia raka-lasi,+ bona Israela ena kamepa murimurinai ia noho gabuna ta dekenai idia hakaudia lao bona idia ta be dika ia davaria lasi.
24 Bena siti bona ia lalonai idia noho gaudia ibounai be lahi amo idia gabua. To siliva, golo, kopa bona auri gaudia ibounai be Iehova ena ruma ai dava bada kohu haboua gabuna dekenai idia atoa.+
25 To ariara hahine Rahaba bona ena tamana ena ruma bese bona iena taunimanima ibounai be Iosua ese ia hamauria.+ Bona Rahaba be Israela taudia huanai ia noho ema bona hari,+ badina ia be Iosua ese Ieriko spai totona ia siaia gwaukau taudia ia hunia.+
26 Unai nega ai Iosua be inai gwauhamata metauna ia karaia:* “Ieriko siti ia ura haginia lou tauna be Iehova vairanai do idia gwauraia dika. Siti ena badina ia karaia neganai, ena vara guna natuna do ia mase, bona siti ena geiti ia karaia neganai, ena natuna ginigabena do ia mase.”+
27 Iehova be Iosua ida ia noho,+ bona tanobada ibounai lalonai iena sivarai idia kamonai.+
Futnout
^ Heb., “mamoe tau edia doana.”
^ Eiava reana, “taunimanima ia hamaoroa inai gwauhamata metauna idia karaia totona.”
