Iosua 7:1-26
7 Israela taudia be Dirava ena oda herevana idia badinaia lasi bona Dirava ia gwau do idia hadikaia ore gaudia idia abia. Badina Iuda iduhu tauna Karami ena natuna mero* Akana,+ Sera bese tauna Sabadi ena tubuna unai, ese do idia hadikaia ore gaudia haida ia abia.+ Unai dainai Iehova ena badu mai siahuna be Israela taudia latanai ia diho.+
2 Bena Iosua ese Ieriko amo tatau haida be Ai dekenai ia siaia,+ unai tano be Betavene kahirakahira bona Betele ena ist kahanai ia noho.+ Idia ia hamaoroa: “Umui daekau lao bona unai tano umui itaia.” Vadaeni unai tatau idia lao Ai tano itaia totona.
3 Idia be Iosua dekenai idia giroa lou bona ia idia hamaoroa: “Namo lasi tuari tatau ibounai idia daekau lao. Tatau 2,000 eiava 3,000 bamona be hegeregere, Ai taudia idia halusia totona. Badina Ai taudia be momo lasi, oibe, taunimanima ibounai oi siaia daekau lao lasi, idia hesiku garina.”
4 Vadaeni tatau 3,000 bamona be unuseni idia daekau lao, to idia be Ai taudia amo idia heau.+
5 Ai ena tatau ese Israela tatau 36 idia alaia mase, bona siti ena geiti murimuri amo idia luludia diho lao ela bona Sebarimi,* idia luludia lao ela bona ibounai idia hamasea. Vadaeni taunimanima be edia kudouna ai idia gari dikadika bona edia lalogoada be ranu bamona ia boio lao.
6 Unai neganai Iosua bona Israela ena tau badadia be edia dabua idia darea bona Iehova ena Maua vairanai tano dekenai edia kwarana idia atoa diho ela bona adorahi momokani, bona edia kwarana latanai kahu idia negea noho.
7 Iosua ia gwau: “Siahu Ibounai Lohiabadana Iehova e, inai taunimanima oi hakaua ela bona Ioridane idia hanaia, unai amo Amoro taudia dekenai ai oi henia idia hadikaia ore totona, a? Bema Ioridane ena ist kahana sibona dekenai ai noho be namo!
8 Iehova e, Israela taudia be edia inai taudia edia vairana amo idia heau dainai, hari dahaka do lau gwau?
9 Kanana taudia bona inai tano taudia ibounai be inai sivarai idia kamonai neganai, idia ese ai do idia koua hagegea bona tanobada amo emai ladana do ia boio momokani, bona edena bamona emu ladana badana do oi gimaia?”+
10 Iehova be Iosua dekenai ia gwau: “Oi toreisi! Dahaka dainai emu kwarana be tano dekenai oi atoa noho?
11 Israela taudia be idia kara dika. Idia lau oda henia do idia badinaia taravatu idia utua.+ Idia ese do idia hadikaia ore gaudia haida idia abia,+ oibe, idia henaoa+ bona edia kohu huanai idia hunia.+
12 Unai dainai, Israela taudia be do idia hegeregere lasi edia inai taudia idia tuari henia totona. Idia be edia inai taudia amo do idia heau, badina idia be do idia mase. Lau be umui ida do lau noho lou lasi ela bona umui huana amo dika tauna umui kokia.+
13 Oi toreisi bona taunimanima oi hamaoroa,+ ‘Kerukeru totona do umui hegaegae,* badina Iehova, Israela ena Dirava be inai bamona ia gwau: “Israela taudia e, dika tauna be emui huanai ia noho. Umui ese emui inai taudia do umui halusia diba lasi, ela bona unai tauna be emui huana amo umui kokia.
14 Daba ai Dirava kahirakahira do umui mai, bona iduhu ibounai huana amo Iehova ese ia abia hidi iduhu+ be do ia mai kahirakahira. Bona unai iduhu huana amo Iehova ese ia abia hidi besena be do ia mai kahirakahira, bona unai bese huana amo Iehova ese ia abia hidi ruma besena be do ia mai kahirakahira, bona unai ruma bese amo tau ta ta do idia mai kahirakahira.
15 Bona do idia hadikaia ore gauna ia abia tauna be do idia alaia mase bona lahi dekenai do idia gabua,+ ia, ena bese taudia, bona ia biagua gaudia ibounai, badina ia ese Iehova ena taravatu ia utua+ bona Israela lalonai hemarai karana ia karaia.”’”
16 Vadaeni murina dinana ena daba momokani ai, Iosua ia toreisi bona Israela taudia be Dirava kahirakahira ia hakaua lao, bona iduhu ibounai huana amo Iuda iduhu ia abia hidi.
17 Ia ese Iuda bese taudia ia hakaua mai kahirakahira bona Sera besena ia abia hidi, unai murinai Sera besena ia hakaua mai kahirakahira,+ bona Sabadi ena ruma bese ia abia hidi.
18 Dokonai Sabadi ena ruma bese ia hakaua mai kahirakahira, bona Akana ia abia hidi. Akana be Karami ena natuna mero, ia be Sabadi ena tubuna, Sera bese tauna, Iuda iduhu amo.+
19 Bena Iosua be Akana dekenai ia gwau: “Lauegu natuna e, mani emu kara Iehova, Israela ena Dirava oi matauraia bona ia dekenai emu kara oi gwauraia hedinarai. Mani oi karaia karana be lau dekenai oi gwauraia. Lau amo oi hunia lasi.”
20 Akana be Iosua dekenai ia gwau: “Momokani lau be lau kara dika vadaeni Iehova, Israela ena Dirava dekenai, bona lau karaia karana be inai.
21 Tuari amo idia abia gaudia huanai Sinara amo dabua namo hereana ta,+ 200 siliva sikel* bona golo ena metau be 50 sikel lau itaia neganai, lau ura henia dikadika bona lau abia. Unai gaudia be egu palai ruma lalonai, tano henunai lau hunia, moni danu be henunai ia noho.”
22 Maoromaoro Iosua ese gwaukau taudia ia siaia, bona Akana ena palai ruma dekenai idia heau lao, bona unuseniai dabua be palai ruma lalonai ia noho, bona moni be dabua henunai.
23 Vadaeni palai ruma amo unai gaudia idia abia bona Iosua bona Israela taudia ibounai dekenai idia abia lao, bena Iehova vairanai idia atoa.
24 Vadaeni Iosua bona ia ida idia noho Israela taudia ibounai ese Sera ena natuna mero Akana,+ siliva moni, dabua namo hereana, bona golo idia abia,+ bona ena natudia memero, ena natudia kekeni, ena boromakau, ena doniki, ena mamoe, ena palai ruma, bona ia biagua gaudia ibounai danu, bona Akoro Koura dekenai idia abia lao.+
25 Iosua ia gwau: “Dahaka dainai ai latanai dika oi mailaia?+ Iehova ese inai dina ai oi latanai dika do ia mailaia.” Vadaeni Israela taudia ibounai ese idia be nadi amo idia hodoa mase,+ unai murinai lahi amo idia gabua.+ Idia ibounai be unai dala amo idia hamasea.
26 Bena Akana latanai nadi idia haboua, bona unai nadi be idia do noho ema bona hari. Vadaeni Iehova ena badu mai siahuna ia keru.+ Unai dainai unai gabu ena ladana idia hatoa, Akoro* Koura, ema bona hari.
Futnout
^ Inai karoa ai, “natuna mero” be bese tauna ia herevalaia.
^ Anina be “Nadi Utua Gabuna.”
^ Eiava, “helaga.”
^ Anina be “Dika.”
