Iuda Ena Revareva 1:1-25
1 Lau be Iuda, Iesu Keriso ena hesiai tauna, to Iamesi ena tadina.+ Lau ese umui, Dirava ese ia boiria taudia lau tore henia.+ Umui be Tamana Dirava ese ia lalokau henia bona ia gimaia, Iesu Keriso ida do umui noho hebou totona.+
2 Mani Dirava ese umui dekenai hebogahisi, maino, bona lalokau ia habadaia.
3 Lauegu lalokau taudia e, guna lau ura bada umui lau tore henia bona ita ibounai ese ita abia hahemauri dalana lau herevalaia,+ to lau laloa umui do lau tore henia bona hagoadaia, Dirava ese helaga taudia dekenai nega tamona sibona ia henia abidadama umui gimaia totona.+
4 Umui lau tore henia ena badina be tatau haida be ita huanai idia vareai, gunaguna Toretore Helagadia ese idia gwauraia hegeregerena, Dirava ese idia dekenai inai hahemaoro do ia henia. Idia be Dirava idia badinaia lasi. Reana idia laloa, Dirava be mai ena hebogahisi hereadaena dainai, idia ese gwau-edeede hemarai karadia* idia karaia,+ bona iseda biaguna bona Lohiabada tamona, Iesu Keriso, idia abidadama henia lasi.+
5 Ena be inai gaudia ibounai umui diba vadaeni, to lau ura umui lau hadibaia lou, Iehova* ese Aigupito amo ena taunimanima ia hamauria,+ to gabeai abidadama idia hahedinaraia lasi taudia ia hadikaia ore.+
6 Danu, aneru haida be edia gaukara korikorina idia dogoatao lasi, to edia gabu maorona idia rakatania.+ Dirava ese idia be seini amo ia guia bona dibura masemase lalonai do idia noho ela bona hahemaoro dinana badana.+
7 Unai hegeregerena, Sodoma, Gomora, bona edia badina hanuadia danu be matabodaga karadia* dika rohorohodia idia karaia bona tauanina ena ura dikadia idia tahua goadagoada.+ Edia panisi be noho hanaihanai lahina, vadaeni edia haheitalai amo diba ita abia.+
8 Ena be unai haheitalai ia noho, to unai tatau be edia lalona dekenai gau dikadia sibona idia laloa, kara mirodia idia karaia, lohia taudia idia matauraia lasi, bona Dirava ese ia hanamoa taudia idia gwauraia dika.+
9 To aneru badana Mikaela+ be Diabolo ida Mose ena tauanina totona idia hepapahuahu neganai,+ ia manau bona Diabolo ia hahemaoro henia lasi,+ to ia gwau: “Iehova* ese oi do ia hahemaoro henia.”+
10 To unai tatau be idia lalopararalaia lasi gaudia ibounai idia gwauraia dika.+ Bona lalona lasi animal bamona+ idia lalopararalaia gaudia ibounai idia karaia, unai dala amo idia be sibona idia hadikaia.
11 Idia be dika do idia davaria, badina Kaino ena dala idia badinaia+ bona davana abia totona Balama ena dala kererena idia badinaia haraga,+ danu Kora ena gwau-edeede karana idia badinaia, unai dainai ia bamona do idia mase!+
12 Tadikaka huanai aria umui karaia neganai, unai tatau be ranu henunai idia hunia nadi bamona, umui ida idia aniani,+ bona idia be gari lasi mamoe naria taudia bamona, sibodia idia ubua.+ Danu, idia be lai ese ia odaia lao bona odaia mai ori bamona,+ to medu ia diho lasi. Bona idia be nega korikori ai huahua idia atoa lasi audia bamona, nega rua idia mase bona tano amo idia kokia.
13 Davara ena hurehure bada ese gwaragwara ia havaraia bamona, edia kara ese idia dekenai hemarai ia havaraia.+ Idia be dala korikori idia badinaia lasi hisiu bamona, unai dainai Dirava ese dibura masemase gabuna lalonai ia atodia bona unuseniai do idia noho ela bona hanaihanai.+
14 Oibe, Adamu murinai ia vara tauna namba 7, Enoka,+ ese idia ia perovetalaia danu, ia gwau: “Iehova* be ena aneru helagadia tausen momo* danu ia mai,+
15 taunimanima ibounai ia hahemaoro henia totona,+ bona ia idia matauraia lasi kara dika taudia ibounai edia kerere ia gwauraia hedinarai totona. Dirava ese unai ia karaia badina idia ese kara dika idauidau idia karaia, bona ia dekenai hadikaia herevadia idia gwauraia.”+
16 Unai tatau be maumau taudia,+ edia mauri dainai idia maumau momo, sibodia edia ura dikadia idia badinaia,+ sibodia idia heagilaia, bona sibodia edia namo totona haida idia hanamoa* koikoi.+
17 To umui, egu lalokau taudia e, iseda Lohiabada Iesu Keriso ena aposetolo taudia ese guna idia gwauraia herevadia,* mani umui laloa lou.
18 Nega momo umui dekenai idia gwau: “Nega dokonai hevaseha taudia do idia mai, bona sibodia edia ura dikadia do idia badinaia.”+
19 Unai tatau ese taunimanima idia hapararaia,+ edia kara be animal bamona,* bona Dirava ena lauma ese idia ia hakaua lasi.
20 To umui, egu lalokau taudia e, emui abidadama helagana umui hagoadaia, bona Dirava ena lauma ena heduru ida umui guriguri,+
21 unai amo Dirava ena lalokau lalonai do umui noho.+ Bona iseda Lohiabada Iesu Keriso ena hebogahisi umui naria noho, unai ese dala do ia kehoa mauri hanaihanai umui abia totona.+
22 Danu, idia daradara taudia dekenai+ hebogahisi umui hahedinaraia noho.+
23 Idia umui hamauria totona,+ lahi amo idia umui veria siri. To ma haida dekenai hebogahisi umui hahedinaraia noho lalonai, do umui naria namonamo, bona idia karaia kara dikadia amo idia hamiroa dabua umui inai henia.+
24 Dirava be umui ia naria diba, vadaeni do umui moru lasi, bona umui do ia durua mai goeva bona moale bada ida iena hairai lalonai do umui gini,+
25 iseda Dirava tamona ese iseda Lohiabada Iesu Keriso amo ita ia hamauria. Ia dekenai hairai, hemataurai, goada, bona gau ibounai biagua siahuna ia noho be maoro, gunaguna amo ela bona hanaihanai. Amen.
Futnout
^ Eiava “ten tausen momo.”
^ Eiava “edia kara idia moalelaia.”
^ Eiava “idia perovetalaia gaudia.”
^ Eiava “tauanina gaudia idia laloa bada.”
