Aposetolo Edia Kara 17:1-34
17 Vadaeni idia be Amepipoli bona Apolonia amo idia hanaia lao bona Tesalonika dekenai idia ginidae.+ Unuseniai Iuda taudia edia sinagoga ta ia noho.
2 Vaia Paulo ena kara hegeregerena,+ sinagoga lalonai ia vareai, bona sabati toi lalonai idia ia durua Toretore Helagadia idia lalopararalaia totona,+
3 unai toretore amo ia hahedinaraia goevagoeva bona ia hamomokania, Keriso be hisihisi ia abia+ bena mase amo ia toreisi lou be mai anina bada.+ Ia gwau: “Inai Iesu, umui dekenai lau harorolaia tauna, be Keriso.”
4 Unai dainai, idia haida be abidadama taudia ai idia lao bena Paulo bona Sila idia bamoa.+ Bona Dirava idia tomadiho henia Grik taudia hutuma, bona dagi bada hahine momo be unai bamona idia karaia danu.
5 To Iuda taudia be idia mama,+ bona maketi gabuna dekenai idia loa kava tatau dikadia haida idia haboua bona siti lalonai heiriheiri bada idia havaraia. Mai dagedage ida Iasoni ena ruma lalonai idia vareai, bona idia ura Paulo bona Sila be idia haboua hutuma dekenai idia veria lao.
6 To idia ruaosi idia davaria lasi neganai, Iasoni bona tadikaka ma haida be siti biagudia dekenai idia veria lao bona idia boiboi: “Gabu ibounai dekenai kerere idia havaraia tatau be hari iniseniai idia noho danu,+
7 bona Iasoni ese iena ruma dekenai idia ia abia dae. Unai tatau ibounai be Kaisara ena oda herevana idia badinaia lasi, idia gwau king ma ta ia noho, unai be Iesu.”+
8 Hutuma bona siti biagudia be unai hereva idia kamonai neganai, idia badu.
9 Vadaeni siti biagudia ese Iasoni bona ma haida idia doria moni* idia henia totona, unai murinai idia ruhadia.
10 Maoromaoro gabu ia dibura neganai, tadikaka ese Paulo bona Sila be Berea dekenai idia siaia lao. Unuseniai idia ginidae neganai, Iuda taudia edia sinagoga lalonai idia vareai.
11 Berea ai idia noho Iuda taudia be laloa namonamo taudia, Tesalonika taudia bamona lasi, badina mai edia ura bada ida Dirava ena hereva idia kamonai. Bona dina ta ta ai Toretore Helagadia idia tahua namonamo, badina idia ura diba bema idia kamonai herevadia be momokani eiava lasi.
12 Unai dainai, idia momo be abidadama taudia ai idia lao, bona ladana bada Grik hahine bona tatau haida danu.
13 To Tesalonika ai idia noho Iuda taudia idia kamonai, Berea dekenai danu Paulo be Dirava ena hereva ia harorolaia neganai, unuseniai idia mai bona hutuma idia hauraia bona heiriheiri idia havaraia.+
14 Vadaeni maoromaoro tadikaka ese Paulo be kone kahanai idia siaia lao,+ to Sila bona Timoteo be Berea ai idia noho.
15 Haida ese Paulo idia hakaua lao ela bona Atena dekenai, bena Paulo ese ia hamaorodia Sila bona Timoteo+ be ia dekenai do idia mai haraga, vadaeni ia idia rakatania.
16 Paulo be Atena ai Sila bona Timoteo ia naria noho lalonai, ia itaia unai siti be kaivakuku amo ia honu, unai dainai ia moale lasi.
17 Vadaeni sinagoga ai Iuda taudia bona Dirava idia tomadiho henia taudia ma haida ida ia herevahereva. Bona dina ta ta ibounai maketi gabunai idia loaloa taudia ia haroro henidia danu.
18 To Epikuro taudia* bona Stoa edia aonega taudia* haida be Paulo ida idia hepapahuahu matamaia, bona haida idia gwau: “Inai herevahereva momo kavakava tauna ia ura dahaka ia gwauraia?” Bona ma haida idia gwau: “Toana be ia be idau diravadia ia harorolaia tauna.” Unai bamona idia hereva badina ia be Iesu ena sivarai namona bona toreisi lou ia harorolaia.+
19 Vadaeni ia idia dogoatao bona Areopagu* dekenai idia hakaua lao, idia gwau: “Ia namo oi harorolaia noho hadibaia hereva matamatana be ai dekenai oi hadibaia?
20 Badina oi ese guna ai kamonai lasi gaudia haida oi herevalaia noho, bona ai ura edia anina ai diba.”
21 Oibe, Atena taudia ibounai bona idau tano amo idia vadivadi taudia be edia laga-ani negadia ai idia ura bada sivarai matamata idia kikilaia eiava idia kamonai.
22 Vadaeni Areopagu ai, Paulo be huanai ia gini+ bona ia gwau:
“Atena taudia e, lau itaia gau ibounai lalonai toana be umui ese dirava idauidau umui badinaia goadagoada,* ma haida be unai bamona idia karaia lasi.+
23 Hegeregere, emui siti lalonai lau loaloa bona umui tomadiho henia gaudia lau itaia neganai, boubou patana ta danu lau davaria, iena latanai inai hereva idia torea, ‘Ita Diba Lasi Diravana Ena.’ Unai dainai umui diba lasi to umui tomadiho henia noho Diravana, ena sivarai be hari umui dekenai do lau harorolaia.
24 Tanobada bona ia lalonai idia noho gaudia ibounai ia karaia Diravana be guba bona tanobada edia Lohiabada,+ bona ia be taunimanima edia imana amo idia karaia dubu lalodiai ia noho lasi.+
25 Bona taunimanima ese ia idia durua be anina lasi,+ badina ia be gau ta dekenai ia dabu lasi. Ia ese taunimanima ibounai dekenai mauri, laga+ bona gau ibounai ia henia.
26 Bona ia ese tau tamona amo+ bese ibounai taudia ia karaia, tanobada ibounai dekenai idia noho totona.+ Bona ia sibona ese nega ia makaia bona taunimanima idia noholaia gabudia edia hetoana ia makaia.+
27 Unai amo Dirava do idia tahua, bema ia idia tahua goadagoada, ia do idia davaria diba.+ To momokani, ia be ita ta ta amo ia daudau lasi.
28 Badina ia dainai ita mauri, ita raka loaloa bona ita noho. Emui toretore taudia haida idia hereva bamona, idia gwau, ‘Ita danu be iena natudia.’
29 Unai hegeregerena, ita be Dirava ena natudia dainai,+ namo lasi ita laloa Dirava be golo, siliva eiava nadi bamona, eiava taunimanima edia lalohadai hegeregerena edia imana amo idia koroa gauna bamona.+
30 Oibe, gunaguna taunimanima be unai idia diba lasi bona Dirava ese unai ia laloa lasi.+ To hari ia ese taunimanima ibounai ia hadibaia noho idia helalo-kerehai be namo.
31 Badina ia ese dina ta ia makaia vadaeni, ia abia hidi vadaeni tauna ese mai kara maoromaoro ida tanobada ibounai do ia hahemaoro henia.+ Bona Dirava ese mase amo unai tauna ia hatorea isi lou karana amo, taunimanima dekenai ia hamomokania, unai be do ia karaia momokani.”+
32 Vadaeni, mase taudia do idia toreisi lou herevana idia kamonai neganai, haida ese unai idia kirikirilaia,+ to ma haida idia gwau: “Nega ma ta ai emu hereva do ai kamonai lou.”
33 Vadaeni Paulo ese idia ia rakatania,
34 to tatau haida be ia idia bamoa bona abidadama taudia ai idia lao. Idia huanai ta be Dionusio, ia be Areopagu ena kota diadi tauna ta, bona hahine ta ladana Damari, bona ma haida danu.
