Aposetolo Edia Kara 3:1-26
3 Dina ta Petero bona Ioane be guriguri totona dubu helaga dekenai idia daekau lao, unai be adorahi 3 oklok,*
2 bona tau ta be taunimanima ese idia huaia lao. Ia be ia vara negana amo ena aena idia dika. Dina ta ta ai, idia ese ia be dubu helaga ena geiti ladana Hairai badinai idia atoa, unai amo dubu helaga lalonai idia vareai taudia amo moni totona ia noinoi diba.
3 Ia itaia Petero bona Ioane be dubu helaga lalonai idia vareai gwauraia neganai, idia dekenai moni totona ia noinoi matamaia.
4 To Petero bona Ioane be ia idia itaia. Bena Petero ia gwau: “Ai oi itaia.”
5 Vadaeni idia ia raraia, ia laloa idia amo gau ta do ia abia.
6 To Petero ia gwau: “Lau dekenai siliva bona golo be lasi, to lau dekenai ia noho gauna be oi dekenai do lau henia. Nasareta tauna Iesu Keriso ena ladanai oi lau hamaoroa, oi raka!”+
7 Bena Petero be unai tauna ena imana idibana ia dogoatao bona ia veria isi.+ Maoromaoro unai tauna ena aena idia goada,+
8 bena ia roho isi,+ ia gini bona ia raka matamaia. Bona idia ida dubu helaga lalonai ia vareai, ia raka, ia roho isi, bona Dirava ia hanamoa.
9 Vadaeni taunimanima ese idia itaia ia raka bona Dirava ia hanamoa noho.
10 Bona idia laloparara ia be guna dubu helaga ena Hairai Geiti badinai ia helai bona moni totona ia noinoi tauna.+ Ia dekenai ia vara gauna dainai idia hoa bada.
11 Unai tauna ese Petero bona Ioane edia imana ia dogoatao noho lalonai, taunimanima ibounai be idia dekenai idia heau lao haraga, gabu ladana Solomona Ena Du* dekenai+ bona idia hoa bada.
12 Petero be unai ia itaia neganai, taunimanima dekenai ia gwau: “Israela taudia e, dahaka dainai inai gauna dekenai umui hoa? Bona dahaka dainai ai umui raraia noho, hegeregere ai sibona emai siahu amo eiava Dirava ai badinaia dainai inai tauna ai hanamoa?
13 Aberahamo, Isako, bona Iakobo edia Dirava,+ iseda sene taudia edia Dirava, ese ena Hesiai Tauna, Iesu, dekenai hairai ia henia.+ To umui ese ia be taunimanima edia imana dekenai umui atoa,+ bona ena be Pilato ia ura ia ruhaia, to ia vairanai umui ese ia umui dadaraia.
14 Oibe, umui ese unai helaga bona kara maoromaoro tauna umui dadaraia. Bona Pilato umui noia, ala-ala tauna do ia ruhaia,+
15 bona umui ese mauri ia henia Gunalaia Tauna Badana umui hamasea.+ To ia be mase amo Dirava ese ia hatorea isi lou, bona ai ese unai ai itaia.+
16 Iesu ena ladana amo, bona unai ladana ai abidadama henia dainai, hari umui itaia bona diba tauna ena aena idia goada. Oibe, Iesu ai abidadama henia dainai, inai tauna be umui ibounai vairanai ia namo.
17 Vadaeni tadikaka e, lau diba umui diba lasi dainai unai bamona umui karaia,+ emui lohia taudia idia karaia bamona.+
18 To inai dala ai Dirava ese guna peroveta taudia ibounai edia uduna amo ia gwauraia herevadia ia hagugurua, unai be iena Keriso ese hisihisi do ia abia.+
19 “Unai dainai umui helalo-kerehai,+ bona Dirava dekenai umui giroa,+ unai amo emui kara dika do ia kokia,+ bona Iehova sibona* amo goada matamata do umui abia,
20 bona umui totona ia abia hidi tauna, Keriso, Iesu unai, do ia siaia.
21 Ia be guba dekenai do ia naria ela bona gau ibounai hanamoa lou negana ia matamaia. Dirava ese gunaguna peroveta taudia helagadia edia uduna amo ia gwauraia hegeregerena.
22 Oibe, Mose ia gwau: ‘Iehova* emui Dirava ese emui tadikaka huanai umui totona peroveta tauna ta do ia abia hidi, lau bamona.+ Namona be umui dekenai ia gwauraia herevadia umui kamonai.+
23 Oibe, unai Peroveta Tauna ia kamonai henia lasi tauna be taunimanima huanai amo Dirava ese do ia hamasea.’+
24 Peroveta taudia ibounai, Samuela bona ia murinai idia mai taudia ese inai nega idia gwauraia hedinarai danu.+
25 Umui be peroveta taudia edia natudia bona Dirava ese emui sene taudia ida ia karaia gwaubou amo namo do umui abia.+ Aberahamo dekenai ia gwau: ‘Bona emu natuna* amo tanobada besedia ibounai be hahenamo do idia abia.’+
26 Dirava ese ena Hesiai Tauna ia abia hidi murinai,+ umui dekenai ia siaia umui ia hanamoa guna totona, unai amo umui ta ta do ia durua emui kara dikadia umui rakatania totona.”
