Revareva ta Kolose Taudia Dekenai 3:1-25
3 To bema Dirava ese Keriso ida umui ia hatorea isi lou vadaeni,+ namona be guba gaudia do umui tahua noho, unuseniai Keriso be Dirava ena idibana kahanai ia helai.+
2 Guba gaudia do umui laloa noho,+ to tanobada gaudia do umui laloa lasi.+
3 Badina umui mase vadaeni bona emui mauri be Keriso ida ia hunia, Dirava ena ura hegeregerena.
4 Keriso, iseda mauri unai,+ ia hedinarai neganai, umui danu be ia ida hairai lalonai do umui hedinarai.+
5 Unai dainai tanobada ai emui tauanina ena kahana idauidau umui hamasea,+ hegeregere matabodaga karadia,* kara mirodia, matabodaga karadia ura henia dikadika,+ ura dikadia, bona mataganigani, kaivakuku tomadiho henia karana unai.
6 Unai gaudia dainai Dirava ena badu be do ia mai.
7 Emui mauri dalana gunana ai umui danu be unai bamona gaudia umui karaia.+
8 To hari namona be inai kara ibounai umui rakatania, badu dikadika, kara dikadia,+ hadikaia herevadia,+ bona emui uduna amo hereva mirodia+ umui gwauraia lasi.
9 Umui ta ta dekenai umui koikoi lasi.+ Mauri gunana mai ena kara idauidau umui kokia,+
10 bona mauri matamata be dabua bamona do umui atoa,+ ia be diba maoromaoro amo ia vara bona ia matamata ia lao noho, ia havaraia Tauna ena toana hegeregerena.+
11 Unai dainai Grik tauna eiava Iuda tauna be lasi, kopina utua eiava kopina utua lasi karana be lasi, danu idau tano tauna, Sitia tauna,* igui hesiai tauna, eiava ura kwalimu tauna be lasi, to Keriso be gau ibounai bona ia be ibounai lalonai.+
12 Umui be Dirava ena abia hidi taudia,+ helaga taudia bona Dirava ese umui ia lalokau henia dainai, inai bamona kara be dabua bamona do umui atoa, hebogahisi,+ hariharibada, lalomanau,+ manau,+ bona haheauka.+
13 Bema ta be badina ta dainai ma ta dekenai ia maumau, ta ta emui kara do umui haheaukalaia noho+ bona mai kudouna ibounai ida do umui gwauatao heheni.+ Iehova* ese mai kudouna ibounai ida umui ia gwauatao hegeregerena, namona be umui danu be unai bamona umui karaia.+
14 Bona unai gaudia sibona lasi, to lalokau be dabua bamona do umui atoa danu,+ badina ia be taunimanima ia hatamonaia gauna hereadaena.+
15 Danu, Keriso ena maino ese emui kudouna ia biagua be namo,+ badina Dirava ese umui ia boiria unai amo tauanina tamona ai umui lao bona maino ai do umui noho. Bona tanikiu karana do umui hahedinaraia.
16 Namona be Keriso ena hereva be emui lalona ai do ia noho momokani bona aonega ibounai do umui abia. Umui ta ta umui hadibaia bona hagoadaia* noho, bona ane helagadia,+ Dirava hanamoa anedia bona tomadiho ane mai tanikiu* ida umui abia. Emui kudouna ai Iehova* dekenai ane do umui abia.+
17 Bona herevana dahaka umui gwauraia eiava karaia, Lohiabada Iesu ena ladana ai gau ibounai do umui karaia, ia amo Dirava iseda Tamana do umui tanikiu henia.+
18 Umui hahine e, emui tatau henunai do umui noho,+ Lohiabada vairanai unai be maoro.
19 Umui tatau e, emui hahine do umui lalokau henia noho+ bona idia dekenai do umui badu dikadika* lasi.+
20 Umui natudia e, gau ibounai dekenai emui tama sina do umui kamonai henia,+ badina Lohiabada ese unai ia moalelaia.
21 Umui tama e, emui natudia do umui habadua lasi,+ dika idia lalohisihisi.*
22 Umui igui hesiai taudia e, gau ibounai dekenai emui tanobada biagudia do umui kamonai henia,+ idia ese umui idia itaia negadia sibona lasi, taunimanima idia ura hamoalea taudia idia karaia bamona, to mai kudouna ibounai ida bona Iehova* gari henia karana ida umui karaia.
23 Herevana dahaka umui karaia, mai emui kudouna bona goada ibounai ida do umui karaia, Iehova* totona umui karaia+ bona taunimanima totona lasi.
24 Badina umui diba, umui ese Iehova* amo ahuna do umui abia.+ Biaguna Keriso ena hesiai gaukara do umui karaia.
25 Momokani, kerere ia karaia tauna ese ia karaia kerere davana do ia abia lou.+ Dirava ese maka tamona dekenai taunimanima ia hahemaoro henia.+
Futnout
^ “Sitia tauna” be ena kara bona kastom dainai idia laloa maragi tauna ia herevalaia.
^ Eiava “sisiba henia.”
^ Eiava “ane namodia.”
^ Eiava “idia do umui kara auka henia.”
^ Eiava “lalomanoka.”
