Revareva ta Roma Taudia Dekenai 10:1-21
10 Tadikaka e, egu kudouna amo lau ura gauna bona Dirava lau noinoi henia goadagoada gauna be inai, ia ese Israela taudia do ia hamauria.+
2 Idia dekenai lau gwauraia hedinarai, idia be idia ura dikadika Dirava idia hesiai henia,+ to diba maoromaoro hegeregerena idia karaia lasi.
3 Badina idia be Dirava ena kara maoromaoro idia diba lasi,+ to sibona edia kara maoromaoro idia haginia toho dainai,+ idia be Dirava ena kara maoromaoro idia badinaia lasi.+
4 Keriso be Taravatu* ena dokona,+ unai amo ia idia abidadama henia noho taudia ibounai be kara maoromaoro taudia ai do idia lao.+
5 Taravatu ia badinaia bona ia kara maoromaoro tauna be Mose ese ia herevalaia, ia gwau: “Taravatu ia badinaia tauna be do ia mauri.”+
6 To abidadama amo ia vara kara maoromaoro dainai, Toretore Helagadia be inai bamona ia gwau: “Emui kudouna ai umui gwau lasi,+ ‘Daika be guba dekenai do ia daekau?’+ Anina be, Keriso ia abia diho mai totona,
7 eiava ‘Daika be guri dobu masemase lalonai do ia diho?’+ Anina be, Keriso be mase amo ia hatorea isi lou totona.”
8 To Toretore Helagadia be dahaka ia gwau? “Hereva be oi kahirakahira, emu uduna ai bona emu kudouna lalonai ia noho,”+ unai be abidadama ena “hereva,” ai harorolaia gauna.
9 Bema taunimanima vairanai oi gwauraia hedinarai Iesu be Lohiabada,+ bona emu kudouna ai oi abidadama Dirava ese ia be mase amo ia hatorea isi lou, oi be do oi mauri.
10 Badina tau ta be ena kudouna ai ia abidadama neganai, ia be kara maoromaoro tauna ai ia lao, to ena uduna amo unai abidadama ia gwauraia hedinarai neganai,+ ia be hahemauri do ia abia.
11 Toretore Helagadia ia gwau: “Ia dekenai ia abidadama tauna be do ia lalohisihisi lasi.”+
12 Iuda taudia bona Grik taudia ibounai be hegeregere,+ badina ibounai edia Lohiabada be tamona. Ia ese hahenamo momo be ia dekenai idia boiboi taudia ibounai dekenai do ia henia.
13 Badina “Iehova* ena ladanai idia boiboi taudia ibounai be mauri do idia abia.”+
14 To, edena bamona ta idia boiboi henia diba bema ia idia abidadama henia lasi? Bona edena bamona ta idia abidadama henia diba bema iena sivarai idia kamonai lasi? Bona edena bamona ta idia dibaia diba bema ta ia haroro lasi?
15 Bona edena bamona idia haroro diba bema ta ese idia ia siaia lasi?+ Toretore Helagadia ia gwau bamona: “Sivarai namona idia gwauraia taudia edia aena be mai hairai!”+
16 To idia haida ese sivarai namona idia badinaia lasi. Isaia ia gwau: “Iehova* e, daika ese ai gwauraia gaudia ia abidadama henia?”+
17 Vadaeni taunimanima be hereva idia kamonai murinai, idia abidadama.+ Bona idia ese unai hereva idia kamonai, bema ta ese idia dekenai Keriso ia herevalaia.
18 To lau henanadai, idia be idia kamonai lasi, a? Lasi, idia be idia kamonai, badina “edia gado regena be tanobada ibounai dekenai ia lao, bona edia hereva be tanobada ena dokona momokani dekenai ia lao.”+
19 To lau henanadai, Israela taudia be idia diba lasi, a?+ Guna Mose ia gwau: “Idau bese taudia amo emui lalona do lau hauraia bena do umui mama, bona kavakava besena amo umui do lau habadua.”+
20 To Isaia ia gari lasi bona ia gwau: “Lau idia tahua lasi taudia ese lau idia davaria,+ bona lau totona idia henanadai lasi taudia be lau idia dibaia.”+
21 To Israela taudia be inai bamona ia herevalaia, ia gwau: “Dina ibounai lalonai, kamonai lasi bona hereva haloua besena dekenai egu imana lau kehoa noho.”+
