Revareva ta Roma Taudia Dekenai 12:1-21
12 Unai dainai tadikaka e, Dirava ena hebogahisi dainai umui lau noia, emui tauanina do umui henia,+ ia be boubou gauna bamona mai mauri, mai helaga,+ bona Dirava ese ia moalelaia, unai amo mai laloa namonamo ida hesiai gaukara helagana do umui karaia.+
2 Bona inai nega oromana* ai idia noho taudia do umui tohotohoa lasi, to emui lalona do umui hamatamataia karana amo emui kara do umui haidaua noho.+ Vadaeni umui sibona dekenai do umui hamomokania+ Dirava ena ura be ia namo, ia ese ia abia dae bona ia goevadae.
3 Dirava ese lau dekenai ia henia hebogahisi hereadaena amo, umui huanai idia noho taudia ta ta lau hamaoroa, namo lasi sibona do ia laloa bada, to ena laloa dalana amo do ia hahedinaraia ia laloa maoromaoro,+ bona Dirava ese ta ta dekenai ia henia abidadama hegeregerena, unai do ia karaia.+
4 Tauanina ena kahana be momo,+ bona unai kahana ta ta be mai edia gaukara idauidau,
5 unai hegeregerena, ena be ita be momo, to Keriso ida ita hakapua dainai ita be tauanina tamona, bona ita be tauanina ena kahana idauidau to ita gaukara hebou.+
6 Vadaeni, Dirava ese ita dekenai ia henia hebogahisi hereadaena hegeregerena, harihari gaudia idauidau ita abia.+ Bema unai be peroveta gaukarana, namona be Dirava ese ita dekenai ia henia abidadama hegeregerena ita peroveta.
7 Eiava bema unai be hesiai gaukara, namona be unai hesiai gaukara ita karaia. Eiava bema ta be ma haida ia hadibaia, namona be ena hadibaia gaukara ia karaia noho.+
8 Eiava bema ta be ma haida ia hagoadaia, namona be haida ia hagoadaia noho.+ Eiava bema ta be gau ia hariharilaia, namona be mai moale ida ia hariharilaia.+ Eiava bema ta be naria tauna, namona be ena gaukara ia karaia namonamo.+ Eiava bema ta be hebogahisi ia hahedinaraia, namona be mai moale ida ia karaia.+
9 Namona be emui lalokau be lalokau koikoina lasi.+ Kara dika do umui inai henia,+ bona kara namo do umui dogoatao auka.
10 Namona be emui abidadama tamona taudia do umui hebogahisi henia bona lalokau henia, tadikaka idia lalokau heheni bamona. Bona umui ta ta dekenai hemataurai hahedinaraia karana do umui gunalaia.+
11 Umui gaukara goada, umui lahedo lasi.+ Dirava ena lauma amo umui hururuhururu.+ Iehova* totona hesiai gaukara umui karaia.+
12 Emui helaro dainai umui moale. Hisihisi umui haheaukalaia.+ Guriguri umui hadokoa lasi.+
13 Helaga taudia edia dabu hegeregerena, idia umui durua.+ Heabidae karana ena dala umui badinaia.+
14 Dirava umui noia umui idia dagedage henia taudia do ia hanamoa noho,+ to idia do ia gwauraia dika lasi.+
15 Idia moale taudia ida umui moale, bona idia taitai taudia ida umui taitai.
16 Sibona umui laloa hegeregerena ma haida umui laloa. Hekokoroku lalohadai umui abia lasi, to namona be lalomanau ese umui do ia hakaua.+ Namo lasi umui laloa umui be aonega taudia.+
17 Tau ta ena dika davana umui haloua lasi.+ Dala umui tahua, taunimanima ibounai vairanai kara namodia umui karaia totona.
18 Bema mai dalana bona bema umui karaia diba, taunimanima ibounai ida maino ai do umui noho.+
19 Egu lalokau taudia e, ta ena dika davana umui haloua lasi, to Dirava sibona ese ia dekenai ena badu do ia hahedinaraia,+ badina Toretore Helagadia ia gwau: “Iehova* ia gwau, ‘Dika ena davana be lauegu, lau ese davana do lau haloua.’”+
20 To “bema emu inai tauna ia hitolo, aniani oi henia, bema ia ranu mase, ranu oi henia ia inua totona, badina unai bamona oi karaia neganai, oi ese lahi gidadia be iena kwarana ai oi haboua bamona.”*+
21 Namo lasi dika ese oi ia halusia, to kara namo amo dika oi halusia noho.+
Futnout
^ Unai be, ta hamanaua bona ena kara auka koua karana.
