Revareva ta Roma Taudia Dekenai 13:1-14
13 Namona be taunimanima ibounai be gavamani henunai do idia noho,+ badina bema Dirava ese gwaumaoro ia henia lasi, gavamani ta be do ia noho lasi.+ Idia noho gavamani ibounai be Dirava ese ia henia dagi idauidau hegeregerena idia noho.+
2 Unai dainai, gavamani ia dadaraia tauna be Dirava ese ia haginia dalana ia dadaraia. Unai dala idia dadaraia taudia be hahemaoro do idia abia.
3 Idia lohia taudia be taunimanima ese idia gari henia. Kara namo idia karaia taudia ese idia gari henia lasi, to kara dika idia karaia taudia ese idia gari henia.+ Bema oi ura lasi gavamani oi gari henia, namona be kara namo oi karaia noho+ bona gavamani ese oi do ia hanamoa,
4 badina ia be Dirava ena hesiai tauna, oi ia durua totona. To bema oi be kara dika oi karaia noho, oi gari be namo, badina gavamani be tuari kaia ia dogoatao kava lasi, ia be Dirava ena hesiai tauna, bona ia ese kara dika ia karaia noho tauna do ia panisia.
5 Unai dainai namona be idia lohia gavamani taudia henunai umui noho, Dirava ena badu umui laloa dainai sibona lasi, to emui lalomamina dainai danu.+
6 Unai badina dainai umui danu ese takisi umui henia noho, badina idia be Dirava ena hesiai taudia bona hanaihanai unai gaukara idia karaia.
7 Ta ta ibounai dekenai edia gaukara davana do umui henia. Takisi gogoa tauna dekenai takisi do umui henia.+ Gavamani ena moni be gavamani dekenai do umui henia. Idia gari henia tauna do umui gari henia,+ bona idia matauraia tauna do umui matauraia.+
8 Namo lasi umui be mai emui abitorehai ma ta dekenai, to umui lalokau heheni sibona,+ badina ena dekena tauna ia lalokau henia tauna ese taravatu ia hagugurua.+
9 Badina taravatu ia gwau, “Namo lasi oi heudahanai,+ namo lasi oi ala-ala,+ namo lasi oi henaohenao,+ ma haida edia gau oi ura henia dikadika lasi.”+ Unai ibounai bona taravatu oredia ma haida be inai hereva tamona lalonai: “Namona be emu dekena tauna oi lalokau henia, oi sibona oi lalokau henia hegeregerena.”+
10 Mai ena lalokau tauna ese ena dekena tauna ia kara dika henia lasi.+ Unai dainai lalokau ese taravatu ia hagugurua.+
11 Unai bamona umui karaia, badina umui be hari ita noho negana umui diba. Hari be mahuta amo umui noga negana,+ badina iseda hahemauri be kahirakahira, guna abidadama taudia ai ita lao negana bamona lasi.
12 Hanuaboi be kahirakahira do ia ore bona dina be kahirakahira do ia hedinarai. Unai dainai namona be dibura karadia ita kokia+ bona diari ena tuari dabuadia ita atoa.+
13 Namona be ita raka namonamo,+ dina ai ita raka hegeregerena. Namo lasi regerege bada pati, kekero, matabodaga karadia, bona gwau-edeede hemarai karadia* ita karaia,+ bona namo lasi ita heai bona ita mama.+
14 Lohiabada Iesu Keriso ena kara do umui tohotohoa,+ bona tauanina ena ura karaia totona umui palani guna lasi.+
