Revareva ta Roma Taudia Dekenai 6:1-23
6 Vadaeni dahaka do ita gwau? Kara dika do ita karaia noho, Dirava ese ena hebogahisi hereadaena do ia habadaia totona, a?
2 Lasi momokani! Ita be kara dika dekenai ita mase dainai,+ edena bamona kara dika lalonai ita mauri noho diba?+
3 Eiava umui diba lasi, a? Keriso Iesu lalonai bapatiso ita abia taudia ibounai+ be iena mase lalonai ita bapatiso.+
4 Unai dainai ita be ena mase lalonai bapatiso ita abia karana amo,+ Dirava ese ita be ia ida ia guria hebou. Vadaeni Tamana ena siahu* amo Keriso be mase amo ia hatorea isi lou hegeregerena, ita danu be mauri dala matamatana ita badinaia be namo.+
5 Bema ita be ia mase hegeregerena ita mase,+ vadaeni ita be ia toreisi lou hegeregerena do ita toreisi lou, bona unai dala ai ita be ia ida ita hakapua.+
6 Ita diba iseda kara gunana be ia ida au dekenai idia kokoa kau,+ unai amo iseda tauanina ai ia noho kara dika ese gau ta do ia hagugurua lasi.+ Vadaeni kara dika ena igui hesiai gaukara do ita karaia lou lasi.+
7 Badina ia mase vadaeni tauna be ena kara dika amo ia ruhaia.
8 Danu, bema ita be Keriso ida ita mase, ita abia dae ita be ia ida do ita mauri danu.
9 Badina ita diba Keriso be mase amo ia toreisi lou vadaeni+ bona ia be do ia mase lou lasi+ bona mase ese do ia biagua lasi.
10 Ia be nega tamona sibona kara dika kokia totona ia mase,+ to ia be Dirava totona ia mauri noho.
11 Unai hegeregerena, umui danu umui laloa umui be kara dika dekenai umui mase vadaeni, to Keriso Iesu amo umui be Dirava totona umui mauri noho.+
12 Unai dainai, namo lasi kara dika be king bamona emui mase diba tauanina ia biagua,+ unai amo tauanina ena ura umui badinaia.
13 Namo lasi emui tauanina be kara dika dekenai umui henia, kara maoromaoro lasi tuari gaudia bamona, to Dirava dekenai sibona umui henia, mase amo idia mauri lou taudia bamona, danu emui tauanina be kara maoromaoro ena tuari gaudia bamona Dirava dekenai umui henia.+
14 Namo lasi kara dika ese umui ia biagua, badina umui be taravatu henunai umui noho lasi,+ to hebogahisi hereadaena henunai umui noho.+
15 Vadaeni dahaka do ita gwau? Ita be taravatu henunai ita noho lasi, to hebogahisi hereadaena henunai ita noho dainai, kara dika ta ita karaia be namo, a?+ Lasi momokani!
16 Umui diba lasi, a? Bema umui ese ta dekenai sibona umui henia, bona igui hesiai tauna bamona ia umui kamonai henia, umui be iena igui hesiai taudia.+ Unai dainai bema umui be kara dika ena igui hesiai taudia,+ umui be do umui mase,+ to bema umui be kamonai karana ena hesiai taudia, umui be kara maoromaoro taudia.
17 Dirava lau tanikiu henia badina guna umui be kara dika ena igui hesiai taudia, to umui dekenai idia henia hadibaia herevadia be mai kudouna ibounai ida umui badinaia.
18 Oibe, umui be kara dika amo ia ruhaia dainai,+ umui be kara maoromaoro ena hesiai taudia ai umui lao.+
19 Umui be kara dika dainai umui manoka, unai dainai taunimanima ese idia lalopararalaia herevadia lau gaukaralaia. Badina guna umui be kara mirodia bona kara dika edia igui hesiai taudia bamona emui tauanina umui henia, kara dika umui karaia totona, to hari umui be kara maoromaoro ena hesiai taudia bamona emui tauanina umui henia, kara helagadia umui karaia totona.+
20 Badina guna umui be kara dika ena igui hesiai taudia neganai, kara maoromaoro ese umui ia biagua lasi.
21 Umui be kara dika ena igui hesiai taudia neganai, edena bamona huahua umui havaraia? Unai gaudia dainai hari umui hemarai. Badina unai gaudia edia dokona be mase.+
22 To, hari umui be kara dika ena igui lalonai umui noho lasi, to umui be Dirava ena hesiai taudia ai umui lao, bona umui havaraia huahua be kara helagana,+ bona dokonai be mauri hanaihanai.+
23 Badina kara dika ena davana be mase,+ to Dirava ese Keriso Iesu iseda Lohiabada amo ia henia harihari gauna be mauri hanaihanai.+
Futnout
^ Gr., “hairai.”
