Ruta 1:1-22
1 Hahemaoro taudia edia lohia* negana lalonai,+ Israela dekenai hitolo bada ia vara. Bona tau ta be Iuda ena siti Betelehema+ amo Moaba tano dekenai ia lao, idau tauna bamona ia noho totona.+ Ia be ena adavana bona natudia memero rua ida ia lao.
2 Unai tau ena ladana be Elimeleka* bona ena adavana ena ladana be Naomi,* bona ena natudia memero rua edia ladadia be Malona* bona Kiliona.* Idia be Eparata taudia, Iuda ena siti Betelehema amo. Bona idia be Moaba tano dekenai idia lao bona unuseniai idia noho.
3 Gabeai Naomi ena adavana Elimeleka ia mase, bona Naomi be ena natudia memero rua ida ia noho.
4 Iena natudia memero ese gabeai Moaba hahinedia idia adavaia, ta ena ladana be Oropa bona ma ta ena ladana be Ruta.+ Idia be lagani 10 bamona unuseni idia noho.
5 Bena Naomi ena natudia rua, Malona bona Kiliona, danu idia mase, vadaeni Naomi be natudia lasi bona adavana lasi.
6 Unai dainai ia be ena ravana hahinedia ida Moaba tano idia rakatania, ena hanua dekenai idia giroa lou totona, badina Moaba ai ia kamonai, Iehova ese iena taunimanima ia hanamoa lou bona idia dekenai aniani* ia henia.
7 Naomi be ena ravana hahine rua ida ia noho gabuna ia rakatania. Iuda tano dekenai idia raka lao noho lalonai,
8 Naomi ese ena ravana hahine dekenai ia gwau: “Umui lao, umui ta ta emui sinana ena ruma dekenai umui giroa lou. Namona be Iehova ese umui dekenai lalokau* ia hahedinaraia,+ lau bona emui adavadia, idia mase vadaeni taudia unai, dekenai umui hahedinaraia hegeregerena.
9 Mani Iehova ese umui ta ta dekenai adavana do ia henia,* unai amo mauri namona* do umui abia.”+ Bena idia ia kisi henia bona idia tai badabada.
10 Ia dekenai idia hereva noho, idia gwau: “Lasi, to ai be oi ida emu taunimanima dekenai do ai lao.”
11 To Naomi ia gwau: “Egu natudia e, umui giroa lou. Dahaka dainai lau ida do umui mai? Lau be natudia memero do lau havaraia bona idia be emui adavadia ai do idia lao, a?+
12 Lauegu natudia e, umui giroa. Umui lao, badina lau buruka vadaeni bona do lau headava lasi. Bema lau ura, hari hanuaboi tau ta lau adavaia bona natudia memero lau havaraia diba,
13 to do umui naria ela bona idia bada, a? Umui be idia dainai do umui headava lou lasi, a? Lasi, egu natudia e, umui dainai lau lalohisihisi bada, badina Iehova ese lau ia rakatania.”*+
14 Vadaeni idia tai badabada lou, unai murinai Oropa ese ena ravana ia kisi henia bona ia lao. To Ruta ese Naomi ia badinaia noho.
15 Unai dainai Naomi ia gwau: “Itaia, egu ravana ta be ena taunimanima bona ena dirava idauidau dekenai ia giroa lou. Namona be ia ida oi lao.”
16 To Ruta ia gwau: “Lau oi hamaoroa lasi oi lau rakatania totona. Lau be oi ida do lau lao. Badina oi lao gabuna dekenai do lau lao, bona hanuaboi oi mahuta gabuna ai do lau mahuta. Emu taunimanima be egu taunimanima, bona emu Dirava be egu Dirava.+
17 Oi mase gabuna ai do lau mase, bona unuseniai lau do idia guria. Mase sibona ese ita do ia hapararaia, to bema egu kara ta dainai ita parara, vadaeni namona be Iehova ese lau dekenai panisi metauna do ia henia.”
18 Naomi ia itaia Ruta be ia ura dikadika ia ida ia lao, unai dainai ia hamaoroa lou lasi ia giroa totona.
19 Bona idia ruaosi idia raka ela bona Betelehema dekenai idia ginidae.+ Betelehema dekenai idia ginidae neganai, taunimanima ibounai idia hoa, bona hahine idia gwau noho: “Inai be Naomi, a?”
20 Bena ia ese unai hahine ia hamaorodia: “Lau umui gwauraia lasi Naomi,* to umui gwau Mara,* badina Siahu Ibounai Diravana ese egu mauri lalonai lalohisihisi bada ia havaraia.+
21 Lau lao neganai lau be lau hegeregere, to Iehova ese lau be imana kavakava ia siaia giroa. Iehova ese lau ia dadaraia bona Siahu Ibounai Diravana ese lau dekenai dika ia mailaia. Vadaeni, dahaka dainai lau umui gwauraia Naomi?”+
22 Inai be Naomi ena sivarai. Ia bona ena ravana, Moaba hahine Ruta ese Moaba tano idia rakatania ena sivarai.+ Idia be bali gogoa matamaia negana ai Betelehema dekenai idia ginidae.+
Futnout
^ Heb., “hahemaoro.”
^ Anina be “Egu Dirava be King.”
^ Anina be “Moale Hahinena.”
^ Reana Heberu herevana ta amo, anina be “manoka; gorere.”
^ Anina be “Manoka Noho Tauna; Kahirakahira Ia Mase Tauna.”
^ Heb., “paraoa.”
^ Heb., “laga-ani gabuna ta.”
^ Eiava “harihari gauna ta ia henia.”
^ Heb., “Iehova ena imana be lau amo ia kokia.”
^ Anina be “Moale Hahinena.”
^ Anina be “Mamina Dika.”
