Ruta 2:1-23
2 Naomi be mai ena varavara ta, ia be ena adavana Elimeleka ena bese tauna. Iena ladana be Boasi,+ bona ia be taga tauna.
2 Moaba hahine Ruta be Naomi dekenai ia gwau: “Mani uma dekenai lau lao bona lau idia hebogahisi henia taudia edia murinai bali oredia lau gogoa.”+ Vadaeni Naomi be ia dekenai ia gwau: “Lauegu natuna e, oi lao.”
3 Bena ia lao bona bali gogoa taudia ese idia rakatania bali oredia ia gogoa matamaia. To ia diba lasi ia be Boasi ena uma dekenai ia lao,+ Boasi be Elimeleka ena bese tauna.+
4 Bena Boasi be Betelehema amo ia ginidae, bona bali gogoa taudia dekenai ia gwau: “Iehova be umui ida ia noho.” Bona idia gwau: “Iehova ese oi ia hanamoa.”
5 Bena Boasi ese bali gogoa taudia ia naria tau matamata ia nanadaia: “Inai hahine matamata be daika ena bese amo?”
6 Bali gogoa taudia ia naria tau matamata ia haere: “Inai hahine matamata be Moaba hahine,+ ia be Naomi ida Moaba tano amo ia mai.+
7 Ia ese lau ia noia, ‘Ia namo bali gogoa taudia ese idia rakatania bali oredia lau gogoa bona haboua?’+ Bona daba amo ema bona hari ia gaukara noho, bona hari sibona gabu keruma dekenai ia helai, nega sisina ia laga-ani totona.”
8 Bena Boasi be Ruta dekenai ia gwau: “Lauegu natuna e, oi kamonai. Uma ma ta dekenai oi lao lasi bali gogoa totona, bona gabu ma ta dekenai oi lao lasi, to egu hesiai kekeni edia kahirakahira oi noho.+
9 Bona oi itaia idia be edeseni bali idia gogoa, bena idia ida oi lao. Lau ese tatau matamata lau oda henia vadaeni oi idia dogoatao lasi totona. Oi ranu mase neganai, ranu hodu dekenai oi lao bona tatau matamata ese idia utua vadaeni ranu oi inua.”
10 Vadaeni Ruta ia goru diho bona ena vairana be tano dekenai ia atoa diho, bona ia gwau: “Lau be idau tano hahine, to dahaka dainai lau oi lalonamo henia bona oi laloa bada?”+
11 Boasi ia haere: “Emu adavana ia mase murinai, emu ravana oi kara henia ena sivarai ibounai be lau dekenai idia gwauraia. Bona emu tamana bona sinana bona emu tano oi rakatania, bona oi diba lasi taudia dekenai oi mai ena sivarai danu lau kamonai vadaeni.+
12 Mani Iehova ese emu kara dainai oi ia hanamoa,+ bona namona be Iehova, Israela ena Dirava ese oi dekenai davana hereadaena ia henia, badina iena apena henunai hunia gabuna oi tahua.”+
13 Vadaeni Ruta ia gwau: “Egu lohia e, mani emu lalonamo lau abia, badina oi ese lau oi durua bona egu lalona oi hagoadaia, ena be lau be emu hesiai hahinena lasi.”
14 Aniani negana ai Boasi be ia dekenai ia gwau: “Oi mai, paraoa oi ania, bona paraoa sisina be wain iditana lalonai oi atoa.” Vadaeni bali gogoa taudia edia badinai ia helai. Bena Boasi ese ia dekenai idia gabua bali haida ia henia, bona ia aniani bona ia bogakunu, bona aniani oredia idia noho.
15 Vadaeni bali gogoa totona ia toreisi neganai,+ Boasi ese ena tatau matamata ia oda henia, ia gwau: “Namona be umui utua vadaeni bali ia gogoa danu, bona umui kara auka henia lasi.+
16 Danu, umui kwatua bali amo haida umui kokia bona umui rakatania ia gogoa totona, bona ia umui koua totona hereva ta umui gwauraia lasi.”
17 Vadaeni Ruta be uma gabu dekenai bali ia gogoa noho ela bona adorahi momokani.+ Ia gogoa bali ibounai ia kwadia neganai, bali ifa ta* ia hahonua.
18 Bena Ruta ese unai ia abia bona siti dekenai ia lao, bona ia gogoa gaudia be ena ravana ese ia itaia. Danu, Ruta ese ena aniani oredia be ena ravana dekenai ia henia.+
19 Bena ena ravana be ia dekenai ia gwau: “Hari dina edeseniai bali oi gogoa? Edeseniai oi gaukara? Mani oi ia kara namo henia tauna ese hanamoa ia abia.”+ Vadaeni Ruta be daika ida ia gaukara be ena ravana dekenai ia gwauraia. Ia gwau: “Hari dina lau be tau ta ladana Boasi ida lau gaukara.”
20 Unai neganai Naomi be ena ravana dekenai ia gwau: “Namona be Iehova ese ia hanamoa, badina ia ese idia mauri taudia bona mase taudia dekenai lalokau* ia hahedinaraia.”+ Naomi ma ia gwau: “Unai tauna be iseda varavara ta.+ Ia be ita ia hoia lou tauna ta.”*+
21 Bena Moaba hahine Ruta ia gwau: “Danu ia ese lau ia hamaoroa, ‘Lauegu gaukara taudia kahirakahira oi noho ela bona egu bali gogoa gaukara ibounai idia haorea.’”+
22 Naomi be ena ravana Ruta dekenai ia gwau: “Lauegu natuna e, iena hesiai kekenidia ida oi lao be namo, dika uma ma ta ai oi idia kara auka henia.”
23 Vadaeni ia be Boasi ena hesiai kekenidia kahirakahira ia noho, bona bali bona witi gogoa gaukara ia karaia noho ela bona gogoa negana ia ore.+ Bona ia be ena ravana ida ia do noho.+
Futnout
^ Eiava “iseda varavara ta, mai ena maoro ita ia hoia lou (hamauria) totona.”
