Ruta 3:1-18
3 Vadaeni Ruta ena ravana Naomi be ia dekenai ia gwau: “Egu natuna e, namona be oi totona noho gabuna* ta lau tahua,+ unai amo do oi noho namonamo.
2 Boasi be iseda varavara ta.+ Bona oi be iena hesiai kekenidia ida oi gaukara hebou. Hari hanuaboi ia be bali moia gabuna ai bali kopina do ia kokia noho.
3 Vadaeni oi digu bona bonana namo dehoro amo sibona oi dahua. Bena emu dabua namodia oi karaia* bona bali moia gabuna dekenai oi diho lao. To ia vairanai oi hedinarai lasi ela bona ia aniani bona inuinu ore.
4 Ia hekure neganai, ena hekure gabuna oi itaia. Bena oi lao bona ena aena koua dabua oi kokia bona oi hekure. Bona do oi karaia gauna be oi dekenai do ia gwauraia.”
5 Vadaeni Ruta ia haere: “Lau dekenai oi gwauraia gaudia ibounai do lau karaia.”
6 Bena bali moia gabuna dekenai ia diho lao bona ena ravana ese ia hamaoroa gaudia ibounai ia karaia.
7 Unai nega ai, Boasi ia aniani bona ia inuinu bona ia moale. Bena ia lao bona idia haboua bali badinai ia hekure. Unai murinai, Ruta be mai regerege lasi ida ia lao bona Boasi ena aena koua dabua ia kokia bena ia hekure.
8 Hanuaboi momokani ai Boasi ia heudeheude, bena ia giroa bona ia itaia hahine ta be iena aena badinai ia hekure noho.
9 Vadaeni ia gwau: “Oi be daika?” Hahine ia haere: “Lau be Ruta, emu hesiai hahine. Namona be lau oi gimaia,* badina oi be hoia lou tauna.”+
10 Unai neganai Boasi ia gwau: “Egu natuna e, mani Iehova ese oi ia hanamoa. Hari oi hahedinaraia lalokau* ese guna oi hahedinaraia lalokau ia hereaia,+ badina tatau matamata idia noho, idia be ogogami eiava taga, to idia ta ena murinai oi lao lasi.
11 Vadaeni egu natuna e, oi gari lasi. Oi gwauraia gaudia ibounai do lau karaia,+ badina siti taudia ibounai idia diba oi be hahine namona.
12 Ena be lau ese oi lau hoia lou diba,+ to hoia lou tauna ma ta ia noho, ia be emu adavana ena varavara korikori.+
13 Hari hanuaboi iniseni oi noho, bona bema daba ai ia ese oi ia hoia lou, unai be namo! Ia ese oi ia hoia lou diba.+ To bema ia ura lasi, Iehova, mauri Diravana ena ladana ai lau gwauhamata, lau sibona ese oi do lau hoia lou. Iniseni oi hekure ela bona daba.”
14 Vadaeni Ruta be Boasi ena aena badinai ia hekure ela bona daba, to gabu ia do dibura bona ta ese ia itaia lasi neganai ia toreisi. Boasi ia ura lasi ta ia diba hahine ta be bali moia gabuna dekenai ia mai.
15 Bena Ruta dekenai ia gwau: “Oi karaia ataiai dabua latana oi mailaia bona oi kehoa.” Vadaeni unai dabua ia kehoa, bona ia ese bali sia 6* be dabua latanai ia bubua bena ia henia ia huaia totona, unai murinai Boasi be siti dekenai ia lao.
16 Ruta be ena ravana hahine dekenai ia lao, bona ena ravana ia gwau: “Egu natuna e, gau ibounai idia namo, a?” Ruta be ena ravana dekenai Boasi ese ia karaia gaudia ibounai ia herevalaia.
17 Ma ia gwau: “Ia ese lau dekenai bali sia 6 ia henia, bona lau ia hamaoroa, ‘Emu ravana dekenai imana kavakava do oi lao lasi.’”
18 Vadaeni Naomi ia gwau: “Egu natuna e, iniseni oi naria ela bona do ia vara gauna oi itaia, badina Boasi be do ia laga-ani lasi ela bona unai gauna be hari dina ia hamaoromaoroa.”
Futnout
^ Heb., “laga-ani gabuna.”
^ Eiava “emu atai dabua oi karaia.”
^ Heb., “emu dabua amo emu hesiai hahine oi koua.”
