Ruta 4:1-22
4 Vadaeni Boasi be siti ena geiti dekenai ia daekau lao+ bona ia helai. Bona Boasi ese guna ia herevalaia hoia lou tauna+ ia raka hanaia. Unai neganai Boasi ia gwau: “Lauegu turana e, oi mai bona iniseniai oi helai.” Bena ia lao bona ia helai.
2 Bena Boasi ese siti ena tau badadia 10 ia abia+ bona ia gwau: “Iniseniai umui helai.” Vadaeni idia helai.
3 Bena Boasi be unai hoia lou tauna dekenai ia gwau:+ “Naomi, Moaba tano amo ia giroa mai hahine,+ ia ura iseda tadikaka Elimeleka ena tano ia hoihoilaia.+
4 Unai dainai lau laloa oi dekenai do lau gwauraia, ‘Iniseniai idia noho taudia bona iseda taunimanima edia tau badadia edia vairanai unai tano do oi hoia lou.+ Bema oi ura, vadaeni oi hoia lou diba. To bema oi ura lasi, mani lau oi hadibaia, badina oi be mai emu maoro unai tano oi hoia guna totona, to lau be oi murinai.’” Ia haere: “Lau ura unai tano lau hoia lou.”+
5 Bena Boasi ia gwau: “Naomi amo tano oi hoia dinana ai, namona be Moaba hahine, Ruta amo unai tano oi hoia danu, ia be mase tauna ena adavana, unai amo unai tano be mase tauna ena bese taudia dekenai do ia noho.”+
6 Unai neganai unai hoia lou tauna ia gwau: “Lau be hegeregere lasi unai tano lau hoia lou totona, dika lau sibona egu ahuna lau haboioa. Namona be oi ese oi hoia lou, oi dekenai unai tano hoia lou ena maoro lau henia, badina lau be hegeregere lasi unai tano lau hoia lou totona.”
7 Gunaguna Israela ai, bema ta be mai ena maoro tano ia hoia lou eiava mai ena maoro ma ta dekenai gau ta ia henia hanai, vadaeni hamomokania totona inai dala idia badinaia: Tau ta ese ena sandolo ia kokia+ bona ma ta dekenai do ia henia, Israela dekenai unai kara ese idia karaia gwauhamata ia hamomokania.
8 Vadaeni unai hoia lou tauna be Boasi dekenai ia gwau, “Unai tano oi hoia,” bena ena sandolo ia kokia.
9 Bena Boasi be tau badadia bona taunimanima ibounai dekenai ia gwau: “Hari umui hamomokania inai,+ lau ese Naomi amo Elimeleka ena gau ibounai bona Kiliona bona Malona edia gau ibounai lau hoia.
10 Danu, lau ese Moaba hahine Ruta, Malona ena adavana, lau abia lau adavaia totona. Unai amo mase tauna ena tano be ena bese taudia dekenai do ia noho,+ bona mase tauna ena ladana be ena tadikaka bona siti taudia edia huana amo do ia boio lasi. Hari dina umui ese unai umui hamomokania.”+
11 Unai neganai siti ena geiti badinai idia noho taudia ibounai bona tau badadia idia gwau: “Ai be unai ai hamomokania! Namona be Iehova ese emu ruma ai ia vareai hahinena ia hanamoa. Bona ia be Rahela bona Lea hegeregerena, idia ruaosi amo Israela besena ia vara.+ Namona be Eparata ai oi kwalimu+ bona Betelehema ai ladana namona oi abia.+
12 Namona be inai hahine matamata amo Iehova ese oi dekenai do ia henia natuna be Perese ena bese bamona ai do ia lao.+ Perese be Tamara bona Iuda edia natuna mero.”+
13 Vadaeni Boasi ese Ruta ia adavaia. Ia be Ruta ida ia mahuta hebou, bena Iehova ena hahenamo dainai Ruta ia rogorogo bona mero ta ia havaraia.
14 Bena hahine be Naomi dekenai idia gwau: “Iehova hanamoa, ia ese hari dina oi totona hoia lou tauna ta ia henia. Namona be Israela ai ena ladana idia hanamoa!
15 Ia* ese emu mauri ia hanamoa lou bona emu buruka negana lalonai oi do ia naria, badina ia be Ruta ese ia havaraia, ia ese oi ia lalokau henia+ bona ena namo ese natudia memero 7 ia hereaia.”
16 Naomi ese unai natuna ia abia, ia rosia bona ia naria.
17 Bena ena dekena hahinedia ese mero dekenai ladana ta idia henia. Idia gwau, “Naomi totona natuna mero ta ia vara vadaeni,” bona ena ladana idia hatoa Obeda.+ Ia be Iese ena tamana,+ bona Iese be Davida ena tamana.
18 Perese ena bese taudia be inai:+ Perese be Hesarona ena tamana,+
19 Hesarona be Rama ena tamana, Rama be Aminadaba ena tamana,+
20 Aminadaba+ be Nasona ena tamana, Nasona be Salamona ena tamana,
21 Salamona be Boasi ena tamana, Boasi be Obeda ena tamana,
22 Obeda be Iese ena tamana,+ bona Iese be Davida ena tamana.+
Futnout
^ Unai be, Naomi ena tubuna mero.
