Salamo 103:1-22
Davida ena ane.
103 Iehova lau hanamoa be namo.Mai egu lalona ibounai ida iena ladana helagana lau hanamoa be namo.
2 Iehova lau hanamoa be namo.Ia karaia gaudia ibounai do lau laloaboio lasi.+
3 Ia ese egu kara dika ibounai ia gwauatao+Bona egu hisihisi ibounai ia hanamoa.+
4 Ia ese mase gurina amo lau ia hamauria+Bona lau dekenai lalokau* bona hebogahisi ia hahedinaraia.+
5 Egu mauri ibounai lalonai ia ese gau namodia amo lau ia hanamoa,+Unai amo egu goada ia matamata lou, ugava ena goada bamona.+
6 Iehova be kara maoromaoro ia badinaia+ bona kota maoromaoro ia karaia,Hisihisi idia davaria taudia ia durua totona.+
7 Ia ese Mose dekenai iena dala ia hadibaia,+Bona iena kara be Israela taudia dekenai ia hadibaia.+
8 Iehova be hebogahisi Diravana,+Ia badu haraga lasi bona ena lalokau* be bada herea.+
9 Ia be nega ibounai kerere do ia tahua lasi,+Bona do ia badu hanaihanai lasi.+
10 Ia ese iseda kara dika hegeregerena ita ia kara henia lasi,+Bona iseda kerere hegeregerena davana ia henia lasi.+
11 Guba be tanobada amo ia daudau herea hegeregerena,Dirava idia gari henia taudia dekenai iena lalokau* be bada herea.+
12 Dina ia daekau kahana be dina ia diho kahana amo ia daudau hegeregerena,Ia ese iseda kara dika be ita amo ia kokia lao daudau.+
13 Tamana ese natudia memero dekenai hebogahisi ia hahedinaraia hegeregerena,Iehova ese ia idia gari henia taudia dekenai hebogahisi ia hahedinaraia.+
14 Badina ia be ita vara dalana ia diba namonamo,+Ia laloatao ita be kahu sibona.+
15 Taunimanima edia mauri dinadia be rei bamona,+Tano ena flaoaflaoa bamona idia hedinarai.+
16 To lai ia toa neganai, unai flaoaflaoa ia moru,Toana be guna ia noho lasi bamona.
17 To Iehova ena lalokau be do ia noho hanaihanaiIa idia gari henia taudia dekenai,+Bona edia tubudia dekenai iena kara maoromaoro do ia hahedinaraia noho,+
18 Iena taravatu idia badinaia+Bona iena oda herevadia idia badinaia namonamo taudia dekenai kara maoromaoro ia hahedinaraia.
19 Iehova ese guba ai iena terona ia haginia goada,+Bona iena lohia siahuna amo gau ibounai ia lohiaia.+
20 Iena siahu bada aneru ibounai e, Iehova hanamoa,+Idia be iena hereva hegeregerena idia kara,+ bona ena gadona idia kamonai.
21 Dirava ena tuari oreadia ibounai e, Iehova hanamoa,+Iena ura idia karaia hesiai taudia unai.+
22 Iena havaraia gaudia ibounai e, Iehova hanamoa,Ia lohiaia gabudia ibounai be ia idia hanamoa.Mai lalona ibounai ida Iehova lau hanamoa be namo.
Futnout
^ Eiava “hebogahisi.”
