Salamo 68:1-35
-
‘Dirava ena inai taudia be gabu idauidau dekenai idia heau lao’
Hereva ta miusiki gunalaia tauna totona. Davida ena ane.
68 Dirava ia toreisi neganai, iena inai taudia be gabu idauidau dekenai idia heau lao,Bona iena inai taudia be ena vairana amo idia heau boio.+
2 Lai ese kwalahu ia abia lao hegeregerena, idia oi lulua lao be namo.Kandolo be lahi ena siahu dainai ia veve bamona,Dirava vairanai kara dika taudia idia boio be namo.+
3 To kara maoromaoro taudia idia moale be namo.+Dirava vairanai idia moale bada be namo.Mai moale bada ida idia boiboi be namo.
4 Dirava dekenai ane abia, iena ladana dekenai hanamoa anedia abia.*+Tano kaukau palakadia* ia hanaia noho Diravana dekenai ane abia.Iah* be iena ladana!+ Iena vairanai umui moale noho.
5 Dirava be tamana lasi natudia edia tamana bona vabu taudia edia gimaia* tauna,+Ia be helaga gabuna ai ia noho.+
6 Dirava ese sibona idia noho taudia dekenai ruma ia henia idia noho totona.+Ia ese dibura taudia ia ruhaia noho bona ia hanamodia.+To kwara auka* taudia be ranu lasi gabuna ai idia noho be namo.+
7 Dirava e, oi ese emu taunimanima oi hakaua neganai,+Tano kaukauna oi raka hanaia neganai, (Sela)
8 Tano ia mareremarere.+Dirava dainai guba amo medu ia diho.Israela ena Dirava dainai Sinai ia mareremarere.+
9 Dirava e, oi ese medu bada herea oi hadihoa.Emu taunimanima idia hesiku bada, to idia oi hagoadaia.
10 Idia be emu palai rumadia dekenai idia noho.+Dirava e, emu kara namodia dainai, ogogami taudia dekenai heduru oi henia.
11 Iehova ese oda ia henia,Bona sivarai namona idia harorolaia hahine be tuari orea badana ta bamona.+
12 Tuari oreadia edia king idia heau!+Ruma dekenai idia noho hahine be tuari taudia ese idia abia kohu amo ahuna idia abia danu.+
13 Ena be umui tatau be kamepa ena lahi gabuna* badinai umui hekure noho,To unuseniai umui ese pune manu ena siliva apenaBona ena hanina, golo namo hereana gauna do umui dogoatao.
14 Siahu Ibounai Diravana ese king idauidau ia lulua lao neganai,+Salamoni ai sinou ia diho.*
15 Basana ororo+ be Dirava ena ororo.*Basana ena ororo momo be ataiai momokani.
16 Umui ororo badadia e, Dirava ese ia abia hidi ororona, iena noho gabuna unai,Umui itaia neganai, dahaka dainai umui mama?+Momokani, Iehova be unuseniai do ia noho ela bona hanaihanai.+
17 Dirava ena tuari kariota be tausen momo herea, duahia diba lasi.+Iehova be Sinai amo helaga gabuna dekenai ia mai.+
18 Iah Dirava e, oi be ataiai dekenai oi daekau lao,+Oi ese igui hesiai taudia oi abia lao.Oi ese taunimanima be harihari gaudia bamona oi abia,+Oibe, kwara auka taudia danu+ be edia huanai idia noho.
19 Iehova ita hanamoa, dina ta ta ai ia ese iseda metau ia huaia,+Ia be iseda hahemauri Dirava momokanina. (Sela)
20 Dirava momokanina be ita ia hamauria Diravana.+Bona Iehova, Siahu Ibounai Lohiabadana ese mase amo ita ia hamauria.+
21 Oibe, Dirava be ena inai taudia edia kwarana do ia hamakohia,Kerere ia karaia noho tauna ena kwarana do ia hamakohia.+
22 Iehova ia gwau: “Lau ese Basana amo idia do lau hakaua giroa,+Lau ese davara ena dobu momokani gabuna amo idia do lau hakaua giroa,
23 Unai amo emu aena be emu inai taudia edia rara lalonai do ia noho,+Bona emu sisia ese emu inai taudia edia rara do idia inua.”
24 Dirava e, idia ese emu taunimanima edia orea edia raka idia itaia,Egu Dirava, egu King, ena taunimanima edia orea be helaga gabuna dekenai idia raka vareai.+
25 Ane abia taudia be vairanai idia raka, edia murinai miusiki gaudia mai edia varo gadaralaia taudia idia raka,+Edia huanai kekeni matamatadia be tambarin idia gadaralaia.+
26 Hebou lalonai, Dirava hanamoa,Israela bese ia matamaia Tauna ena bese taudia e, Iehova hanamoa.+
27 Bese maragina Beniamina+ ese idia ia lulua lao noho,Iuda ena lohia taudia bona hutuma be mai regerege ida idia lao danu,Sebuluno ena lohia taudia, Napatali ena lohia taudia danu.
28 Emu Dirava ia gwau oi be do oi goada.Dirava e, emu goada oi hahedinaraia, ai totona oi karaia bamona.+
29 Ierusalema ai emu dubu helaga ia noho dainai,+King taudia be oi dekenai harihari gaudia do idia abia mai.+
30 Siriho dekenai idia noho uda animal oi gwau henia,Idia haboua boromakau+ bona edia natudia danu,Unai bamona oi karaia ela bona idia igo diho taudia ese siliva idia abia mai.To ia ese tuari idia ura henia taudia be gabu idauidau dekenai ia lulua lao.
31 Kopa gaudia be Aigupito amo do idia abia mai,+Kusu be Dirava dekenai harihari gaudia do ia henia haraga.
32 Tanobada ena basileia idauidau e, Dirava dekenai ane umui abia,+Iehova dekenai hanamoa anedia umui abia,* (Sela)
33 Idaunegai ia noho guba ena ataiai momokani dekenai ia heau noho Diravana dekenai ane abia.+Itaia! Iena gadona ena goada be guba ena boiboi bamona.
34 Dirava ena goada herevalaia.+Iena hairai be Israela latanai ia noho,Bona iena goada be guba* ai ia hedinarai.
35 Taunimanima ese helaga herea gabuna ai ia noho Diravana idia matauraia bona gari henia be namo.+Ia be Israela ena Dirava,Ia ese taunimanima dekenai goada bona siahu ia henia.+Dirava hanamoa.
Futnout
^ Eiava “miusiki umui karaia.”
^ Eiava reana, “Ori edia latanai.”
^ “Iah” be Iehova ena ladana kwadogina.
^ Heb., “hahemaoro.”
^ Eiava “gwau-edeede.”
^ Eiava reana, “mamoe edia noho gabudia.”
^ Eiava “Toana be Salamoni ai sinou ia diho.”
^ Eiava “ororo badana.”
^ Eiava “miusiki umui karaia.”
^ Heb., “ori.”
