Solomona Ena Ane 5:1-16
-
Mamoe naria mero (1a)
-
Ierusalema hahine taudia (1b)
-
“Lalokau herevadia amo umui kekero!”
-
-
Kekeni matamata (2-8)
-
Ena nihi ia herevalaia
-
-
Ierusalema ena natudia kekeni (9)
-
“Edena dala ai emu lalokau mero be hereadae momokani?”
-
-
Kekeni matamata (10-16)
-
“Memero ibounai 10,000 huanai ia sibona be hairai momokani” (10)
-
5 “Egu lalokau, do lau adavaia kekeni e,Lau be egu uma gabu lalonai lau vareai vadaeni.
Egu muro* bona bonana namo muramura lau abidia vadaeni.
Egu hani edia ruma bona hani lau ania vadaeni,Egu wain bona milika lau inua vadaeni.”
“Egu turadia e, umui aniani!
Umui inuinu bona lalokau herevadia amo umui kekero!”
2 “Lau mahuta, to egu lalona be ia noga.
Egu lalokau ia pidipidi ena regena lau kamonai!”
‘Egu lalokau e, egu pune manu e, oi dekenai dika ta be lasi,Iduara oi kehoa!
Badina egu kwarana be daba ena paripari ese ia haparia,Bona egu huina be hanuaboi ena paripari ese ia haparia.’+
3 Egu ataiai dabua lau kokia vadaeni.
Do lau atoa lou, a?
Egu aena lau huria vadaeni.
Do lau hamiroa lou, a?
4 Egu lalokau mero ena imana be iduara ena matu amo ia kokia,Bona egu lalona ia hekwarahi.
5 Lau toreisi bona egu lalokau mero totona iduara lau kehoa,Muro* dehoro be egu imana amo ia diho,Egu imana kwakikwaki amo ia diho lao,Iduara ena loka dekenai.
6 Egu lalokau mero totona iduara lau kehoa,To ia noho lasi, ia lao vadaeni.
Ia lao dainai, egu kudouna ia makohi.
Lau tahua, to lau davaria lasi.
Ia dekenai lau boiboi, to ia haere lasi.
7 Siti dekenai idia loaloa gima taudia ese lau idia davaria.
Lau idia botaia bona haberoa.
Magu idia gimaia taudia ese egu kwarana koua dabua idia abia.
8 Ierusalema kekenidia e, umui lau hamaoroa:
Bema egu lalokau mero umui davaria,Do umui hamaoroa lau be ia lau lalokau henia bada.”
9 “Hairai kekeni e,Edena dala ai emu lalokau mero be hereadae momokani?
Iena hairai be edena bamona dainai,Ai dekenai inai oda herevana oi gwauraia?”
10 “Egu lalokau mero be hairai momokani bona goada,Memero ibounai 10,000 huanai ia sibona be hairai momokani.
11 Iena kwarana be golo bamona.
Iena huina ena toana be pama au huahua bamona,Galo manu koremana bamona.
12 Iena matana be ranu badinai idia helai pune bamona,Milika lalonai idia digudigu,Bona sinavai ena isena ai idia helai hegege pune bamona.
13 Iena vahana be bonana namo flaoaflaoa ena uma bamona,Bona bonana namo tubutubu gaudia bamona.
Iena udu bibina be lili flaoaflaoa bamona, muro* dehoro be ia amo ia veve diho.
14 Iena imana be golo bona krusolito nadi.
Iena bogana be aivori* bona sapairo nadi.
15 Iena aena be nadi kurokuro du goadadia bamona, golo maua latanai idia gini.
Iena toana be Lebanona bamona, sida audia edia hairai bamona.+
16 Iena udu bibina be hani bamona,Iena kara ibounai be namo herea.
Ierusalema kekenidia e, unai be lauegu lalokau mero.”
Futnout
^ Ia be dava bada gauna bona elefant bona animal ma haida edia isena badadia kurokurodia amo idia abia.
