Solomona Ena Ane 8:1-14
-
Kekeni matamata (1-4)
-
“Bema oi be lauegu taihuna” (1)
-
-
Kekeni matamata ena tadikakadia (5a)
-
‘Unai be daika, iena lalokau mero dekenai ia tabekau noho?’
-
-
Kekeni matamata (5b-7)
-
“Lalokau ena goada be mase ena goada hegeregerena” (6)
-
-
Kekeni matamata ena tadikakadia (8, 9)
-
“Bema ia be magu ta, . . . to bema ia be iduara ta, . . .” (9)
-
-
Kekeni matamata (10-12)
-
“Lau be magu ta” (10)
-
-
Mamoe naria mero (13)
-
‘Emu gadona lau ura kamonai’
-
-
Kekeni matamata (14)
-
“Ia heau haraga dia maragina bamona oi heau”
-
8 “Bema oi be lauegu taihuna,Egu sinana ese ena rata amo oi ia ubua!
Ariara dekenai oi lau itaia neganai, oi do lau kisi henia,+Bona ta ese lau do ia gwau henia lasi.
2 Oi do lau hakaua,Bona lau ia hadibaia hahinena,Lauegu sinana ena ruma lalonai oi do lau hakaua vareai.+
Wain mai ena muramura,Bona pomogranet* huahua ena ranu danu be oi dekenai do lau henia.
3 Ena imana laurina be egu kwarana henunai,Bona iena imana idibana be lau ia rosia.+
4 Ierusalema kekenidia e, umui lau hamaoroa:
Lau umui doria lasi ta lau ura henia totona.”+
5 “Unai be daika, tano kaukauna dekena amo ia mai noho,Iena lalokau mero dekenai ia tabekau noho?”“Apolo auna henunai oi lau hanogaia.
Unuseni oiemu sinana ese oi ia havaraia.
Unuseni oiemu sinana ese mara ena hisihisi ia abia.
6 Emu kudouna ai lau oi atoa maka ta bamona,Bona emu imana dekenai oi atoa danu,Badina lalokau ena goada be mase ena goada hegeregerena,+Ta ta badinaia karana ena goada be Mase Gurina* ena goada hegeregerena.
Unai lalokau be lahi ena hururuhururu bamona, Iah* ena lahi hururuhururu.+
7 Abata ranudia ese lalokau do ia habodoa diba lasi,+Sinavai ese idia huria oho diba lasi.+
Bema tau ta be lalokau dainai ena kohu ibounai ia henia,Ia do idia ura henia lasi.”
8 “Ai be mai emai tadina kekeni ta,+Bona ia be ratana lasi.
Bema mero ta ese ia ura henia neganai,Edena bamona emai tadina do ai durua?”
9 “Bema ia be magu ta,Siliva amo do ai ha-aukaia,To bema ia be iduara ta,Sida audia amo do ai koua.”
10 “Lau be magu ta,Bona lauegu ratana be kohoro bamona.
Unai dainai egu lalokau mero ena matanaiLau be lalomaino lau davaria vadaeni.
11 Bala-hamono ai Solomona be mai ena vain uma.+
Uma naria taudia dekenai unai uma ia rakatania.
Idia ta ta be greips idia hoihoilaia bona siliva moni 1,000 idia mailaia.
12 Solomona e, lau be mai egu vain uma danu.
Unai siliva moni 1,000 be oiemu,Bona siliva moni 200 be emu vain uma idia naria taudia totona.”
13 “Uma lalonai oi noho tauna e,+Egu turadia be emu gadona idia kamonai totona idia naria noho.
Lau danu lau ura kamonai.”+
14 “Egu lalokau mero e, oi mai haraga,Oi heau haraga dia bamona+Eiava bonana namo muramura idia tubu ena ororo aiIa heau haraga dia maragina bamona oi heau.”
Futnout
^ Inai huahua ena kala be kakakaka bona ena toana be apolo bamona.
^ Heb., “Iah” be Iehova ena ladana kwadogina.
