Revareva ta Tito Dekenai 1:1-16
1 Lau Paulo, lau be Dirava ena hesiai tauna bona Iesu Keriso ena aposetolo tauna. Egu abidadama bona egu aposetolo gaukarana be Dirava ena abia hidi taudia edia abidadama bona hereva momokani ena diba maoromaoro hegeregerena, unai be Dirava badinaia karana ida ia tamona,
2 bona unai ibounai be ia koikoi diba lasi Diravana+ ese idaunegai ia gwauhamatalaia mauri hanaihanai helarona latanai ia haginia.+
3 Bona iena nega korikori ai, sivarai namona harorolaia gaukarana amo iena hereva ia hahedinaraia, unai gaukara be lau idia henia,+ iseda Hamauria Tauna, Dirava, ena oda hegeregerena.
4 Tito e, iseda abidadama lalonai oi be egu natuna korikori, oi dekenai inai revareva lau torea:
Dirava iseda Tamana bona iseda Hamauria Tauna Keriso Iesu amo, mani hebogahisi hereadaena bona maino oi abia.
5 Kerete dekenai oi lau rakatania unai amo kerere* gaudia oi hamaoromaoroa diba bona siti ta ta ai elda taudia do oi abia hidi, oi lau hadibaia hegeregerena:
6 Inai bamona tauna do oi abia hidi, ia be haida ese idia samania tauna lasi, hahine tamona ena adavana, iena natudia be mai edia abidadama bona ta ese ia gwauraia lasi idia be mauri dikana idia badinaia eiava idia gwau-edeede.+
7 Naria tauna be Dirava ese ia abia hidi iena gaukara ia naria dainai, ia be haida ese idia samania tauna lasi, sibona ena ura ia badinaia lasi,+ ia badu haraga lasi,+ ia kekero lasi, ia heatu lasi, bona moni bona kohu ia mataganiganilaia lasi,
8 to ia be heabidae tauna,+ kara namo ia ura henia, ia laloa maoromaoro,*+ ia kara maoromaoro, Dirava ia abidadama henia,+ bona sibona ia biagua.+
9 Bona ena hahediba dalanai hereva momokani ia dogoatao auka,+ unai amo hereva momokani amo haida ia hagoadaia,+ bona hereva momokani idia gwauraia lasi taudia ia sisiba henia.+
10 Badina gwau-edeede taudia, hereva kavakava taudia, bona koikoi taudia be momo, bona idia haida idia gwau kopina utua karana be maoro.+
11 Namona be unai taudia edia uduna oi koua, badina sibodia edia namo totona idia ese ruma bese momo edia abidadama be hahediba hereva koikoidia amo idia hadikaia.
12 Edia peroveta tauna ta, ia gwau: “Kerete taudia be hanaihanai idia koikoi, idia dagedage uda animal bamona, idia lahedo bona aniani momo.”
13 Unai hereva be momokani. Unai badina dainai, oi sisiba auka henidia noho, edia abidadama ia goada totona,
14 bona Iuda taudia edia gori sivaraidia bona hereva momokani idia dadaraia taudia edia sene herevadia do idia kamonai henia lasi.
15 Idia goeva taudia dekenai gau ibounai be idia goeva.+ To miro bona abidadama lasi taudia dekenai gau ibounai be idia miro, badina edia lalohadai bona edia lalomamina be idia miro.+
16 Taunimanima vairanai idia gwau idia be Dirava idia diba, to edia kara amo ia idia dadaraia,+ badina idia be dika momokani, hereva idia kamonai lasi, bona idia hegeregere lasi gaukara namona ta idia karaia totona.
