Revareva ta Tito Dekenai 2:1-15
2 To oi, namona be hereva momokani ida idia hegeregere gaudia oi hadibaia noho.+
2 Namona be tau badadia ese edia kara idia biagua, idia be lo taudia bamona idia laloa, idia laloa maoromaoro, bona edia abidadama, lalokau, bona haheauka karana dekenai idia gini goada.
3 Unai hegeregerena, namona be hahine badadia edia kara do ia helaga, haida edia ladana idia hadikaia lasi, wain momo inua karana ese do ia biagudia lasi, bona kara namodia idia hadibaia,
4 unai amo hahine matamatadia do idia sisiba henia,* edia adavadia idia lalokau henia bona edia natudia do idia lalokau henia,
5 do idia laloa maoromaoro, idia kara goeva, ruma ai do idia gaukara,* idia kara namo, bona edia adavadia henunai do idia noho,+ unai amo taunimanima ese Dirava ena hereva do idia gwauraia dika lasi.
6 Unai hegeregerena, tatau matamata oi hagoadaia noho idia laloa maoromaoro totona,+
7 gau ibounai dekenai haheitalai namona oi hahedinaraia. Hereva momokani* be mai ura bada ida oi hadibaia,+
8 hereva namodia sibona oi gaukaralaia unai amo haida ese oi do idia gwauraia dika lasi.+ Unai dala amo iseda inai taudia be do idia hemarai, badina ita dekenai hereva dikana ta do idia gwauraia lasi.+
9 Hesiai taudia do oi hadibaia gau ibounai dekenai edia biagudia henunai do idia noho,+ idia do idia hamoalea, bona edia hereva do idia haloua lasi,
10 idia amo do idia henaohenao lasi,+ to kara momokani do idia hahedinaraia, unai amo gau ibounai lalonai, iseda Hamauria Tauna, Dirava, ena hahediba herevadia do idia hahairaia.+
11 Dirava ena hebogahisi hereadaena be ia hedinarai vadaeni, unai amo taunimanima idauidau ia hamauria.+
12 Unai hebogahisi hereadaena ese ita ia hadibaia, Dirava ia ura lasi karadia bona tanobada ena ura idauidau ita dadaraia+ bona inai nega oromana* lalonai do ita noho mai laloa maoromaoro bona kara maoromaoro ida bona Dirava do ita badinaia noho.+
13 Unai ita karaia lalonai, namona be iseda helaro ena guguru negana, bona Siahu Ibounai Diravana bona iseda Hamauria Tauna Iesu Keriso be edia hairai idia hahedinaraia negana ita naria noho.+
14 Keriso be sibona ia henia,+ ita be taravatu utua karadia idauidau amo ia ruhaia*+ totona bona ita ia hagoevaia iena taunimanima ai ita lao totona, vadaeni mai eda ura bada ida kara namodia do ita karaia.+
15 Unai gaudia do oi herevalaia noho, bona taunimanima do oi hagoadaia bona sisiba henia, badina oi be mai emu maoro.+ Namo lasi ta ese oi ia laloa maragi.
Futnout
^ Eiava “lalohadai maorona idia abia totona; treinia.”
^ Eiava “edia ruma gaukara do idia karaia.”
^ Eiava reana, “Mai momokani ida oi hahediba.”
^ Gr., “ita ia hoia lou.”
