Lau maragi neganai, havaraia gaudia idauidau lau ura henia. Egu famili be hanaihanai emai hanua kahirakahira ia noho uda bona gohu gabuna namodia momo idia moalelaia, unai be emai hanua Jyväskylä ia be Central Finland ai. Lau be animal lau ura henia bada . Lau maragi neganai, pusi kat bona sisia lau itaia neganai, lau ura lau rosia! Lau bada neganai, lau itaia taunimanima be nega momo animal idia hahisia dainai lau badu. Gabeai animal-rights organization dekenai lau vareai badina ai ura henia gaudia be hegeregere.

Animal edia maoro totona kempein ai karaia. Bona pepapepa ai hariharilaia bona protest ai karaia, ai ura animal huina idia hoia stoa bona vaccine be animal dekenai idia test gabuna idia koua. Danu animal naria gabuna ta ai kehoa. Gau idauidau ai karaia dainai, nega haida polisi ida ai hepapahuahu. Nega momo lau idia arest bona lau idia kota henia.

Animal sibona lasi, to tanobada ai idia vara gaudia danu lau laloa momo. Gabeai, orea haida hegeregere Amnesty International bona Greenpeace lau bamoa. Lau gaukara goada unai orea ta ta lau durua totona. Ogogami taudia bona hitolo taudia, durua totona lau hereva.

To metairametaira lau laloparara tanobada lau haidaua diba lasi. Ena be unai orea ta ta ese gau haida idia hanamoa, to hekwakwanai ia bada ia lao noho. Unai be hegeregere kara dika ese tanobada ibounai ia hadonoa bona taunimanima ese unai idia koua diba lasi. Lau mamia lau be siahu lasi.

Lau mamia gau ta lau karaia diba lasi. Vadaeni, Dirava bona Baibel lau laloa matamaia. Guna Iehova ena Witnes taudia ida Baibel lau stadilaia. Ena be Witness taudia ese lau idia kara namo henia bona idia ura lau idia durua, to unai negai lau ura lasi egu mauri lau haidaua. To hari egu hemami ia idau.

Egu Baibel lau abia bona lau duahia matamaia. Ena hereva be muramura namona bamona egu hisihisi dekenai. Lau itaia Baibel siri momo idia gwau animal ita kara namo henia be namo. Ta be Aonega Herevadia 12:10, ia gwau: “Kara maoromaoro tauna be ena animal idauidau ia naria.” Danu, lau diba Dirava ese tanobada ena dika idauidau ia havaraia lasi, to idia bada idia lao badina taunimanima be iena taravatu idia badinaia lasi. Iehova ena lalokau bona ena haheauka karana lau laloa neganai lau hoa bada.—Salamo 103:​8-​14.

Unai neganai Baibel be Dahaka ia Hadibaia? bukana lalonai adres ta lau davaria bona revareva lau siaia. Daudau lasi murinai, Witnes tau ta bona ena adavana be egu ruma dekenai idia mai bona Baibel stadi lau abia dae. Danu, Kingdom Hall dekenai Keristani hebou totona lau lao matamaia. Unai dainai Baibel amo lau dibaia gaudia lau ura henia matamaia.

Baibel ena heduru amo egu kara idauidau lau haidaua. Kuku ania bona inuinu momo karana lau rakatania. Egu toana bona hereva dalana lau hanamoa bona gavamani taudia lau matauraia. (Roma 13:1) Bona egu matabodaga karana lau rakatania danu.

Lau hekwarahi bada human bona animal rights ena orea dekenai lalohadai maorona lau abia haraga lasi. Guna lau laloa bema unai orea lau rakatania lau be idia lau koia bamona. To hari lau diba Dirava ena Basileia sibona ese tanobada do ia hanamoa. Egu lalona lau hadaia do lau gaukara goada unai Basileia lau harorolaia bona ma haida lau durua unai idia dibaia totona.—Mataio 6:​33.

Guna lau be activist ta dainai, taunimanima be dala rua dekenai lau laloa hegeregere haida be namo bona haida be dika, bona lau gwaurauia dika taudia lau inai henia. To Baibel dainai hari ma haida lau inai henia lasi. To lau gaukara goada taunimanima ibounai dekenai Keristani lalokauna lau hahedinaraia totona. (Mataio 5:44) Unai lalokau lau hahedinaraia dalana ta be, Dirava ena Basileia sivaraina be taunimanima dekenai lau harorolaia. Lau moale badina unai gaukara namona ese maino bona moale ia havaraia bona taunimanima iboudiai dekenai helaro momokani ia henia.

Lau diba Iehova sibona ese gau ibounai do ia hanamoa dainai lau lalohekwarahi lasi. Lau abia dae Havaraia Tauna ese animal bona taunimanima idia hadikaia taudia do ia haorea bona hari tanobada idia hadikaia taudia do ia hadikaia. Daudau lasi lalonai, ena Basileia amo taunimanima ese idia hadikaia gabudia do ia hanamoa lou. (Isaia 11:1-9) Unai hereva momokani lau diba bona ma haida lau durua unai gaudia idia abidadama henia dainai, lau moale bada. Hari lau diba, tanobada ai idia vara gaudia lau haidaua diba lasi.