NEGA momo Iehova ia gwau ia be mamoe naria tauna ta bamona. Baibel ai ita ia hamaoroa: “Lau sibona ese egu mamoe do lau tahua, bona idia do lau naria.”​—Esekiela 34:11, 12.

Iehova ena mamoe be daidia? Idia be Iehova idia lalokau henia bona tomadiho henia taudia. Baibel ia gwau: “Iseda kwarana do ita atoa diho, Lohiabada do ita tomadiho henia. Lohiabada ena vairanai do ita tui diho. Ia ese ita ia karaia vadaeni. Ia be iseda Dirava. Ia ese ita ia naria namonamo, ita be iena mamoe bamona, bona ia ese ita dekenai aniani ia henia noho.” (Salamo 95:6, 7) Mamoe ese mamoe naria tauna idia badinaia hegerererena, Iehova idia tomadiho henia taudia idia ura edia Biaguna idia badinaia. Dika idia davaria diba, a? Oibe. Nega  haida, Dirava ena hesiai taudia be mamoe bamona, “idia loaloa kava,” idia “boio,” o ‘dala maorona amo idia raka siri.’ (Esekiela 34:12; Mataio 15:24; 1 Petero 2:25) To, unai bamona taudia be Iehova ese do ia rakatanidia lasi, badina Ia diba do idia giroa lou.

Oi mamia Iehova be oiemu Mamoe Naria Tauna, a? Hari inai negai, Iehova be edena dala ai ia hahedinaraia ia be Mamoe Naria Tauna? Dala toi mani ita itaia:

Iena Hereva amo ita ia ubua. Iehova ia gwau: “Rei namona gabudia dekenai idia do lau ubua, Israela ena ororo dekenai rei namo herea do idia ania, mai edia gari ta lasi.” (Esekiela 34:14) Hanaihanai Iehova be nega korikori ai iena hereva amo ita ia ubua. Emu guriguri ia haerelaia atikol ta, tok ta, o vidio ta oi laloatao, a? Unai negai oi abia dae momokani Iehova be emu namo ia laloa, a?

Ia ese ita ia gimaia bona durua. Iehova ia gwauhamata: “Idia boio vadaeni mamoedia be do lau tahua, bona loaloa kava gaudia be do lau hakaua lou. Bero mamoedia edia bero do lau kumia, bona mai edia gorere gaudia be do lau hanamoa.” (Esekiela 34:16) Iehova ese manoka taudia bona lalohekwarahi taudia ia durua. Eda tadikaka o taihu ese idia hahekwakwanaia taudia danu be Dirava ese ia durudia​—unai be hegeregere edia bero ia kumia, ia namo totona. Idia boio o lalohadai kerere idia abia taudia danu be Dirava ese ia durudia.

Ita ia laloa bada. Iehova ia gwau: “Iena mamoe idia loaloa kava bona gabu idauidau idia heau boio neganai, mamoe naria tauna ese idia do ia tahua.” Ma ia gwau: “Idia boio vadaeni mamoedia be do lau tahua.” (Esekiela 34:11, 12, 16) Iehova be idia boio mamoedia ia laloa bada. Iena mamoe ta ia boio neganai, ia tahua ela bona ia davaria bona ia moale bada. (Mataio 18:12-14) Ia idia tomadiho henia taudia ia hamaoroa: “Umui be lauegu mamoe, bona umui be lauegu.” (Esekiela 34:31) Oi danu be unai mamoe ta.

Dahaka dainai Iehova be oi ia tahua bona oi ia boiria noho ia dekenai oi giroa lou totona? Badina ia ura oi moale. Ia gwauhamata, iena mamoe do ia hanamoa. (Esekiela 34:26) Unai gwauhamata ena anina do ia vara momokani. Oi sibona ese unai hahenamo haida oi itaia vadaeni.

Iehova oi diba negana mani oi laloa lou. Hegeregere, nega ginigunana Dirava ena ladana bona ia ura taunimanima do ia hanamoa dalana oi dibaia neganai, emu hemami be edena bamona? Sekit o rijinol hebouhebou ai, tadikaka o taihu oi bamoa dainai, oi abia moalena oi laloatao, a? Ta dekenai sivarai namona oi harorolaia bona ia kamonai namonamo dainai, emu ruma dekenai oi giroa lou neganai, oi moale, a?

Unai moale mamina oi abia lou diba. Dirava ena hesiai tauna ta ena guriguri lalonai ia gwau: “Lohiabada e, ai ura oi dekena do ai giroa lou. Mani emu kara, ai do oi abia dae lou. Aiemai mauri do oi hamatamataia lou, dina gunadia hegeregere.” (Lalohisihisi Ena Ane 5:21) Iehova ese unai guriguri ia haerelaia, bona iena taunimanima be ia dekenai idia giroa lou, bona mai moale ida Dirava idia hesiai henia lou. (Nehemia 8:17) Iehova be oi do ia durua danu.

To, Iehova dekenai oi giroa totona be mai ena hekwarahi. Mani do oi davaria hekwakwanai haida bona do oi hanaia daladia oi laloa.