Tadikaka bona taihu e:

Oi diba Baibel dekenai taunimanima edia mauri sivaraidia momo idia noho. Unai abidadama tatau bona hahine momo ese idia davaria metau momo be oi davaria gaudia bamona. Idia be mai edia “hemami ita hegeregerena.” (Iamesi 5:17) Haida be idia lalomanoka. Eiava edia ruma bese o tadikaka o taihu edia kara dainai idia lalohisihisi. Bona ma haida be edia kerere dainai edia lalomamina ia dika.

Unai bamona taudia ese Iehova idia rakatania momokani, a? Lasi. Idia momo idia abia hemami be salamo torea tauna bamona, ia gwau: “Lau be lau loaloa kava noho, ia boio vadaeni mamoe bamona. Unai dainai mani emu kara lau, oiemu hesiai tauna, do oi tahua, badina be oiemu taravatu lau laloaboio lasi.” (Salamo 119:176) Oi danu be unai bamona hemami oi abia, a?

Iehova be orea idia rakatania taudia ia laloaboio lasi. Ia ese nega momo tadikaka taihu ia gaukaralaia orea idia rakatania taudia ia boiria totona. Iehova ese Iobu ia durua dalana mani oi laloa. Iobu be metau haida ia davaria danu, hegeregere ena bisinesi ia dika, ena lalokau taudia idia mase, bona gorere badana ta ia abia. Danu, ena turana haida ese ia idia durua lasi, to edia hereva amo Iobu ena lalona idia hahisia. Ena be nega haida Iobu ia lalohisihisi, to Iehova ia rakatania lasi. (Iobu 1:22; 2:10) Edena dala ai Iehova ese Iobu ia durua lalohadai maorona ia abia totona?

Iehova ese Iobu ia durua dalana ta be ena abidadama tamona tauna Elihu amo. Iobu ese ena lalohekwarahi ia gwauraia neganai, Elihu ia kamonai namonamo bona ia ura Iobu ia durua. Elihu be dahaka do ia gwau? Ia ese Iobu do ia gwau henia o do ia hahemaraia, a? Elihu ia laloa ia be Iobu ia hereaia, a? Lasi! Dirava ena lauma helaga ena heduru dainai, Elihu ia gwau: “Oi bona lau be hegeregere momokani, Dirava ena vairana dekenai. Ita ruaosi be raro dekena amo ita ia karaia.” Bena Iobu ia hagoadaia, ia gwau: “Unai dainai lau dekenai do oi gari lasi. Lau ese, egu siahu henunai oi do lau atoa lasi.” (Iobu 33:6, 7) Elihu be Iobu ena lalohekwarahi ia habadaia lasi, to sisiba namona ia henia bona ia hagoadaia.

Unai hegeregerena, ai ese inai buklet ai hegaegaelaia oi ai hagoadaia totona. Ai ese hereva momokani idia rakatania taudia momo edia hereva ai kamonai guna, unai amo edia noho dalana bona hereva ai laloa namonamo. (Aonega Herevadia 18:13) Bena Baibel lalonai, ai tahua edena dala ai Iehova ese guna negadia ai hekwakwanai idia davaria hesiai taudia ia durua. Bona unai ai gurigurilaia. Unai murinai, Baibel lalonai idia noho sivaraidia bona hari idia noho taudia edia ekspiriens haida be inai buklet lalonai ai torea. Oi ai noia, mani inai buklet oi stadilaia namonamo. Emai lalokau ai siaia oi dekenai.

Iehova Ena Witnes Taudia Edia Hakaua Oreana