“Do Umui Lalokau Heheni”

“Umui dekenai taravatu matamata lau henia inai: Do umui lalokau heheni. Lau ese umui lau lalokau henia hegeregerena, umui danu do umui lalokau heheni. Unai amo taunimanima ibounai do idia diba umui be egu hahediba taudia, bema umui huanai lalokau ia noho.”—IOANE 13:​34, 35.

Anina be Dahaka: Keriso ese iena murinai idia raka taudia ia hadibadia ia lalokau henidia hegeregerena, ta ta do idia lalokau henia danu. Iesu ese edena dala ai idia ia lalokau henia? Ia ese taunimanima ibounai ia lalokau henidia, ena be unai nega ai momo be bese ma haida bona hahine idia lalodika henidia. (Ioane 4:​7-​10) Lalokau dainai, Iesu ese ena nega bona goada ia henia haida ia durua totona, bona sibona ena namo ia laloa lasi. (Mareko 6:​30-​34) Ena mauri dokonai, Keriso ese dala hereadaena ai ena lalokau ia hahedinaraia. Ia gwau: “Lau be mamoe naria tauna namona. Mamoe naria tauna namona ese ena mauri be ena mamoe totona do ia henia.”​​—Ioane 10:11.

Keristani Ginigunadia be Unai Bamona Idia Karaia, A?: Keristani ginigunadia be ta ta idia boiria “tadikaka” bona “taihu.” (Filemona 1, 2) Mai moale ida Keristani kongrigeisen lalonai bese idauidau taudia idia boiria mai, badina idia abia dae “Iuda taudia bona Grik taudia ibounai be hegeregere, badina ibounai edia Lohiabada be tamona.” (Roma 10:​11, 12) Pentekoste 33 C.E., murinai, Ierusalema ai idia noho hahediba taudia ese “edia tano bona edia kohu ibounai idia hoihoilaia bona moni be ibounai dekenai idia haria, ta ta ena dabu gauna hegeregerena.” Unai idia karaia ena badina be dahaka? Idia ura bapatiso matamata taudia be Ierusalema ai do idia noho, bona “aposetolo taudia edia hahediba herevadia idia kamonai namonamo noho.” (Kara 2:​41-​45) Dahaka dainai idia ura unai bamona idia karaia? Aposetolo taudia idia mase bona lagani 200 bamona murinai, Tertullian be ma haida edia hereva ia torea, idia ese Keristani taudia idia herevalaia, idia gwau: “Idia ese ta ta idia lalokau henia bada . . . Bona idia hegaegae ta ta totona do idia mase.”

Hari Daidia be Unai Idia Karaia? Buka ta (The History of the Decline and Fall of the Roman Empire, 1837) ese ia hahedinaraia, lagani momo lalodiai sibodia idia gwauraia Keristani taudia “huanai ta ta idia dagedage henia bada, to Dirava idia diba lasi taudia be Keristani taudia dekenai unai bamona idia karaia lasi.” Vanegai, U.S. dekenai stadi ta amo idia davaria sibodia idia gwauraia Keristani taudia be bese idauidau taudia idia inai henia. Tano ta ai dubu idia lao taudia be tano ma ta ai edia tomadiho tamona taudia idia diba lasi, unai dainai hekwakwanai idia vara neganai edia tomadiho tamona taudia idia durua.

Lagani 2004 ai, hua rua lalonai lai gubana ibounai foa ese Florida idia hadikaia. Florida ena Emergency Operations Committee ena seamani ese kohu bona aniani ia sekea bema taunimanima ese idia gaukaralaia namonamo. Ia gwau Iehova ena Witnes taudia be idia gaukara namonamo bona idia be orea ma haida bamona lasi, unai dainai idia ura gaudia ia henidia. Lagani 1997 ai, Iehova ena Witnes taudia be muramura, aniani bona dabua idia abia lao Democratic Republic of Congo dekenai edia Keristani tadikaka bona ma haida idia durua totona. Europe ai Witnes taudia be edia tadikaka totona kohu bona aniani idia siaia, ena davana ibounai be US$1,000,000.00 bamona.