“Tanobada Ena Lasi”

“Tanobada ese idia ia inai henia, badina idia be tanobada ena lasi, lau hegeregerena, lau be tanobada ena lasi.”—IOANE 17:14.

Anina be Dahaka: Iesu be tanobada ena lasi dainai, taunimanima edia politikol karadia bona hepapahuahu lalonai ia vareai lasi. Ia gwau:“Bema egu Basileia be inai tanobada ena, egu hesiai taudia be do idia tuari, unai amo lau be Iuda taudia dekenai do idia henia lasi. To lau hereva bamona, egu Basileia be inai tanobada ena lasi.” (Ioane 18:36) Danu, ena murinai idia raka taudia ia sisiba henidia Dirava ena Hereva ese ia taravatua lalohadai, hereva bona kara do idia dadaraia.​​—Mataio 20:​25-​27.

Keristani Ginigunadia be Unai Idia Karaia, A?: Tomadiho oreadia edia kara ia torea tauna Jonathan Dym­ond, ia gwau Keristani ginigunadia “idia ura lasi [tuari] lalonai idia vareai; herevana dahaka ia vara, idia gwauraidia dika, idia dagedage henidia o dibura ai idia atodia, o idia hamasedia.” Abia hidi idia karaia hisihisi do idia abia, bona edia gini siri karana idia goadalaia. Kara goevadia idia badinaia dainai idia be idau. Aposetolo Petero ese Keristani taudia ia hamaorodia: “Umui be idia ida kara bodagadia karaia totona umui heau loaloa lasi dainai, idia daradara bona umui idia gwauraia dika.” (1 Petero 4:​4) Histori torea tauna Will Durant, ia gwau Keristani taudia edia “kara helagadia bona kara goevadia dainai, dirava idaudia idia tomadiho henia bona moale karadia idia tahua momo taudia edia lalona ena mamina idia hadikaia.”

Hari Daidia be Unai Idia Karaia? New Catholic Encyclopedia ese Keristani gini siri karana be inai bamona ia gwauraia: “Edia lalomamina dainai idia ura lasi tuari lalonai idia vareai taudia edia kara be maoro lasi.” To, Niuspepa ta ladana Reformierte Presse ese African Rights oreana, dika badadia ai taunimanima idia durua oreana, ena ripoti ta ia halasia. Unai ripoti ia hahedinaraia, lagani 1994 ai, Rwanda dekenai ala-ala bada ia vara neganai, idia hamomokania dubu ibounai be unai dagedage karana lalonai idia vareai, “to Iehova ena Witnes taudia be idia vareai lasi.”

Sikuli tisa ta be Nazi Holocaust ia herevalaia neganai, ia gwau “unai hanua taudia edia grup o orea ta ese idia vara koikoi herevadia, dagedage bona ala-ala bada karana idia gwauraia dika lasi.” To, United States Holocaust Memorial Museum, ida ia herevahereva murinai inai ia torea: “Hari egu haere lau davaria.” Ia dibaia gauna be Iehova ena Witnes taudia be dagedage bada idia davaria, badina idia abidadama henia gaudia idia badinaia auka.

Edia Keristani kara goevadia be edena bamona? U.S. Catholic magasin, ia gwau: “Inai nega ena Katolik matamata taudia be dubu ena hahediba herevadia headava lasi to mahuta hebou karana o noho hebou karana dekenai idia abia dae lasi.” Unai magasin ese dubu ena diakono tauna ena hereva ia hahedinaraia, ia gwau: “Lau itaia, momo herea, hegeregere 50 pesen bamona be idia noho hebou vadaeni, bena headava totona idia mai.” The New Encyclopædia Britannica ia hahedinaraia Iehova ena Witnes taudia “edia kara ibounai lalonai idia be kara goevadia idia badinaia.”