Lau be Guatemala ena west kahanai ia noho ororo gabuna ena taoni ta ladana Acul dekenai lau vara. Egu famili be Ixil taudia, idia be Maya taudia edia bese amo. Spain gado lau diba, to emai gabu ena gado korikorina lau hereva diba. Lau maragi neganai, Guatemala ai lagani ibounai 36 lalonai tuari ia vara. Unai nega lalonai Ixil taudia momo idia mase.

Egu mauri lagani be 4 neganai, egu kakana be 7, bona hand grenade ta ia gadaralaia lalonai ia hapoua. Unai aksiden dainai, egu matana ia dika, to egu kakana madi, ia mase. Unai dainai, lau maragi neganai, Guatemala siti ai matakepulu taudia ida lau sikuli bona unuseniai Braille lau dibaia. Unuseniai lau laloparara lasi, to unai gabu naria taudia ese taravatu idia atoa natudia ma haida do lau hereva henia lasi, bona lau idia bamoa lasi. Lau be sibona dainai nega momo lau lalohisihisi, bona hua rua lau naria badina unai nega ai do lau giroa lou bona egu sinana ida lau noho, ia be hanaihanai lau ia kara namo bona hebogahisi henia. To madi, egu mauri lagani be 10 neganai ia mase. Unai neganai lau mamia lau ia lalokau henia tauna be lasi, unai dainai lau lalohisihisi bada herea.

Egu lagani be 11 neganai, egu taoni dekenai lau giroa lao bona egu kakana ma ta bona ena famili ida lau noho. Tauanina dalanai lau idia naria namonamo, to ta ese lau ia durua lasi egu hemami dalanai. Nega haida Dirava dekenai lau taitai bona lau gwau: “Dahaka dainai egu sinana ia mase? Dahaka dainai lau be matakepulu?” Taunimanima ese lau idia hamaoroa idia vara gau dikadia be Dirava ena ura. Unai dainai lau laloa Dirava ena kara be gageva bona ia hebogahisi lasi. Bona sibona lau hamasea lasi badina dala lasi unai lau karaia totona.

Lau be matakepulu dainai tauanina dalanai bona hemami dalanai lau hekwarahi bada. Lau be mero maragi neganai, haida ese sex karana amo lau idia hadikaia. Unai gaudia be polisi dekenai lau ripotilaia lasi, badina lau laloa ta be lau ia laloa bada lasi. Taunimanima be lau idia hereva henia diba lasi, bona idia lau hereva henia diba lasi. Unai dainai sibona lau noho bona lau lalohisihisi, danu tau ta lau trast lasi.

Lau be mero matamata neganai, Iehova ena witnes taudia rua (headava tau bona hahine ta) be sikuli gabunai lau gadara neganai, lau idia hereva henia. Sikuli gabunai tisa ta ese lau ia hebogahisi henia dainai idia ia noia lau do idia vadivadi henia. Lau idia hadibaia vaira negana ai mase taudia do idia toreisi lou bona matakepulu taudia do idia itaia lou. (Isaia 35:5; Ioane 5:28,29) Edia hereva lau kamonai neganai lau moale, to taunimanima ida lau hereva momo lasi dainai, ia auka idia lau hereva henia. Ena be lau hereva momo lasi, to mai haheauka ida hanaihanai lau idia vadivadi henia bona Baibel amo lau idia hadibaia. Unai headava tau bona ena hahine be kilomita 10 mai kahana bamona idia raka bona ororo ta idia hanaia, bena lau noho taoni dekenai idia mai.

Egu kakana ese idia ia herevalaia, idia be dabua namodia idia hahedokilaia, to toana be idia be kohu momo lasi maurina idia noholaia. To hanaihanai lau idia laloa bona lau totona harihari gaudia idia mailaia. Lau diba Keristani taudia momokanidia sibona ese unai bamona kara idia karaia diba.

Braille pablikeisen amo Baibel lau stadilaia. Ena be lau dibaia gaudia edia anina lau lalopararalaia, to gau haida lau abia dae be auka hegeregere, Dirava be lau ia laloa bada, bona ma haida ese Ia bamona lau idia kara namo henia diba. Lau laloparara dahaka daianai Iehova ese kara dika ia koua lasi, to Iehova be lalokau Tamana bamona lau laloa totona be ia auka. *

Metairametaira Baibel amo lau diba gaudia ese egu lalona idia haidaua. Hegeregere, lau dibaia gauna be taunimanima idia lalohisihisi neganai, Dirava be idia ia hebogahisi henia. Dagedage taudia ese ia idia tomadiho henia taudia idia hahisia neganai, Dirava ia gwau: “Momokani, lau ese egu taunimanima edia hisihisi . . . bona idia mamia hisihisi lau diba.” (Esodo 3:7) Iehova ena lalokau bada karadia lau laloa dobu neganai, lau ura egu mauri be ia dekenai lau gwauhamatalaia. Lagani 1998 bapatiso lau abia bona Iehova ena Witnes ta ai lau lao.

Bapatiso lau abia murinai, lagani ta bamona, Escuintla kahirakahira ia noho siti ai matakepulu taudia edia sikuli ta dekenai lau lao. Egu kongregeisen elda ta ia davaria egu taoni dekenai lau noho bona kongrigeisen hebou lau lao totona be mai ena hekwarahi, badina ororo do lau raka hanaia. Badina emai kongrigeisen be ororo ai, unai be lau idia stadi henia tadikaka bona ena adavana idia mai dalana hegeregerena. Unai dainai lau ia durua totona, Escuintla ai idia noho witnes famili ta ia hereva henia bona edia ruma ai lau idia abia dae, bona lau idia durua kongrigeisen hebou lau lao totona. Ema bona hari lau idia naria edia natuna ta bamona.

Nega momo kongrigeisen tadikaka bona taihu ese lau dekenai lalokau idia hahedinaraia. Edia kara namodia dainai lau diba momokani, lau be Kristani korikori huanai lau noho.​—Ioane 13:34, 35.

Hari lau be mai egu helaro bona egu mauri be mai anina bada. Hari lau be Iehova ena Witnes taudia ese idia karaia Baibel hadibaia gaukara lau karaia bona ma haida dekenai Baibel ena hereva momokani lau hadibaia, to egu hekwakwani lau laloa momo lasi. Danu, lau be elda ta bona kongrigeisen idauidau dekenai Baibel amo tok lau henia. Nega haida rijinol hebouhebou ai tok lau henia bona taunimanima tausen ese idia kamonai.

Lagani 2010 El Salvador ai, lau be Hesiai Gaukara Hadibaia Sikulina (Hari idia gwauraia Basileia Evanelia Sikuli) dekenai lau gradueit. Unai sikuli ese lau ia durua kongrigeisen lalonai egu gaukara lau karaia namonamo totona. Lau abia treinini dainai, lau mamia Iehova be lau ia lalokau henia bona ia dekenai lau be dava bada gauna ta bamona. Ia ese ta ia hadibaia diba ena gaukara ia karaia totona.

Iesu ia gwau: “Henia kara ena moale be bada.” (Kara 20:35) Hari, lau gwau diba lau moale bada. Ena be guna lau laloa dala be lasi ma haida lau durua totona, to hari lau mamia ma haida lau durua diba.