1, 2. Edena dala ai Satani ese dika bona gorere ia gaukaralaia, Iobu ena kara maoromaoro ia hadikaia totona?

 MOMOKANI ita gwau diba Iobu be ruma bese maurina namona ia moalelaia tauna ta. Baibel ese Iobu ia herevalaia, ia gwau: ‘Orient taudia ibounai huanai, ia be tau badana.’ Ena natudia memero be 7 bona ena natudia kekeni be 3, natudia ibounai be 10. Ena kohu ia hegeregere, ena ruma bese ia naria namonamo totona. Mai anina bada gauna be, lauma dalanai ena ruma bese ia hakaua bona ena natudia edia gini Iehova vairanai ia laloa bada. Unai ibounai dainai edia ruma bese maurina ia namo bona idia moale.—Iobu 1:1-5.

² Iobu ena noho be Satani, Iehova Dirava ia inai henia tauna badana, ese ia itaia. Satani, hanaihanai Dirava ena hesiai taudia edia kara maoromaoro hadikaia daladia ia tahua aneruna, ese Iobu ia dagedage henia ena ruma bese moalena ia hadikaia karana amo. Bena, “toto dika herea dekena amo Iobu ia hahisia, iena aena dekena amo ela bona iena kwarana dekenai.” Unai dala ai, Satani ese hisihisi bona gorere amo Iobu ena kara maoromaoro ia hadikaia toho.—Iobu 2:6, 7.

3. Iobu ena gorere ena toana idauidau be dahaka?

³ Baibel ese ia hahedinaraia lasi, medikol dalanai Iobu ena gorere be dahaka. To, unai gorere ena toana ia gwauraia. Ena tauanina be gaigai maragidia amo ia honu, bona ena rara kurokuro be ena toto dekena amo ia diho noho. Iobu ena hahodi bona ena tauanina ena bonana idia dika. Ena tauanina ia hisihisi bada herea. (Iobu 7:5; 19:17; 30:17, 30) Ena hisihisi dainai Iobu be lahi momoru  dekenai ia helai bona uro ena kahana maragina ta dekenai sibona ia kakasia. (Iobu 2:8) Madi, ena gorere be dika momokani!

4. Ruma bese ibounai dekenai nega haida dahaka ia vara?

⁴ Bema oi ese unai bamona gorere dikana oi abia, dahaka do oi karaia? Hari inai negai, Satani ese Dirava ena hesiai taudia be gorere amo ia hahisia lasi, Iobu ia hahisia bamona. To, bema ita laloatao ita be goevadae lasi, dina ta ta mauri be mai ena hekwarahi, bona iseda noho ia dika ia lao, ita diba nega haida ruma bese taudia do idia gorere. Ena be gorere koua totona gau haida ita karaia, ita ibounai ita gorere diba, to haida sibona edia gorere be Iobu ena hegeregerena. Ruma bese lalonai ta ia gorere neganai, nega haida ita hekwarahi bada. Unai dainai namona be ita itaia Baibel ese edena dala ai ita ia durua, taunimanima ia hahisia noho gauna ita haheaukalaia totona.—Hadibaia Tauna 9:11; 2 Timoteo 3:16.

5. Nega ta ta idia vara gorere idauidau dainai ruma bese taudia be dahaka idia karaia?

⁵ Herevana dahaka ese iseda dina ta ta maurina ia haidaua, to ita dekenai unai be auka, bona bema nega daudau ia noho gorerena ese ia haidaua, ia auka momokani. Nega kwadogi lalonai ta ia gorere neganai danu, iseda kara bona ura gaudia haida ita haidaua bona haida ita dadaraia. Reana idia gorere lasi taudia be rege idia karaia lasi be namo, gorere tauna ia laga-ani namonamo totona. Reana edia gaukara haida idia karaia diba lasi. To, ruma bese momo lalonai natuna ta eiava tama o sina ia gorere neganai, natudia maragidia danu idia hebogahisi, ena be nega haida idia kara namo totona sisiba idia abia be namo. (Kolose 3:12) Gorere be nega ta ta ia vara neganai, nega momo ruma bese taudia be gorere tauna durua gaudia idia karaia mai edia ura ida. Danu, ruma  bese taudia ta ta idia gorere neganai, idia ura ma haida ese unai bamona hebogahisi idia hahedinaraia idia dekenai.—Mataio 7:12.

6. Nega haida dahaka ia vara bema ruma bese tauna ta be nega daudau lalonai ena gorere ia bada?

⁶ To, bema gorere be dika bona nega daudau lalonai emu mauri ia haidaua bada be edena bamona? Hegeregere, edena bamona bema ruma bese lalonai ta ena tauanina ia mase, Alzheimer gorerena dainai gau momo ia karaia diba lasi, eiava ma gorere ta dainai ena goada ia ore? Eiava bema ruma bese lalonai ta ese harana gorerena, hegeregere schizophrenia ia abia be edena bamona? Matamanai momo idia hebogahisi—idia lalohisihisi badina edia lalokau tauna be hisihisi bada ia abia noho. To, hebogahisi murinai hemami ma haida idia vara diba. Ruma bese taudia idia itaia ta ena gorere dainai edia mauri ia idau bona edia ura gaudia momo idia karaia lasi neganai, reana idia badu. Reana idia laloa: “Dahaka dainai inai be lau dekenai ia vara?”

7. Iobu ena gorere dainai ena hahine be dahaka ia karaia, bona dahaka ia laloaboio?

⁷ Toana be Iobu ena adavana ena lalohadai be sisina unai bamona. Namona be oi laloatao, ena natudia ibounai idia mase dainai ia lalohisihisi bada. Unai gau dikadia idia vara loulou lalonai, ena daradoko ia bada ia lao. Gabeai, ia itaia ena adavana, guna mai goada ida ia gaukara bada tauna, ese hisihisi ia havaraia gorere dikana  ia abia neganai, toana be ia ese gau dikadia ibounai ia hereaia gauna namona ia laloaboio—sibona ena bona ena adavana ena hetura karana Dirava ida. Baibel ia gwau: “Vadaeni Iobu ena adavana ese ia hereva, ia gwau, ‘Iobu e, oiemu lalona be do ia maoromaoro noho, bona Dirava dekenai oi abidadama henia noho, a? Namona be Dirava ena ladana do oi hadikaia, vadaeni oi mase!’”—Iobu 2:9.

8. Bema ruma bese tauna ta ia gorere bada, edena Baibel siri ese ruma bese taudia ma haida do ia durua diba idia laloa maoromaoro totona?

⁸ Momo idia lalohisihisi, idia badu danu, badina edia mauri be ma ta ena gorere dainai ia idau momokani. To, unai ia laloa namonamo Keristani tauna be do ia lalo-parara unai gorere ese dala ia kehoa ena lalokau korikorina ia hahedinaraia totona. Lalokau korikorina “be ia dekenai ia kara dika tauna davana ia laloa lasi. Lalokau be mai ena bogahisihisi, haida durua totona. . . . Lalokau be sibona ena gau ia tahua lasi. . . . Lalokau be taunimanima durua kara dekenai ia hesiku lasi. Nega ibounai iena abidadama ia goada noho. Nega ibounai Dirava ena nega namona ia naria noho mai moale danu. Bona metau ibounai lalonai ia gini goada noho.” (1 Korinto 13:4-7) Unai dainai, namo lasi lalohadai kereredia ese iseda mauri idia biagua, to gau badana be ita hekwarahi, iseda lalohadai ita biagua totona.—Aonega Herevadia 3:21.

9. Bema ruma bese lalonai ta ia gorere bada, edena hereva ese lauma dalanai bona hemami dalanai ruma bese ia hagoadaia diba?

⁹ Bema ruma bese tauna ta ia gorere bada, dahaka idia karaia diba lauma dalanai bona hemami dalanai idia goada noho totona? Momokani, gorere ta ta be mai ena durua bona hanamoa daladia idauidau, bona inai buka lalonai medikol daladia eiava ruma dekenai naria daladia ai herevalaia be maoro lasi. To, lauma dalanai, Iehova ese “hisihisi taudia ia abia isi noho.” (Salamo 145:14) King Davida ia gwau: “Ogogami taudia ia laloa tauna be namo. Lohiabada ese ia do ia durua, bema  hisihisi ia davaria neganai. Lohiabada ese unai tau do ia gimaia, bona iena mauri do ia naria. . . . Bona unai tau, ogogami taudia ia laloa tauna, ia gorere neganai, be Lohiabada ese do ia durua.” (Salamo 41:1-3) Lauma dalanai Iehova ese ena hesiai taudia ia hamauria, herevana edia hemami idia manoka momokani vadaeni. (2 Korinto 4:7) Ruma bese lalonai ta ia gorere bada neganai, momo be salamo torea tauna ena hereva bamona idia gwau: “Lohiabada e, egu hisihisi be dika momokani. Oiemu gwauhamata hegeregerena oi ese lau do oi hamauria.”—Salamo 119:107.

10, 11. (a) Ruma bese ese gorere ia haheaukalaia namonamo totona dahaka be gau badana? (b) Hahine ta ese edena dala ai ena tau ena gorere ia haheaukalaia diba?

¹⁰ Baibel ena aonega herevana ta ia gwau: “Tau ta do ia gorere neganai, do ia haheauka diba, to iena [lalona] ena goada ia ore neganai, tau be edena bamona do ia haheauka diba?” (Aonega Herevadia 18:14) Ta ia gorere bada ese ruma bese taudia edia lalo-goada ia hadikaia diba, ‘tau ta ena lalo-goada’ ia hadikaia diba hegeregerena. To, “bema oiemu kudouna be mai ena maino danu neganai, oiemu tauanina do ia noho namo.” (Aonega Herevadia 14:30) Ruma bese ese gorere dikana do idia haheaukalaia namonamo eiava lasi be ruma bese taudia edia lalohadai, eiava lalo-goada, hegeregerena.—Aonega Herevadia 17:22 itaia.

¹¹ Keristani hahine ta be ia headava bena lagani 6 sibona murinai, ena adavana ena tauanina ia mase. Ia gwau: “Egu adavana ena hereva dalana be ia dika momokani, bona ia ida lau herevahereva be auka momokani. Ia gwauraia toho gaudia lalo-parara totona lau hekwarahi bada herea.” Unai tau ese ia mamia hisihisi bona lalohisihisi mani oi laloa danu. Idia ruaosi be dahaka idia karaia? Ena be edia noho gabuna be Keristani kongregesen amo ia daudau, to lauma dalanai ia goada totona  unai taihu ia hekwarahi bada, orea ese ia halasia herevadia bona Gima Kohorona bona Awake! magasin amo idia mai lauma aniani ibounai ia abia hanaihanai. Unai ese lauma dalanai ia hagoadaia bena ia hegeregere ena adavana lalokauna ia naria ela bona lagani hani murinai ia mase.

12. Iobu hegeregerena, gorere tauna ese nega haida ma haida be edena bamona ia durua?

¹² Iobu ena sivarai lalonai, ia be gorere tauna, to ia goada noho. Ena adavana dekenai ia henanadai, ia gwau: “Bema Dirava ese gau namona ia henia neganai, ita abia dae mai moale danu, ani? Bema dika ia henia neganai do ita maumauraia, a?” (Iobu 2:10) Iena kara dainai, gabeai hahediba tauna Iamesi ia gwau Iobu be haheauka bona sibona ena hemami ia biagua goadagoada tauna badana! Iamesi 5:11 ia gwau: “Iobu ena haheauka sivaraina umui kamonai vadaeni, bona Lohiabada ese dokona neganai Iobu ia durua bada, ani? Badina be Lohiabada be mai ena bogahisihisi, bona iena hariharibada be bada herea.” Hari inai negai danu, ia gorere tauna ena lalo-goada ese nega momo ena ruma bese taudia ma haida ia durua bena idia lalo-goada danu.

13. Bema ruma bese lalonai ta ia gorere bada, edia mauri be edena bamona do idia hahegeregerea lasi be namo?

¹³ Edia ruma bese lalonai gorere idia haheaukalaia taudia momo idia gwau, matamanai ruma bese taudia ese unai idia abia dae be auka. Danu, idia gwau ta ese unai gorere ia laloa dalana be mai anina bada. Ruma bese lalonai gau idauidau idia haidaua matamaia be reana ia auka. To bema ta be mai momokani ida ia hekwarahi, dala matamatana do ia badinaia diba. Unai ita karaia neganai gau badana be, iseda mauri be gorere lasi ruma besedia edia mauri ida ita hahegeregerea lasi. Ita laloa lasi edia mauri be auka lasi, iseda mauri ia auka bamona bona ‘unai be maoro lasi!’ Momokani, ta be ma haida ese idia huaia metau ia diba lasi. Iesu  ena hereva ese Keristani taudia ibounai ia hagoadaia, ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai.”—Mataio 11:28.

14. Edena dala ai mai anina bada gaudia idia tahua guna?

¹⁴ Ta ia gorere bada neganai, namona be ruma bese taudia ese Dirava ena lauma amo ia vara herevana idia laloatao, ia gwau: “Sisiba taudia be momo neganai anina idia havaraia.” (Aonega Herevadia 15:22, NW) Ruma bese taudia ese unai gorere dainai idia vara gaudia idia herevalaia hebou diba, a? Ia namo bema mai guriguri ida unai idia karaia bona Dirava ena Hereva amo heduru idia tahua. (Salamo 25:4) Unai bamona idia karaia neganai dahaka idia herevalaia be namo? Namona be medikol heduruna, moni, bona ruma bese lalonai mai anina bada gaudia ma haida idia herevalaia. Daika ese gorere tauna do ia naria? Edena dala ai ruma bese taudia ese unai naria dalana idia durua diba? Idia abia hidi gaudia edia anina ruma bese taudia ta ta edia mauri dekenai be dahaka? Gorere tauna ia naria tauna be lauma dalanai bona ma dala haida ai edena bamona do idia durua?

15. Bema ruma bese lalonai gorere badana ia do noho, Iehova ese edena bamona heduru ia henia?

¹⁵ Iehova ese ita ia hakaua totona ita guriguri mai momokani ida, ena Hereva ita laloa dobu, bona Baibel ese ia gwauraia dalana be mai gari lasi ida ita badinaia neganai, nega momo guna ita laloa lasi hahenamodia do ita abia. Nega haida ia gorere ruma bese tauna ena gorere ia namo ia lao lasi. To Iehova tabekau henia hanaihanai karana amo, namo do ia vara. (Salamo 55:22) Salamo torea tauna ia gwau: “Lohiabada e, oiemu lalokau bada ese lau ia abia isi lou. Egu lalona ia hekwarahi momo neganai, oi ese lau oi hagoadaia, bona egu lauma  oi hamoalea noho.”—Salamo 94:18, 19; mani Salamo 63:6-8 itaia.

16, 17. Natuna ta ena gorere be natudia ma haida ida oi herevalaia neganai, dahaka gaudia oi hahedinaraia be namo?

¹⁶ Bema ruma bese lalonai ta ia gorere bada, natudia ese hekwakwanai idia davaria diba. Gau badana be tama sina ese natudia idia durua, bena idia ese idia vara gaudia bona idia durua diba daladia idia lalo-pararalaia. Bema natuna ta ia gorere, namona be natudia ma haida idia lalo-parara, ena be tama sina ese ia gorere natuna idia laloa bada bona idia naria bada, to natudia ibounai idia lalokau henia. Natudia be do idia badu heheni eiava idia kara helulu be namo lasi, to namona be tama sina ese natudia idia durua, gorere dainai idia vara gaudia idia haheaukalaia lalonai idia ura heheni bona idia lalokau heheni totona.

¹⁷ Natudia maragidia be hereva do idia kamonai, bema tama sina ese edia hemami idia veria, to hereva aukadia amo gorere idia herevalaia daudau be namo lasi. Natudia umui durua bena gorere tauna ena hemami idia lalo-pararalaia be namo. Bema idia gorere lasi natudia idia itaia mai edia moale ida idia karaia diba gaudia momo be ia gorere natuna ese ia karaia diba lasi, reana do ‘idia lalokau henia, bona idia hebogahisi henia’ bada danu.—1 Petero 3:8.

18. Memero kekeni badadia be edena bamona oi durua diba, gorere ia havaraia hekwarahi idauidau idia lalo-pararalaia totona, bona unai dainai dahaka idia karaia diba?

¹⁸ Namona be memero kekeni badadia oi durua bena do idia lalo-parara, unai metau gauna ia vara dainai ruma bese taudia ibounai ese gau haida do idia reaia. Doketa bona muramura edia davana dainai, reana tama sina ese edia ura hegeregerena natudia ma haida idia naria diba lasi. Natudia be unai dainai do idia badu bona idia laloa edia ura gaudia idia abia lasi, a? Eiava  emui noho idia lalo-pararalaia bona mai edia ura ida gau haida idia reaia, a? Unai gauna umui herevalaia dalana bona ruma bese lalonai umui havaraia lalohadaina be mai anina bada. Momokani, ruma bese momo lalonai ta ena gorere ese dala ia kehoa dainai natudia ese Paulo ena sisiba idia badinaia, ia gwau: “Umui sibona emui ladana do umui habadaia gwauraia lasi, bona do umui hekokoroku lasi. To umui ibounai ta ta dekenai do umui manau. Umui ta ta nega ibounai inai bamona do umui laloa, ‘Haida be idia namo herea, to lau be namo lasi.’ Bona umui ese umui emui namo sibona do umui tahua lasi. Lasi, to umui ta ta ibounai ese haida edia namo do umui tahua, bona do umui durudia noho.”—Filipi 2:3, 4.

19, 20. (a) Bema ruma bese lalonai ta ia gorere, ruma bese kwarana ena maduna be dahaka? (b) Ena be Baibel be medikol heduru bukana lasi, to edena dala ai ia ese heduru ia henia gorere haheaukalaia totona?

¹⁹ Idia laloa maoromaoro Keristani taudia ese medikol heduruna idia dadaraia lasi, bema ia be Dirava ena taravatu ia utua dalana ta lasi. Edia ruma bese lalonai ta ia gorere neganai, ena hisihisi hamaragia totona heduru idia tahua mai edia ura ida. To, reana medikol taudia edia lalohadai be idauidau dainai idia laloa namonamo be namo. Danu, vanegai laganidia lalonai gorere matamatadia idia vara, bona idia momo totona medikol taudia iboudiai ese idia abia dae hanamoa dalana badana idia do davaria lasi. Nega haida unai gorere idia davaria be auka danu. Unai dainai, Keristani tauna be dahaka ia karaia be namo?

²⁰ Ena be Baibel torea tauna ta be doketa tauna bona aposetolo Paulo ese ena turana Timoteo dekenai medikol heduru herevana ia gwauraia, to Baibel be kara maoromaoro bona lauma gaudia dekenai heduru ia henia bukana, ia be medikol heduru bukana lasi. (Kolose  4:14; 1 Timoteo 5:23) Unai dainai, Keristani ruma bese kwaradia ese mai edia laloa maoromaoro ida sibona edia lalona idia hadaia edena medikol heduruna do idia abia dae. Reana idia laloa diba bada tauna tamona lasi, to haida edia lalohadai do idia tahua. (Aonega Herevadia 18:17 itaia.) Idia ura bada ia gorere ruma bese tauna be medikol heduru hereadaena ia abia, bona idia momo be doketa taudia amo unai idia tahua. Haida ese heduru daladia ma haida idia ura henia. Unai danu be idia sibona ese do idia abia hidi gauna. To, gorere idauidau idia laloa neganai, Keristani taudia idia laloaboio lasi ‘Dirava ena hereva be lamepa bamona, idia ia hakaua noho, ia be diari bamona, ia ese edia dala ia hadiaria noho.’ (Salamo 119:105) Idia ese Baibel ia hahedinaraia daladia idia badinaia noho. (Isaia 55:8, 9) Unai dainai, meamea bamona karadia amo gorere tahua daladia idia  dadaraia, bona Baibel ena hakaua herevadia ia utua medikol heduruna idia dadaraia.—Salamo 36:9; Kara 15:28, 29; Apokalupo 21:8.

21, 22. Asia hahine ta ese Baibel ena hakaua herevana ta be edena bamona ia lalohadailaia, bona ena mauri lalonai ia abia hidi gauna ese dahaka namo ia havaraia?

²¹ Asia hahine matamatana dekenai ia vara gauna mani oi laloa. Iehova ena Witness taudia ta ida ia stadi bena Baibel ia dibaia sisina murinai, ena beibi kekeni ia havaraia haraga bona ena metau be kilogram 1.5 sibona. Unai hahine ia lalohisihisi bada, badina doketa ese ia hamaoroa ena beibi ena harana do ia namo lasi bona do ia raka diba lasi. Unai doketa tauna ese ia hagoadaia beibi be naria hospital ta dekenai do ia henia. Ena tau ia daradara dahaka do idia karaia be namo. Daika amo heduru ia abia diba?

²² Unai hahine ia gwau: “Lau laloatao Baibel amo lau diba, ‘natudia be Dirava ena harihari gauna ita dekenai. Dirava ese ita dekenai ia henidia, bona idia ese ita idia hanamoa noho.’” (Salamo 127:3) Unai “harihari gauna” be ruma dekenai ia abia lao bona ia naria. Matamanai ia hekwarahi bada, to unai gabu ena Iehova ena Witness taudia edia kongregesen lalonai idia noho Keristani turadia ese ia idia durua danu, bena unai hahine ia hegeregere bona natuna dekenai mai anina bada heduruna ia henia diba. Lagani 12 murinai, unai natuna be Kingdom Hall dekenai hebou ia lao henidia bona unuseniai memero kekeni edia hebamo ia moalelaia. Unai sinana ia gwau: “Lau moale bada herea, badina be Baibel ena hakaua herevadia ese lau idia durua kara maorona lau karaia totona. Baibel ese lau ia durua Iehova Dirava vairanai egu lalona ena mamina ia namo totona bona egu mauri ibounai lalonai do lau lalohisihisilaia karana lau karaia lasi.”

23. Baibel ese edena dala ai gorere taudia bona gorere taudia idia naria taudia ia hagoadaia?

²³ Gorere be do ia ore. Peroveta tauna Isaia ese vaira  negana ia herevalaia, ia gwau do “idia noho taudia ta ese do ia gwau lasi, ‘Lau be gorere.’” (Isaia 33:24) Unai gwauhamata be kahirakahira do ia vara tanobada matamana lalonai do ia guguru. To, ela bona unai nega, ita ese gorere bona mase ita haheaukalaia noho. Ita moale diba, badina Dirava ena Hereva ese ita ia hakaua bona ia durua. Baibel ena taravatu badadia be goevadae lasi taudia ese idia haidaua loulou lalohadaidia idia hereaia. Unai dainai, aonega tauna ese salamo torea tauna ena hereva ia abia dae, ia gwau: “Lohiabada ena Taravatu be ia namo momokani. Ia ese taunimanima edia [souli] ia hamauria lou. Lohiabada ena hadibaia hereva be momokani vadaeni. Idia ese aonega lasi taudia dekenai, aonega idia henia. . . . Lohiabada ena kota henia karana be momokani, bona nega ibounai, Lohiabada ena kota davana be maoromaoro. . . . Lau ese idia lau badinaia neganai, noho mauri namona momokani lau davaria.”—Salamo 19:7, 9, 11.