Karoa 54

‘Aniani Momokani Guba Amo’

IESU ese hutuma ia ubudia, bena king ai idia halaoa gwauraia neganai ia heau oho. Unai hanuaboi ai, Galilea Gohuna ena kopina ai ia raka; Petro ia maloa gwauraia neganai ia hamauria; hurehure ia koudia, ena hahediba taudia edia vanagi do ia mutu garina.

Unai murinai, Iesu be hoa dalana amo ia ubudia taudia ese idia tahua. Kaperanaum ai idia davaria neganai, idia nanadaia, idia gwau: “Edena negai oi mai?” Iesu ia gwau henidia, ia gwau idia tahua badina idia ura aniani do ia henidia, davana lasi. Ia hamaorodia, namona be idia gaukara lasi ia ore anianina abia totona, to do ia noho ela bona mauri hanaihanai anianina abia totona idia gaukara be namo. Bena idia nanadaia, idia gwau: “Ai be edena bamona do ai karaia, Dirava ena gaukara karaia totona?”

Iesu ese mai anina bada gaukarana ta ia gwauraia, ia gwau: “Dirava ena gaukara be inai: ia siaia tauna dekenai do umui abidadama henia.”

Ena be Iesu ese hoa karadia momo ia karaia vadaeni, to idia abidadama henia lasi. Idia nanadaia, idia gwau: “Toana be dahaka do oi karaia, do ai itaia, vadaeni do ai abidadama henia oi dekenai? Oi be dahaka do oi karaia? Aiemai sene taudia ese mana idia ania noho taunimanima idia noho lasi tano dekenai, Buka Helaga dekenai ia torea hegeregerena, ia gwau, ‘Edia aniani be ia ese guba dekena amo ia henia diho.’ ”

Ia haere henidia neganai, aniani be hoa dalana amo ia henia Tauna ia gwauraia hedinarai; ia gwau: “Mose be aniani guba dekena amo ia henia diho lasi umui dekenai. To egu Tamana ese aniani guba dekena amo ia siaia diho noho umui dekenai, aniani momokani be inai. Badina Dirava ena aniani be guba dekena amo ia diho mai vadaeni, bona mauri be tanobada dekenai ia henia noho.”

Iesu idia noia, idia gwau: “Lohiabada e, inai aniani be dina ibounai do oi henia ai dekenai.”

Iesu ia gwau: “Mauri ena aniani be lau inai. Lau dekenai ia mai tauna be do ia hitolo lasi, bona lau dekenai do ia abidadama henia tauna be do ia ranu mase lasi, lasi bona lasi momokani. To umui lau hamaoroa vadaeni, ani, umui itaia lau, to umui abia dae lasi lau. Lauegu Tamana ese lau dekenai ia henia taudia ibounai be lau dekenai do idia mai, bona lau dekenai do ia mai tauna be do lau lulua lasi, lasi bona lasi momokani. Badina be guba dekena amo lau diho mai vadaeni, lauegu ura karaia totona lasi, to lau ia siaia Diravana ena ura karaia totona. Bona lau ia siaia Diravana ena ura be inai: lau dekenai ia henia taudia ibounai ta do ia boio lasi lau dekena amo, to inai taudia do lau hatorea isi dokona dina dekenai. Badina be egu Tamana ena ura be inai: ena Natuna do idia itaia noho bona do idia abidadama henia taudia ibounai be mauri hanaihanai do idia abia.”

Bena Iuda taudia ese Iesu idia maumauraia, badina be ia gwau: “Lau be guba dekena amo ia diho anianina.” Idia laloa ia be taunimanima edia natuna mo, unai dainai Nasaret taudia bamona idia abia dae lasi, idia gwau: “Be! Inai be Iesu lasi, a? Iosepa ena natuna lasi, a? Ena tamana bona ena sinana be ita diba vadaeni. Edena bamona ia be ia gwau, ‘Lau be guba dekena amo lau diho’?”

Iesu ese ia haere henidia, ia gwau: “Unai bamona umui maumau lasi. Lauegu Tamana, lau ia siaia Diravana, ese do ia veria mai tauna sibona lau dekenai do ia mai diba, vadaeni dokona dina neganai unai tauna do lau hatorea isi. Peroveta taudia ese inai bamona idia torea, idia gwau, ‘Idia ibounai Dirava ese do ia hadibaia.’ Egu Tamana dekenai idia kamonai henia bona ena hadibaia herevadia idia abia dae taudia ibounai be lau dekenai idia mai. Tau ta ese Tamana ia itaia lasi, Dirava dekena amo ia mai tauna sibona ese ia itaia vadaeni. Momokani, momokani umui lau hamaoroa, abidadama tauna ese mauri hanaihanai ia abia.”

Ma Iesu ia gwau lou: “Mauri ena aniani be lau inai. Emui tubudia ese mana idia ania taunimanima idia noho lasi tano dekenai, to idia mase vadaeni. Guba dekena amo ia diho noho anianina be inai, tau ta ese do ia ania, do ia mase lasi. Lau be mauri ena aniani, guba dekena amo lau diho, bema tau ta ese inai aniani ia ania, ia be do ia mauri hanaihanai.” Oibe, Dirava ese ia siaia tauna, Iesu, idia abidadama henia taudia ese mauri hanaihanai do idia abia. Mana eiava aniani idauna ta dainai unai idia abia diba lasi!

Unai hereva, taunimanima ese Iesu Kaperanaum kahirakahira dekenai idia davaria neganai ia gwauraia herevadia, be gabeai ia gwauraia lou, Kaperanaum ena dubu lalonai ia hadibadia neganai. Ioane 6⁠:​25-51, 59; Salamo 78⁠:24; Isaia 54⁠:13; Mataio 13⁠:​55-57.

▪ Dahaka ia vara guna bena guba amo ia mai anianina idia herevalaia?

▪ Iesu ese hoa karana ta ia karaia murinai, idia noia toa ta do ia henidia; dahaka dainai unai be maoro lasi?

▪ Dahaka dainai Iuda taudia idia maumau, Iesu ia gwau ia be guba amo ia diho aniani momokanina neganai?

▪ Guba amo ia mai anianina be edeseniai idia herevalaia?